Aus der aktuellen Ausgabe vom Montag, 27 März 2017

Worklečanska ponowjena ćěłozwučowarnja swjatočnje přepodata

Worklecy (JK/SN). Po jenož dźewjeć měsacach­ intensiwneho dźěła přepoda Worklečanski­ wjesnjanosta Franc Brusk (CDU) sobotu dospołnje ponowjenu sportownju přichodnym wužiwarjam. Nimo tamnišeho towarstwa Viktoria, kotrež­ ma z jara derje a načasnje ponowjenej halu nowy domicil, budźetej to Worklečanska zakładna a wyša šula. W běhu swjatočneho zarjadowanja, kotrež wobrubichu hudźbny ćah z Kleinröhrsdorfa a šulerjo zakładneje šule ze sportowym programom, přepoda wjesnjanosta symboliski kluč předsydźe Viktorije­ Alojsej Mikławškej kaž tež nawodomaj zakładneje a wyšeje šule Luciji Kuškec a Křesćanej Korjeńkej.

Sobu jedne z najwjetšich jutrownych wikow Hornjeje Łužicy wotměwaja so kóžde lěto we Wojerowskej Łužiskej hali. Tam bě sobotu a wčera widźeć, zo zajim za serbske jutrowne jejka po wšěm zdaću přiběra.

Wojerecy (JoS/SN). Štóž je so kónc tydźenja na 23. jutrownych wikach we Wojerecach rozhladował, móžeše zwěsćić, zo so młodźi ludźo přiběrajcy za debjenje jutrownych jejkow zajimuja. „Wjele motiwow swójby přez generacije dale dawaja“, rjekny kulturny měšćanosta Thomas Delling w swojej zahajenskej narěči.

Minjeny tydźeń knježeštej na farje Smječkečanskeje ewangelskeje wosady wulkej hołk a tołk. Sčasami tam wjac hač 40 dźěći z jedneje stwy do druheje chwatachu. Mister Lego bě zaso jónu přijěł. A w swojim transporteru měješe wjace hač 350 000 legoklockow! Spěšnje dachu so mali architekća do dźěła. Lětuše hesło rěkaše „Muž w štomje“. Słyšachu powěsć wo Cacheju a mějachu nadawk, tule stawiznu do swojich twarow zaplesć. A woprawdźe, wšudźe sedźeše na kóncu muž w štomje.

Legowe dny zakónčichu so wčera z kemšemi. Tam dźěći dorosćenym wo Cacheju powědachu, kak njewoblubowany bě, kak ludźom pjenjezy ze zaka ćahaše a kak so jeho žiwjenje změni, po tym zo bě Jězus pola njeho z hosćom. Na kóncu spjelni Moritz jako Cachej swój slub a je přitomnym cło, kotrež bě jim přewjele wobličił, wróćił – tónraz w šokolodźanych tolerjach. Jako Mr. Lego zamó Lutz Riedel kóždy dźeń znowa dźěći zahorić, a to za legoklocki kaž tež za stawi­zny biblije. W Smječkecach je z dobrym wašnjom, zo ewangelske a katolske, serbske a němske dźěći wjesele na zhromadnych projektach dźěłaja.

Christina Donatec

Dospołnje wopity z awtom po puću

Wóspork. Na awtodróze A 4 mjez Budyšinom a Wósporkom bě sobotu popoł­dnju wodźer wosoboweho awta typa Kia po puću. Wjacori swědcy policiji zdźělichu, zo šofer ze swojim wašnjom jězdźenja wobchad wohroža. Wopisane awto bě po wuprajenju swědkow wjacore razy do nabóčneho wobhrodźenja zrazyło. Při Wósporskej awtodróhowej wotbóčce policisća krótko do 16 hodź. awto zadźeržachu a 48lětneho wodźerja kontrolowachu. Při tym so wukopa, zo měješe tón 3,50 promilow alkohola w kreji. Jeho jězbnu dowolnosć sej zastojnicy wězo hnydom wobchowachu. Načinjena wěcna škoda wučinja dohromady něhdźe 20 000 eurow. Policija so z tymle padom bliže zaběra. Na kóždy pad drje dóstanje muž bórze póštu sudnistwa.

Wulke Ždźary (AK/SN). Z dźesać wosobow wopřijacym předsydstwom chce Wulkoždźarowski Krabatowy wjesny klub & domizniske towarstwo sylnišo we wsy skutkować. „Tři impulsy su rozsudne: Krabat, wjesne žiwjenje a zwjazanosć z domiznu“, podšmórny nowy předsyda Steffen Mühl minjeny pjatk na wólbnej zhromadźiznje w Krabatowym nowym wudworu. „Dotalne zarjadowanja chcemy dale wjesć. Widźu pak tež potencial za nowe ideje, kaž za filmowe wječory abo za serbskorěčny kurs.“

Towarstwu přisłuša 110 čłonow. Z měšanym chórom, rjemjeslniskej skupinu, dźiwadłowej skupinu a z poskitkami za seniorow so radźi rumnosće Krabatoweho noweho wudwora wobstajnje wužiwać. Wobydlerjo tam rady swójbne swjedźenje wotměwaja. Derje wužiwane je tohorunja nowe „hrajkanišćo kubołćikow“. Tež młodźina ma w domje wot lěta 2015 swoje rumnosće.

