Z wudaća: póndźela, 20 februara 2017

800 nowych mištrow

Drježdźany. W Sakskej je loni 800 rjemjeslnikow swoje mišterske pruwowanje złožiło. Najebać woteběrace ličby wostanje mišterske wopismo njeparujomny pječat kwality, zdźěli dźensa sakski rjemjeslniski zwjazk. Mjez absolwentami bě 108 žonow, jasnje mjenje hač 2015 (144 žonow). Wot lěta 1990 su w Sakskej 38 200 mišterskich wopismow přepodali. Wjace hosći w młodownjach

Kamjenica. Młodownje w swobodnym staće su dale woblubowane. Loni móžachu tam 352 000 přenocowanjow zličić, sydom procentow wjace hač lěta 2015. Jednaćel zwjazka młodownjow Alexander Ladwig je sej wěsty, zo je wuspěch młodownjow tež wuslědk noweho wu­směrjenja na dowol, kotryž dźeń a wjace ludźi doma přežiwja.

Jubilej „Jizerskeje padesátki“

Liberec. „Jizerská padesátka“, najwu­znamniše čěske wubědźowanje w sněhakowanju na dołhich čarach, je kónc tydźenja 50. róčnicu docpěła. Popularny masowy běh na 50 kilometrow po Jizerskich horinach wotmě so lětsa při njewšědnje dobrych wuměnjenjach. Běh je wot lěta 1999 tež dźěl swětoweje sněhakowarskeje serije Worldloppet.

Pjate złoto za Dahlmeier

47. sezona Serbskopazličanskeho karnewaloweho towarstwa je so sobotu wječor z prěnim kapičkowym wječorom w Njebjelčanskej „Bjesadźe“ zahajiła. Rada jědnatkow, škričkowa garda a princowski por zaćahnychu k staroznatym zynkam na žurlu. Hosćo dožiwichu wotměnjawy program, za kotryž běchu karnewalisća zaso wjele prócy nałožili (hlej 4. stronu). Foto: A. Krječmarjowa

Předstajenje a wuznam serbskich medijow za Serbow we Łužicy běštej jedyn z hłownych dypkow diskusijneho wječorka Towarstwa přećelow Serbow w Praskim Serbskim seminarje.

Financowanje wobnowjeneho Serbskeho muzeja Choćebuz dale njejasne

Choćebuz (SN/CoR). Pomału, ale krok po kroku přetwar Choćebuskeho Serbskeho muzeja postupuje. Tak su twarske naprawy, kotrež běchu loni w lěću planowane, hakle nazymu zahajili.

Spočatk minjeneho lěta bu muzej skónčnje zawrjeny – po tym zo běchu to hižo 2014 wotpohladali. Po wjace hač 20 lětach wobstaća bě trjeba, dom dokładnje modernizować. Tehdy so hišće nadźijachu, dom ze znowa koncipowanej stajnej wustajeńcu w lěće 2015 zjawnosći spřistupnić móc. Dyrbjachu pak twarski staw domu dokładnišo přepytować dać, štož je předewzaće podlěšiło. Wot lońšeho septembra pokazuja jako přechod w Choćebuskim měšćanskim wosebitu wustajeńcu z drohotnymi eksponatami ze Serbskeho muzeja pod hesłom „Zachowane drogotki – Bewahrte Kostbarkeiten“.

Serbska wyša šula Ralbicy pokročuje w swojim UNESCO-projekće „Načasne ratarstwo mjez hospodarskosću a wnuč­kokmanosću“. W tymle šulskim lěće rozestajeja so šulerjo z prašenjom: Kak ratarstwo klimu wobwliwuje?

Ralbicy (SN/MiR). Hižo w zašłych lětach su so šulerjo UNESCO-skupiny na kubłanišću z tym zaběrali, kak so rozdźělne wašnje ratarjenja na žiwjenje čłowjeka wuskutkuje. „Nowy aspekt europskeho projekta, kotryž wěnuje so změnje klimy, dotalnu wědu a nazhonjenja našich šulerjow na tymle polu rozšěrja“, praji šulski koordinator za UNESCO-dźěło Michał Wałda. „Projekt wobswětla produkciske metody načasneho ratarstwa a jich wuskutki na swětowu klimu.“

