Berlin (SN). Problemy narodnych mjeńšin w Němskej chcedźa přichodnje jónu wob lěto w zwjazkowym sejmje wobjednać. Nimo toho ma kóžda frakcija w sejmje mjeńšinopolitiskeho rěčnika ze swojich rjadow pomjenować. To je jedyn z wuslědkow dwaj dnjej trajaceho wuradźowanja mjeńšinoweje rady Němskeje w Berlinje, informuje Mjeńšinowy sekretariat w nowinskej zdźělence. Zastupnicy Frizow, Danow, němskich Sintow a Romow a Łužiskich Serbow běchu tam wo aktualnych ćežišćach mjeńšinoweje politiki na zwjazkowej runinje debatowali.

Zo budźe so Němski zwjazkowy sejm přichodnje tež z mjeńšinami zaběrać, je předsyda nutřkowneho wuběrka sejma Ansgar Heveling (CDU) přilubił. Zastupnicy mjeńšin běchu sej jeho z městopředsydu Frankom Tempelom (Lěwica) přeprosyli. Při tym dźěše wo prašenje, kak móhli mjeńšiny na zwjazkowej runinje lěpje sobu skutkować a wjace kedźbnosće nańć. Nětko ma jónu wob lěto rozprawa wo połoženju mjeńšin nastać.