Aus der aktuellen Ausgabe vom Dienstag, 18 Juli 2017

Berlin (dpa/SN). Po krawalach w zwisku z wjerškowym zetkanjom G 20 w Hamburgu trochuja zawěsćernje načinjenu škodu na něhdźe 12 milionow eurow. Třećina sumy potrjechi awta, zbytk domy a předewzaća, kaž dźensa w Berlinje zdźělichu. Potrjecheni su namołwjeni, škody ručež móžno přizjewić, nowinarjo pišu. Chaoća běchu we wobłuku tři dny trajacych namócnosćow w Hamburgu wobchody wurubjeli kaž tež awta a barikady na dróhach zapaleli.

Gumijowe čołmy blokować

Brüssel (dpa/SN). Hladajo na dale trajacy prud ćěkancow z Libyskeje pyta EU intensiwnje za napřećiwnymi naprawami. Wonkowni ministrojo EU su wčera w Brüsselu mjez druhim wobzamknyli, eksport gumijowych čołmow z wonkownymi motorami, kotrež móhli pašowarjo za transport migrantow wužiwać, do Libyskeje njedowolić. Lěwica w zwjazkowym sejmje je naprawy mjeztym jako „bjezzmyslne a smjertne“ wotpokazała a zdźěli: „Tak pašowarjo migrantow z hišće strašnišimi čołmami na morjo pósćelu.“ Reforma Trumpa zwrěšćiła

Brüssel (dpa/SN). Najnowša justicna reforma pólskeho knježerstwa zamołwitych Europskeje unije znjeměrnja, dokelž maja demokratiju za wohroženu. Dyrbjeli-li nowe zakonje płaćiwosće nabyć, dyrbjało to jasne konsekwency měć. Nowe zakonje ranja zrěčenja EU wo čłonstwje, rěka w zhromadnym spisu šefow najwažnišich frakcijow Europskeho parlamenta prezidentej Antonijej Tajanijej.

Přewšo kritisce je so dźensa tež luxemburgski wonkowny minister Jean Asselborn wuprajił. „Smy wjele sćerpnosće měli. Tola čas dialoga z Pólskej so nachila“, rjekny wón w rańšim magacinje sćelaka ZDF. Tež wón je sej wěsty, zo justicna reforma w Pólskej prawidła demokratije a prawnostatnosće rani. Za móžnymi konsekwencami prašany skedźbni Asselborn na bližace so jednanja wo nowym etaće Europskeje unije. W najhóršim padźe móhła EU Pólskej prawo hłosowanja sćazać. To by dotal njesłyšany podawk był.

Justicnu reformu kritizował je tež němski wonkowny minister Sigmar Gabriel (SPD). Wón warnowaše před „drjebjenjom europskich fundamentow“.

Mossul/Drježdźany (dpa/SN). Po zajeću 20 wojowarkow teroristiskeje milicy Islamski stat (IS) w irakskim měsće Mossul chcedźa nětko pruwować, hač pjeć z nich woprawdźe z Němskeje pochadźa. Irakski oficěr antiteroroweje jednotki bě wo tym rozprawjał. Tež nowina Welt informaciju dźensa rozšěrja, powołujo so na informacije wěstotnych mocow.

Tak maja pječa pokiwy na to, zo je jedna ze zajatych 16lětna z Połčnicy. Wona bě so loni w lěću zhubiła, po tym zo bě k islamej přestupiła. „Krajny kriminalny zarjad ma nowe dopóznaća, kotrež nětko pruwuje“, rjekny wyši statny rěčnik Lorenz Haase powěsćerni dpa. Młodostna bě přez internet kontakt k IS nawjazała. Statne rěčnistwo w Drježdźanach bě z teje přičiny přećiwo njej přepytowało.

Kaž irakski oficěr rozprawja, běchu skupinu wojowarkow minjeny štwórtk w tunlowym systemje IS našli, hdźež so chowachu. Mjez zajatymi su žony z Ruskeje, Turkowskeje, Kanady a Čečenskeje.

Nimale 10 000 ludźi na dźeń wotewrjeneho twarnišća přišło

Choćebuz (mih/SN). Tajku mjerwjeńcu w Janšojskej brunicowej jamje dołho wjace widźeli njeběchu. Bjez přestawki přiwjezechu tam transportne nakładne awta a ekstra skazane busy minjenu sobotu hosći, kotřiž běchu we wulkej ličbje na dźeń wotewrjeneho twarnišća k swjedźenišću přichwatali. Tam ma přichodnje nowy Wuchodny jězor nastać. Z płoninu 1 900 hektarow ma jězor na kromje Choćebuza jedyn z najwjetšich Braniborskeje być. Wopytowarjo zhonichu něštožkuli zajimaweho wo stawiznach něhdyšeje brunicoweje jamy Choćebuz-sewjer. Tež to, zo bě ju 23. decembra 2015 posledni ćah z brunicu wopušćił.

Wosebity powabk wopytowarjam bě, so takrjec na dno noweho jězora podać, kotrež je tuchwilu hišće suche. Tak dachu so mnozy při zachodźe swjedźenskeho stana fotografować, hdźež běchu sym­bolisku wodowu skalu stajili, kotraž skedźbnješe z 62,5 metrami na pozdźišu hłubokosć jězora.

