Scholz Španisku wopytał
Berlin (dpa/SN). Zwjazkowy kancler Olaf Scholz (SPD) je so dźensa na prěnju wukrajnu jězbu lěta do Španiskeje podał. W Madridźe wočakowaše jeho ministerski prezident Pedro Sánchez, z kotrymž chcyše wo boju přećiwo koronapandemiji rěčeć. Španiska je po Francoskej, Pólskej a Italskej štwórty kraj, kotryž Scholz po nastupje zastojnstwa jako němski zwjazkowy kancler wopyta. Nimo toho bě so wón w decembru w Brüsselu Europskej uniji a NATO předstajił.
Baerbock na Ukrainje
Kijew (dpa/SN). Wonkowna ministerka Annalena Baerbock je so dźensa k zahajenju swojeho nastupneho wopyta na Ukrainje w Kijewje ze zastupnikami tamnišeje wobkedźbowanskeje misije organizacije za wěstotu a zhromadne dźěło w Europje zetkała. Po tym chcyše politikarka Zelenych pomnik za „Njebjesku stotku“ na Majdanje wopytać. Tam wopominaja mortwych proeuropskeje rewolucije lěta 2014. W běhu dnja wočakowaštaj ju wonkowny minister Dmytro Kuleba a prezident Wolodimir Zelenskij.
Socialna njesprawnosć přiběra
Wobswětoškitarjo z Čěskeje, Pólskeje a Němskeje su ...
Šiman: Krótši čas pjenježnje wurunać
Budyšin (WL/SN). Hornjołužiska předewzaćelska iniciatiwa wopřijima něhdźe 30 předewzaćow najwšelakorišich branšow a wulkosćow. Jich zhromadnosć je ta, zo na samsnym městnje skutkuja, w Budyskim wokrjesu. Nimo toho zasadźeja so wšitcy zhromadnje za dobre žiwjenje, za přichod swojeje domizny a přećiwo wotchadej fachowcow do metropolow. Tónle nadawk je hladajo na planowany kónc zmilinjenja brunicy hač do lěta 2038 a na přepołoženje termina přez nowe zwjazkowe knježerstwo na lěto 2030 čim nuzniši.
Zjězd CDU wuzwoli předsydu
Berlin (dpa/SN). CDU chce swojeho přichodneho předsydu Friedricha Merza sobotu, 22. januara, na dźeń trajacym zjězdźe do zastojnstwa wuzwolić. To je strona w Berlinje wozjewiła. Merz bě so při naprašowanju čłonow wo nowym předsydźe w decembru z 62,1 procentom přećiwo Norbertej Röttgenej a Helge Braunej přesadźił.
Po předstajenju kandidata ma 1 001 kandidat bywšeho předsydu frakcije CDU/CSU w zwjazkowym sejmje z elektroniskim wothłosowanjom za naslědnika při wólbach zwjazkoweho sejma zwrěšćeneho kanclerskeho kandidata unije Armina Lascheta wuzwolić. Do zahajenja koronapandemije bě w CDU z wašnjom, noweho předsydu na dwaj dnjej trajacym zjězdźe wuzwolić.
Přichodny pjatk chcetej so wodźacej gremijej CDU – prezidij a předsydstwo – zetkać, zo byštej zjězd přihotowałoj. Po wuzwolenju Merza za předsydu chce CDU kompletne předsydstwo znowa wuzwolić. Je to konsekwenca po historiskej wólbnej poražce ze 24,1 procentom.
Gastronomija ćežko trjechena
Kóžde štwórte dźěłowe městno w hosćencach a hotelach so zhubiło
Wiesbaden/Berlin (dpa/SN). Koronapandemija je w hosćencach a hotelach Němskeje nimale kóžde štwórte dźěłowe městno zničiła. Po ličbach Zwjazkoweho statistiskeho zarjada dźěłachu prěnje dźesać měsacow minjeneho lěta 23,4 procenty ludźi mjenje w branši, hač bě jich do wudyrjenja krizy lěta 2019. Dokelž tež ličba wučomnikow dale woteběra, ličitej Dźěłarnistwo za zežiwjenje a hosćency (NGG) a zwjazk Dehoga z přewšo ćežkim nowym startom.
