Z wudaća: wutora, 18 oktobera 2016

Na swjatku poezije a kultury „Lytavry“ w Černihiwje

Z Budyskeho a Drježdźanskeho wida zdawa so, jako by ukrainski Černihiw na wuchodnej kromje Europy wopušćeny drěmał. Při tym so čłowjek dźiwa, dojědźe-li sej tam, zo wjedu přez město, ležace nimale 130 kilometrow sewjernje Kijewa, busowe a železniske čary z Odessy přez Kijew do Minska, Pětrohroda a Moskwy. Podobne zwiski wjazaja Černihiw ze swojimi něhdźe 300 000 wobydlerjemi z Lwowom a Waršawu na zapadźe kaž tež z Charkowom na wuchodźe.

Starožitne sydlišćo podłu rěki Desna z wjace hač pjatnaće wurjadnymi, w minjenymaj lětdźesatkomaj wuběrnje ponowjenymi katedralemi, kotrež wuchadźeja z doby wuchodnosłowjanskeho mócnarstwa „Kijewskeje Rus“, móžeš w prawym zmysle słowa wobhladować jako stawizniske a kulturne srjedźišćo. Mjez druhim so w měsće a jeho wokolinje z dalšimi dawnymi sydlišćemi ruska a ukrainska literatura a kultura křižu­jetej.

165 družin jabłukow a 22 družin krušwow wopřijimaše přehladka sadu zawčerawšim na kermušnych wikach w Slepjanskim Serbskim kulturnym centrumje. Tam móžachu wopytowarjo mjez druhim swójske družiny postajić dać abo so kaž tule poradźować dać, kotre družiny so najlěpje do swójskeje zahrodki hodźa. Foto: Jost Schmidtchen

Mjeztym hižo šesty parkowy seminar w Delnim Wujězdźe je minjenu sobotu mnohich dobrowólnych pomocnikow zjednoćił. Zhromadnje su tam tójšto zdokonjeli.

Delni Wujězd (JoS/SN). Hrodowe parki w Hornjej Łužicy trjebaja pomoc. Wuhlady na pjenježnu pomoc pak su zwjetša jara špatne. Tuž so wobydlerjo často sami gratu přimaja, tak kaž hižo něšto lět w Delnim Wujězdźe. Tam přewjedźechu minjenu sobotu mjeztym hižo šesty parkowy­ seminar pod fachowym nawodom Lipšćanskeje krajinoweje architektki ­Kathrin Franz. Z njej zmištrowachu wjacore trěbne hladanske naprawy. K tomu namołwjało bě Delnjowujězdźanske domizniske towarstwo. Cyły dźeń bě stajnje něhdźe 20 pomocnikow při dźěle, mjez nimi běchu tež młódši ludźo, štož swědči wo jich zwjazanosći z hrodowym parkom.

Zapadny pobrjóh Šibojskeho jězora chcedźa za kupacych wuwiwać

Wojerecy (AK/SN). Zhromadnje ze susodnymaj gmejnomaj Sprjewiny Doł a Łaz chce město Wojerecy wuwiće při Šibojskim jězoru pospěšić. Tole podšmórny nawoda twarskeho wotrjada měšćanskeho­ zarjadnistwa Dietmar Wolf na zašłym posedźenju měšćanskeje rady. Jeje čłonojo schwalichu mjeztym hižo pjatu změnu plana wužiwanja ležow­nosćow města Wojerecy.

Budyšin (SN). Saněrowanje wotnožki ­Budyskeje wokrjesneje lutowarnje na arealu Budyskeho Marktkaufa je dokónčene. Kaž lutowarnja zdźěli, budźe ­wotnožka wot 1. nowembra zaso wočinjena. Loni nazymu bě tam k wjetšej škodźe dóšło, dokelž bě so wodowód puknył. Sobudźěłaćerjo, kotřiž swojich klientow přechodnje w rumnosćach wotnožki na Žitnych wikach posłužowachu, steja wot přichodneho měsaca zaso k zwučenym serwisowym časam k dispoziciji. Nowe je, zo maja we wotnožce Marktkauf nětko přidatnu rumnosć za wosobinske a diskretne poradźowanje. Nimo toho móžeš tam w samoposłužowanskim wobłuku pjenježny awtomat, tak mjenowany zapłaćenski a wupłaćenski awtomat kaž tež dwaj ćišćakaj za kontowe wućahi wužiwać.

