Město Wojerecy chce dźěło towarstwa kulturny zwjazk zaměrnje podpěrać. Předewšěm na polu spěchowanskich srědkow chce pomhać a kmanych kooperaciskich partnerow sposrědkować. To je wyši měšćanosta Torsten Ruban-Zeh (SPD) towarstwu přilubił.
Wobłuk spěchowanskich srědkow je dźeń a njepřewidniši. Tohodla „je podpěra nuznje trěbna“, Wojerowski měšćanosta podšmórnje. Nimo toho wón namjetuje, přirjadować towarstwu městno zwjazkoweje dobrowólneje słužby abo dobrowólneho socialneho lěta. Tak móhło „młodym ludźom temy domizniskich stawiznow zbližić“. Ruban-Zeh dale wuzběhnje, zo chce „spěchowanski management města z programom ‚Aktiwne město a wjesne dźěle‘ na stare runje tak kaž na nowe město wusměrić“.
„Sym Serbowka a mjerzam so, hdyž so něchtó praša, hač mam serbske korjenje. Implicitnje přec rěka, zo njejsym prawa Serbowka“, Hella Stoleckojc powěda, „hromadźe ze staršim bratrom smój prěnja generacija w swójbje, kotraž serbsce rěči.“ Identita je kaž młoda rostlinka, rozłožuje 25lětna absolwentka Delnjoserbskeho gymnazija Choćebuz. Su-li wuměnjenja dobre, dóstawa wona nowe korjenje a rosće. Staršej Helle njejstaj Serbaj, ale přećelej serbskeje kultury. Tak je so jeje mać na wušiwanskim kursu za serbsku drastu wukmaniła a so mjeztym tež swoju delnjoserbsku drastu hotuje.
Dešno (mih/SN). Zo Saksojo rady po swěće pućuja, je znate. A njeje-li to praktiskich přičin dla móžno, da podadźa so druhdy kaž Karl May prosće duchownje na dyrdomdejsku jězbu do cuzych krajow. Nic literarnje, přiwšěm tohorunja wuměłsce přeprošuje dalši Saksa nětko zajimcow na fantastiske pućowanje. Tak wita Dešnjanski Domizniski muzej wot minjeneje njedźele zajimcow na hodownu wustajeńcu. W Riesy bydlacy tružacy ludowy wuměłc Fredo Kunze wjedźe wopytowarjow do bajkojteho swěta swojich drjewjanych figurow. Přehladka pokazuje z wulkej lubosću tružene figury ze scenami samotneje kupy Robinsona Crusoewa, sceny Dona Quijota w Španiskej kaž tež hońtwu na buwoły pola Indianow na dźiwim zapadźe Ameriki. W krótkich jednanjach powěda wuměłc ze swojimi figurami kuzłapołne stawiznički. Mnohe małke detaile tutu jězbu po swěće wobohaćeja. Wjacore sceny wo fantastiskim žiwjenju Münchhausena buchu za Drježdźanski Muzej sakskeho ludoweho wuměłstwa stworjene a su jako požčonka Münchhausenoweho města Bodenwerda widźeć.
Choćebuz (SN/CoR). Wjace hač 700 přihladowarjow je dotal widejo 37. delnjoserbskeje schadowanki přiwabiło, kotruž su sobotu z kofejownje Delnjoserbskeho gymnazija w Choćebuzu jako livestream wusyłali. Połdrahodźinski widejo je na Youtube-kanalu Załožby za serbski lud wozjewjeny.
W Budyskim Serbskim ludowym ansamblu instaluje tuchwilu Kubšiska metalotwarska firma Freund škleńčanu fasadu při nowym přitwarje za probowe rumnosće chóra a baleta. Po tym zo bě saněrowanje třěchi dokónčene, su tohorunja wokna wobnowili kaž tež wonkownu fasadu při Mosće měra ležaceho twarjenja wobarbili. Paralelnje přewjeduja w nutřkownych rumnosćach přihotowanske mulerske dźěła. Dom ansambla přetwarjeć započeli běchu hižo w oktobrje 2019. Po informacijach SLA dotal wšitke naprawy po časowym planje běža. Klětu w septembrje ma wšitko hotowe być. Foto: Jurij Helgest