Kiel (SN/JaW). Schleswigsko-Holsteinska chce swoje kompetency w regionalnych a mjeńšinowych rěčach hišće bóle zeskutkownjeć. To wuchadźa z rozprawy wo narodnych mjeńšinach w kraju, infor­muje Berlinski mjeńšinowy sekretariat. Konkretnje chcedźa w krajnych zarjadach a zjawnych zarjadnišćach mjez druhim­ wo nałožowanje mjeńšinowych rěčow wabić, dalekubłanja personala spěchować a hižo wobstejace rěčne znajomosće na tafličkach lěpje woznamjenić. Dale chcedźa w Schleswigsko-Holsteinskej „wučbu frizišćiny a danšćiny rozšěrić, tež jako poskitk wjetšinowemu wobydlerstwu. Wšako je frizišćina wohrožena rěč.“ Takle rěka w rozprawje, ­kotruž je schles­wigsko-holsteinski ministerski prezident Daniel Günther (CDU) kónc minjeneho měsaca w Kielu krajnemu sejmej předstajił.

Dołhož hišće debatujemy, čehož měli so historisce wuznamneho datuma dla dopominać, diskusija žiwa wostawa. 9. nowember woznamjenja za němske stawizny we wjacorym zmysle cezuru. Kónc měrcowskeje rewolucije 1848, kónc kejžorstwa 1918, kónc „realnje eksistowaceho socializma 1989 – a spočatk holocausta 1938. W kotrej měrje hodźeli so wšitke tele podawki na jenički dypk wobmjezować, njech rozsudźa historikarjo. Hač pak měł so tónle datum z regularnym wopomnjenskim dnjom stać, je hinaše prašenje. Hdyž docyła, měła pogromowa nóc přičina spomnjeća być – přećežka je tu waha stawiznow; přeprezentna žadosć za „kónčnej smuhu“, kajkuž sej tele dny tójšto „póndźelnišich demonstrantow“ mjenje abo bóle direktnje přeje. Přiwšěm: „Swjate dny“ su wjetšinje ludnosće skerje přičina sej krótki dowol dowolić, do njeho a/abo na nim kapku přewjele sej popřeć abo konsumej hołdować – kajke to krasne spomnjeće! Bosćan Nawka

Kaž „Crocodile Dundee“ je Awstralčan nadpad wulkeho krokodila wotwobarał. 60lětny wudźeše w rěce McIvor w tropiskim Queenslandźe, jako jeho zwěrjo naraz z wody atakowaše a za noze k rěce sćahny. Awstralčan pak wućahny mały nóž ze swojeho pasa a kałny z nim do hłowy zwěrjeća. Na to jeho krokodil pušći a so wróćo do wody zminy. Zranjeny zamó muž samo hišće do bliskeje chorownje jěć.

„Atlas zboža“ přepytuje spokojnosć Němcow za čas pandemije. Zhladujo na to, zo tuchwilu šćěpjenja, homeschooling a homeoffice žiwjenje postajeja, mějachu eksperća w nadawku Němskeho pósta začuća Němcow na dožiwjenje zboža přepytować. Z naprašowanja wuchadźa, zo podachu ludźo swoju přerěznu žiwjensku spokojnosć loni na skali nul do dźesać ze z 6,74 dypkami. Lěto do toho bě přerězk hišće 7,14 dypkow.

Berlin (dpa/SN). Po tym zo je cyłoněmska incidenca druhi dźeń za sobu nowy rekord (213,7) docpěła, wupraji so šef kanclerskeho zarjada Helge Braun za to, přewjesć konferencu ministerskich prezidentow. „Trjebamy zhromadne koro­nowe naprawy Zwjazka a jednotliwych krajow. To mam wokomiknje za jara wažne“, potwjerdźi politikar CDU dźensa w rańšim magacinje telewizije ARD. Braun žada sej wosebje wjace přidatnych šćěpjenjow za wjetši škit před koronu.

Koalicija žněje wulku kritiku

Berlin (dpa/SN). Naćisk zakonja amploweje koalicije wo koronowych naprawach žněje wjele kritiki. Strony SPD, FDP a Zeleni su za bjezpłatne testy, za pra­widło 3G na dźěle a za pjenježnu pomoc chorownjam. Krajna skupina CSU, zwjazk němskich městow a socialne zwjazki plany­ koalicije wotpokazuja. „Zo chce koalicija epidemiju politisce skónčić, bjez toho zo namjetuje alternatiwy, je znamjo njepřemyslenosće“, rjekny dźensa předsyda krajneje skupiny CSU Alexander Dobrindt medijam.

Dny jazza dočasnje zakónčene