Berlin (dpa/SN). Turkowscy staćenjo smědźa wot dźensnišeho w Berlinje wo referendumje k zawjedźenju prezidialneho systema wothłosować. Hač do 9. apryla je turkowski generalny konsulat w stolicy wšědnje wotewrjeny. Hižo rano je tam 60 ludźi składnosć wužiło a swój hłós wotedać. Referendum w Turkowskej je za 16. apryl postajeny. Jenož we wukraju bydlacy staćenjo, w Němskej su jich 1,4 miliony, smědźa hižo zašo wolić a maja za to 13 lokalow k dispoziciji.

Parlament wolili

Sofia (dpa/SN). Doprědkasćehnjene wólbow bołharskeho parlamenta je woby­dlerska strona GERB bywšeho šefa knježerstwa Bojka Borisowa z 32,7 procentami dobyła. Najebać prognozy, njeje pak absolutnu wjetšinu hłosow wolerjow dóstała.­ Přiwšěm je sej Borisow wěsty, zo móže bórze nowe knježerstwo wutworić. Wuměnjenja na nowych partnerow pak nochcyše wón wozjewić.

Nalada jara dobra

Wjac hač 1 000 młodych dźiwadźelnikow je dźensa we wjace hač 40 inscenacijach na 16 jewišćach sprjewineho města Budyšina na 18. swětowym dnju šulerskeho dźiwadła swój talent poakzało. Němsko-Serbske ludowe dźiwadło přewjeduje wosebite zarjadowanje hižo wot lěta 2000. Prěni raz wobdźěli so na dnju šulerskeho dźiwadła tež skupina dźěći z Wojerec. Wone předstajichu w Budyskim Serbskim domje znatu bajku „Čerwjenawka“. Foto: SN/Maćij Bulank

Saarbrücken (dpa/K/SN). Wólby do Posaarskeho krajneho sejma je CDU njenadźicy jasnje dobyła. Přibywši dobrych pjeć dypkow nažnja wona 40,7 procentow, mjeztym zo dósta SPD jeno 29,6 procentow – přez tři procenty mjenje hač před pjeć lětami. Lěwica je tohorunja poskubana, dokelž zhubi tři dypki. Do sejma zaćehnje hišće AfD, za kotruž wuprajištej so 6,2 procentaj. Zeleni, FDP a Piraća dyrbja wonka wostać. Knježerstwo wutworić budźe po měnjenju ekspertow twjerdy worjech. Dźiwajo na poražku SPD ma CDU za to, zo je kandidat SPD na kanclerstwo Martin Schulz naraženy. Jeje wice­šefina Julia Klöckner rjekny: „Njeje žaneje přičiny, hić na runinje Zwjazka z dočasnje połnej paru do wólbneho boja.“ Schulz wšak bojownisce wutrubi: „Zaměr wo­stanje w republice změnić knježerstwo.“

Mobilny nuznik by so w Augsburgskim starym měsće sobotu nimale wo po­wodźenje postarał. Młodostni w starobje 15 do 18 lět běchu jón do tamnišeho Lechkanala ćisnyli, štož swědcy wobkedźbowachu. Z kranom dyrbjachu nu­znik skónčnje ze zatykaneho kanala wuća­h­nyć. Wšako hrožeše nahromadźena woda­ stare město zapławić. Kak wulku škodu je nuznik načinił, njeje jasne. Za mjetarjemi nuznika policija nětko pyta.­

Z colu je so policiji w delnjosakskim Badbergenje zańdźeny pjatk poradźiło woheń podusyć. Tam bě so awto 48lětneje žony palić započało. Na zbožo pak bě wona runje za kónc tydźenja nakupować była a měješe w kófrowym rumje mjez druhim pjeć litrow słódkeho napoja. Z nim zastojnicy płomjenja spěšnje zhašachu, a wohnjowu woboru njetrjebachu hižo na pomoc wołać.

Moskwa/Brüssel (dpa/K/SN). Hdyž běchu wčera po namołwje nawody opozicije Alekseja Nawalneho we wjacorych ruskich městach tysacy ludźi přećiwo korupciji w kraju demonstrowali, zakroči policija a je něšto stow z nich zajała. Europska­ unija sej tohodla wot ruskeho knježerstwa žada, měrliwje protestowacych hnydom pušćić. Jednanje policije zadźěwa dźě manifestaciji swobody měnjenja, zjednoćowanju a zhromadźowanju, kotraž je w ruskej wustawje zakótwjena. Nawalnyj wotmysli 2018 nastupić přećiwo Putinej.