Hižo třeći raz w hrajnej dobje je NSLDź swójby ćěkancow a domoródnych minjeny pjatk na zetkawanske popołdnjo do Dźiwadła na hrodźe přeprosyło. Znowa steješe hłowna proba noweje produkcije rjadu „Powědanja ze swěta“ na programje, tónraz poda so klankodźiwadźelnica Michelle Bray z publikumom do Afriki. Po inscenaciji mějachu zajimcy hišće dosć chwile so rozmołwjeć, sej mysle wuměnjeć, paslić a sej hrajkać. Foto: Carmen Schumann

Choćebuz/Slepo (SN). Kritikarjo brunicowych jamow a wot nich potrjecheni z Braniborskeje a Sakskeje chcedźa so njedźelu po jutrach, 23. apryla, zaso w Slepom a Rownom zetkać. Zwjazkarstwo „Strukturnu změnu nětko – žane Wochozy II“ na zarjadowanje přeprošuje, kaž zwjazkowe kontaktnišćo brunica Zeleneje ligi dźensa informuje. Wobdźělnicy zetkaja so w 13.45 hodź. při dwórnišću w Slepom a kroča potom na Rownjanske sportnišćo. Tam budźe manifestacija.

„Naše wsy su přeškoda, zo je jako jednansku masu mjez wuhlowej lobby a zwjaz­kowym knježerstwom znjewužiwaja“, rjekny Rownjanka Edit Pjenkowa. Na předewzaće LEAG znowa apeluja so wšěch planow za nowe jamy wzdać.

Zwjazkarstwo skedźbnja na njedawno wozjewjenu rozprawu Němskeho instituta za hospodarske slědźenje (DIW), w kotrejž je rěč wo tym, zo samo w při­zwolenych jamach wuhlo njewudobywane wostanje, zwoprawdźi-li so wot zwjazkoweho knježerstwa wobzamknjeny plan za škit klimy. Politika měła wuzamknyć, zo so dalše jamy přizwola, sej DIW w rozprawje žada.

Berlin/Brüssel (dpa/K/SN). Bayerski financny minister Markus Söder (CSU) je za to, Grjekskej jenož hišće pod wěstymi wuměnjenjemi pjenježnje pomhać. Nowe miliardy směł Athen jenož potom dóstać, hdyž je wšitke reformy zwoprawdźił. Ale tež potom, měła pomoc sydać jeno za zastawk (Pfand), w podobje hotowych pjenjez, złota abo imobilijow. Kandidat SPD na kanclerstwo Martin Schulz warnuje porno tomu před nowej eskalaciju grjekskeje krizy.

Dźěłowe městna wohrožene

Frankfurt n. M. (dpa/SN). Přewzaće awto­twarca Opel přez francoski koncern Peugeot-Citroën budźe z masiwnym wottwarom dźěłowych městnow zwjazane. Wo tym je awtomobilowy fachowc Ferdinand Dudenhöffer na Duisburgsko-Essenskej uniwersiće přeswědčeny. Dudenhöffer je sej wěsty, zo je při přewzaću koncerna třećina wšitkich 19 000 dźěłowych městnow Opela w Němskej wohrožena. Na tym tež přilubjenja ničo nje­změnja, zo su dźěłowe městna hač do kónca lěta 2018 najprjedy raz zawěsćene.

Gauck: Tři procenty trěbne

Sobudźěłaćerjo Drježdźanskich techniskich posłužbow wotstronichu dźensa dopoł­dnja na Nowych wikach sakskeje stolicy transparent a chorhoj prawicarskoekstremistiskeho Identitarneho hibanja při skulpturje „Monument“, kotruž bě syriski wuměłc Manaf Halbouni stworił. Čłonojo wot wustawoškita wobkedźbowaneje skupiny běchu chorhoj rano připrawili, a to w interneće publikowali. Foto: dpa/Sebastian Kahnert

Brüssel (dpa/K/SN). Na kóncu swojeje prěnjeje wuprawy do Europy zetka so ameriski wiceprezident Mike Pence dźensa w belgiskej stolicy z načolnymi politikarjemi Europskeje unije a NATO. Zastupnik prezidenta Donalda Trumpa porěča dopołdnja z prezidentom Rady EU Donaldom Tuskom. Po tym zetka so ze zamołwitej za wonkowne naležnosće EU Federicu Mogherini, z prezidentom komisije EU Jeanom-Claudeom Junckerom a z generalnym sekretarom NATO Jensom Stoltenbergom. Po Mnichowskej wěstotnej konferency, na kotrejž bě Pence rěčał, wopyta wón wčera něhdyše koncentraciske lěhwo Dachau sewjernje Mnichowa.