Při wohenju so zraniłoj

Wóspork. Skóncowany elektriski domjacy nastroj bě po wšěm zdaću na tym wina, zo je zawčerawšim rano we Wósporku woheń w jednoswójbnym domje wudyrił. Kaž policija zdźěli, so płomjenja po bydlenskej stwě rozpřestrěwachu. Při tym so dwě wosobje snadnje zraništej. Wobornicy z Wósporka, Malećic, Hrodźišća a Nosaćic woheń zhašachu. Wěcna škoda wučinja něhdźe 8 000 eurow.

Paduchow lepili

Budyšin. Podhladneju paduchow metala su w nocy na njedźelu při Budyskim Koporniku lepili. Swědk wobkedźbowaše, kak chcyštaj so mužej w starobje 26 a 35 lět do firmy zadobyć, w kotrejž běchu wšelake družiny metala składowane. Swědk informowaše policiju, tak zo móžachu zastojnicy zakročić. Policija pad dale přepytuje.

Socialne poradźowanje

Budyšin. Zapósłanc Sakskeho krajneho sejma Hajko Kozel (Lěwica) přepro­šuje štwórtk, 20. oktobra, na socialne poradźowanje do swojeho Budyskeho běrowa na Šulerskej 10. Zhromadnje z prawi­znikom Gregorom Janikom, w socialnym prawje wosebje wobhonjenym, pomha wón problemy rozrisać, kotrež so často w socialnych prašenjach jewja. Poradźowanje wotměje so wot 13.30 do 15.30 hodź. a je tež w serbskej rěči móžne. Termin dojednać móža sej zajimcy pod telefoniskim čisłom 03591/ 31 89 904.

Knižna premjera

Budyšin. Štwórtk, 20. oktobra, w 19.30 hodź., je w Budyskej Smolerjec kniharni knižna premjera Benedikta Dyrlichoweje zběrki basni a powědkow „Zlět zelenych wuchačkow“. W tekstach wotkrywa ­awtor, čerpajo z bohateje pisanosće maćerneje rěče, rjanosć a wjelebarbnosć žiwjenja. Jako by so jemu přeco wo njewšědnje wumolowanych wuchačkach dźało.

Přednošuje wo ptačkach

Njebjelčicy (aha/SN). Zhromadnje ze Sakskej krajnej załožbu za přirodu a wobswět je minjeny pjatk wječor Njebjelčanska gmejna přeprosyła zajimcow na přednošk z temu „Biotop ke chłóšćenju – sadowa­ łuka“.

Zahrodniski inženjer Holger Weiner w swojim přednošku z mnohimi fotami nazornje předstaji, zo słušeja sadowe łuki k wosebje škitanym biotopam. Tele skićeja žiwjenski rum za njeličomne družiny rostlin a zwěrjatow. Nic naposledk přinošuja rozsudnje k typiskemu krajinowemu wobrazej. Je tuž wažne, tajke sadowe łuki zachować, zo móhli so přichodnym generacijam dale dać a zo bychu so tajke stare družiny sadowych štomow zdźerželi.

Wulke problemy nadróžny wobchad zmištrować, měješe dźensa připołdnju 76lětna wodźerka Mercedesa w Brětni-Michałkach pola Wojerec. W lěwej křiwicy zhubi wona z dotal njeznateje přičiny kontrolu nad swojim dosć drohim awtom, jědźeše runu smuhu přez dwě priwatnej ležownosći a prasny skónčnje do sćěny jednoswójbneho domu. Při swojim njezbožownym manewrje skóncowa wona drjewjany płót, wjacore štomiki kaž tež žiwy płót. Tež na Mercedesu nasta tójšto wěcneje škody. Wodźerku awta dowjezechu snadnje zranjenu do chorownje. Foto: Christian Essler

Worklečanske volleyballistki přihotuja so tuchwilu na prěni domjacy hrajny dźeń we wobwodnej klasy, kotryž změja sobotu w Ralbičanskej sportowni. Wot 10 hodź. hraja Dźiwje micki přećiwo tabulkowym susodkam VV Žitawy 09 III a po tym přećiwo młodym volleyballistkam z Hamora-Běłeje Wody. W 14 hodź. hraja potom Worklečanscy Młodźi dźiwi, kiž su načolnik wobwodneje ligi, přećiwo OSC Lubijej a wot 16 hodź. rěka kontrahent Vfb Zhorjelc. Wo ćělne derjeměće je cyły čas starane. Foto: Melanie Spiesec