Braniborska serbska rada a demonstranća so noworjadowanju spřećiwili

Picnjo (SN/MkWj/MiR). Rada za serbske naležnosće Braniborskeho krajneho sejma je so wčera wurjadnje schadźowała. Aktualnych přičin dla pak nječinješe to w Podstupimskim krajnym sejmje, ale w Picnjanskej Mozaikowej zakładnej šuli. „Chcychmy sej problemy na bazy zbližić“, rjekny předsyda braniborskeje serbskeje rady Torsten Mak našemu wječornikej. Te wšak móžeše šulski nawoda Frank Nedoma nadrobnje rysować. Wón rozłoži, zo na kubłanišću snadneje ličby zajimcow za wučbu delnjoserbšćiny dla hižo dlěši čas lětniki přesahowacu wučbu praktikuja, štož wězo k wšelakim ćežam wjedźe. Dyrbjał-li so planowany wukaz ministerstwa za kubłanje, młodźinu a sport (MBJS) zwoprawdźić, zo dyrbjeli skupiny serbšćiny přichodnje znajmjeńša dwanaće wuknjacych měć, je serbska wučba wohrožena. Dołhodobnje njebychu tam potom scyła žanu wučbu serbšćiny wjace měli, Nedoma rozłoži. Serbska rada so hižo dlěši čas prócuje, tele šulske postajenje změnić.