Kamjenc (SN/at). SPD w Budyskim wo­krjesu chce so we wobłuku dźěłoweho kruha ze serbskimi naležnosćemi zaběrać. Přeprošenje předsydkow městneju zwjazkow Kamjenc a Wojerecy Kathrin Michel a Margitty Albrecht kaž tež předsydow Budyskeho městneho a wokrjesneho zwjazka dr. Měrćina Krawca a Kevina Stanulle do Kamjenca je wčera dźesać wosobow, Němcow a Serbow, sćěhowało. Mjez nimi běštaj tež předsyda Domowiny Dawid Statnik a Harald Baumann-Hasske, zapósłanc Sakskeho krajneho sejma a jedyn z narěčenskeju partnerow frakcije SPD za serbske naležnosće.

Přitomni zwěsćichu, zo je trjeba so ze serbskimi prašenjemi na bazy rozestajeć. Tu zdobyte informacije móhli skutkowanje frakcije w krajnym sejmje, ale tež dźěło jako koaliciski partner w sakskim knježerstwje podpěrać, rozłoži šef SPD za město Budyšin a wokolinu dr. Měrćin Krawc na naprašowanje. „Chcemy so ze serbskimi temami zaběrać, je sćěhować, tež z hosćimi, zo njebychmy stajnje jenož w swójskim kruhu byli“, Krawc podšmórny.