Bórze nowy turistiski poskitk w Błótach
Bórkowy (SN/at). W błótowskich Bórkowach budu hač do kónca apryla wuměnjenja za čołmikowarjow dale polěpšene. „Hosćo běchu minjene lěta přeco zaso namjetowali, za čołmikowanje krute čary poskićeć, podobnje kaž za kolesowanske abo pućowanske šćežki“, rjeknje Nicole Schlenger, nawodnica wěcneho wobłuka turizm w Bórkowskim zarjedźe. Nětko je započatk sčinjeny. „Hromadźe z čołmowymi přistawami smy dohromady pjeć čarow – tři zelene, čerwjenu a čornu – definowali“, wona rozłožuje. Zelene čary po Wobsednych, Prizarskich a Kuparskich Bórkowach traja kóžda nimale dwě hodźinje. Dotal jenički poskitk čerwjeneje kategorije, kotraž je na štyri hodźiny čołmikowanja wusměrjena, wupřestrěwa so po Wobsednych a Prizarskich Bórkowach. Po najnaročnišej, čornej ćarje sy cyły dźeń na wodźe. Wona wjedźe čołmikarjow hač do Lipjeho.