Wosebje bolostnje je kriza sobudźěłaćerjow w barach a korčmach trjechiła: Tu dyrbješe wot lěta 2019 nimale połojca (44,7 procentow) přistajenych hić. W zawodach, kotrež jědźe poskićeja, trochu lěpje wupada. Tam maja wo 22,5 procentow mjenje ludźi. Najwěsćiše běchu dźěłowe městna w zawodach z cateringom, hdźež dźensa 17,1 procent ludźi mjenje dźěła, hač bě to do korony.
To a tamne (17.01.22)
Jednotliwu stronu comicoweho zešiwka su w USA za wjace hač tři miliony dolarow přesadźowali. Originalna rysowanka strony 25 wuměłca Mikea Zecka z lěta 1984 wušłeho comica „Secret Wars No. 8“ je 3,4 miliony dolarow (něhdźe tři miliony eurow) wunjesła, kaž awkciski dom Heritage Auctions w texaskim Dallasu zdźěli. Je to najdróša hdy přesadźowana strona comicoweho zešiwka.
Najebać koronapandemiju su so statysacy indiskich wěriwych w rěce Ganges kupali, zo bychu sej hrěchi wotmyli. Mnozy njewužiwachu w zwjazkowym staće Uttar Pradesh žane škitne nahubniki a stejachu wusko hromadźe. Do toho dyrbjachu wšitcy wobdźělnicy negatiwny PCR-test předpołožić. Lěkarjo běchu podarmo spytali swjatočnosć sudnisce zakazać dać. Ličby natyknjenjow z koronu w Indiskej zaso přiběraja.
Lindner swoje plany rozłožił
Berlin (dpa/SN). K zakónčenju tři dny trajaceje debaty zwjazkoweho sejma předewzaća noweje amploweje koalicije SPD, Zelenych a FDP nastupajo je zwjazkowy financny minister Christian Lindner (FDP) dźensa swoje plany předstajił. Znowa su kontrowersnje wo dodatnym etaće 2021 diskutowali. Z nim chce Lindner za přewinjenje koronakrizy předwidźane, ale njewužiwane srědki za klimu škitace naprawy wužiwać. Opozicija ma to za wustawu ranjace.
Imunitu Hilsy zběhnyli
Berlin (dpa/SN). Dobre lěto po swojim wobdźělenju na demonstraciji tak mjenowanych prěkimyslerjow hroža Budyskemu zapósłancej AfD w zwjazkowym sejmje Karstenej Hilsy juristiske konsekwency. Přećiwo hłosam AfD je parlament wčera wječor wobzamknył, imunitu zapósłanca zběhnyć a chłostanske jednanje přećiwo njemu zmóžnić. Hilse bě so na kromje demonstracije přećiwo statnym naprawam policiji spjećował.
Wukaz Bidena zběhnjeny
Studenća Drježdźanskeje uniwersitneje kliniki su so wčera před ...
Nowe prawidła karanteny dla
Berlin (dpa/SN). Zwjazkowa rada je dźensa na wurjadnym posedźenju nowe naprawy w zwisku z koronawirusom schwaliła. Hłownje dźe wo rjadowanja nastupajo karantenu, na kotrež běchu so Zwjazk a zwjazkowe kraje dojednali. Postajenje, kotrež bě zwjazkowy sejm wčera wječor wobzamknył, mjez druhim předwidźi, zo njetrjebaja třeći króć šćěpjeni wjace do karanteny, su-li kontakt k natyknjenej wosobje měli. Tež doba karanteny bu přikrótšena.
W běhu dnja chcychu so zwjazkowy minister za strowotnistwo Karl Lauterbach (SPD), prezident Roberta Kochoweho instituta Lothar Wieler a Berlinski wirologa Christian Drosten na zwjazkowej nowinarskej konferency k aktualnemu połoženju w koronakrizy wuprajić.