Strašne městno za sobujědźenje je sej młoda kóčka w hessenskim Hombergu nad rěku Ohm wupytała. W porjedźerni awtow namaka ju wčera sobudźěłaćer, po tym zo bě šofer wo spodźiwnych zwukach w motorowej rumnosći rozprawjał. Šef porjedźernje je kóčku najprjedy raz w běrowje zaměstnił. Mjeztym su hóstnu swójbu za nju wuslědźili. Tež mjeno micka hižo ma: Mercedes.

Njepłaćeneje chłostanki wosom eurow dla zaja policija na Hamburgskim lětanišću muža, kiž bě so z dowola w Turkowskej nawróćił. Wón bě před lětomaj wopačneho parkowanja chłostanku 15 eurow dóstał, je pak jeno dźěl zapłaćił. Tak zwosta 8,07 eurow. Dokelž njemějachu adresu, wukaza statne rěčnistwo zajeće. Muž móžeše so rozsudźić: pak dźeń do jastwa, pak 8,07 eurow plus 53,60 eurow za wobdźěłanje płaćić. Wón radšo zapłaći.

Njebych wěrił, na čo maš dźiwać, što wšo wobkedźbować a zaručić, sy-li wobsedźer lěsa. A w Sakskej je tójšto lěsa. Runje tón wohroža tuchwilu tež pola nas skórnik. Zo njeby k wjetšim škodam dóšło, stej nazhonjenje a rada fachowcow trěbnej. Derje, zo mamy nazhonitych lěsnikow a hajnikow, kotřiž dokładnje wědźa, na čo maja dźiwać. Woni dźě lěsy najlěpje znaja, je wobstajnje wobkedźbuja a změny dokładnje dokumentuja. Lěsnicy a hajnicy dźěłaja zwjetša zaćichim, mnohim z nas njewidźomnje. Runje woni pak fachowcow na zarjadach podpěruja. Bjez jich skutkowanja njebychu tam zawěsće dosć informacijow měli, zo móhli prawje rozsudźić a škodam w lěsach zadźěwać. Dale wudźeržuja woni dobre zwiski k wobsedźerjam lěsow a jich poradźuja, je-li trjeba. Wutrobny dźak tuž na tymle městnje wam hajnikam a lěsnikam za waše spore dźěło. Janek Wowčer

Swěrny wonkowny sobudźěłaćer Serbskich Nowin, bywši šefredaktor časopisa Rozhlad, přełožowar a publicist Cyril Kola swjeći dźensa w Budyšinje 90ćiny. Hač donětka wón wšědne wudaće Serbskich Nowin ze swojimi přinoškami wobohaća. Kaž sam praji, jeho tele dopołdniše dźěło młodeho a duchownje čerstweho dźerži.

Praha (ČŽ/K/SN). Bjezdźěłnych bě w Čěskej na kóncu prěnjeho połlěta 2017 tak mało kaž hižo 20 lět nic. Porno meji je bjezdźěłnostna kwota wo dalši 0,1 dypk spadła a wučinja nět runje hišće štyri procenty, z čimž je wona po cyłej Europskej uniji najniša. Najnowše daty z dźěłowych wikow wozjewi Čěski dźěłowy zarjad. Wot njeho podatu ličbu 297 439 dźěło pytacych wosobow Lidové noviny přenjesu do zwěsćenja „jenož kóždy 25. Čech njedźěła“. Na druhej stronje je ličba swobodnych dźěłowych městnow dźakowano dale dobremu wuwiću ekonomije znowa přibyła. Wot předewzaćow, gastronomije, ratarstwa a nic naposledk posłužbow poskićenych 183 500 městnow je 49 561 wjac hač loni. Přiwšěm je bjezdźěłnosć w kraju chětro rozdźělna. Nimo stolicy z jenož 2,7 procentami je wona­ tohorunja přezměrnje mała w Plzeňskim (2,5) a Juhočěskim wobwodźe (2,7), susodźacymaj z Bayerskej a Awstriskej. Susodaj Sakskeje Karlovarski a Liberecski wobwod móžetej ze 4 resp. 4,1 procentom jeno přerězk dźeržeć. Mjez nimaj ležacy Ústíski wobwod ma pak ze 6,4 procentami najwjetšu bjezdźěłnosć.

Štwórta stacija bičwolejbuloweje tury Radija Satkula wjedźeše sportowcow a přihladowarjow do Kulowca. Tam bě wčera dźewjeć cyłkow. Prěnje městno je sej znowa Dwójna nula zawěsćiła a to w napjatej hrě přećiwo Serbskej muri. Organizowałoj běštej staciju mustwje Pruska nadźija a MST (na wobrazu přećiwo Mixery). Přichodnu póndźelu hraja w Pančicach. Foto: Gloria Žurec

Minjeny měsac startowachu lochkoatletki Serbskeho gymnazija Budyšin prěni raz w sakskim finalu. Hižo wobdźělenje w Kamjenicy je wusahowacy wukon hladajo na to, zo z nich žana w sportowym zjednoćenstwje jednotliwe discipliny lochkoatletiki njetrenuje.

Naše sportowče, kotrež wudobychu sej w sakskim finalu njedźakowne a přiwšěm wulkotne štwórte městno, su tež w kopańcy, volleyballu, beachvolleyballu, mjetańcy a rejowanskich skupinach jara wuspěšne.

Z 1,40 m we wysokoskoku nastaji Tadeja Šeferec wosobinski rekord. Škoda, zo njezamóchu wšitke serbske lochko­atletki swoje wosobinske najlěpše časy a dalokosće w Kamjenicy pokazać. Při­wšěm bě wubědźowanje jim wšěm rjane nazhonjenje. Gabriela Jendrewscyna