Z wudaća: srjeda, 15 měrca 2017

Choćebuz (HA/SN). W Domowinskej župje Delnja Łužica móža so nad nowymaj čłonskimaj cyłkomaj wjeselić. Přistupiłoj stej spěwne ćěleso Delnjoserbski sekstet z předsydku Katju Donatojc z Prjawoza kaž tež Studnja – serbske kulturne towarstwo, kotremuž Robert Engel z Choćebuza předsyduje. Pod přikleskom buštej cyłkaj na župnej hłownej zhromadźiznje minjeny pjatk w Turjeju oficialnje při­wzatej. Delnjoserbski sekstet ma tuchwilu jědnaće sobustawow, Studnja sydom. Jeho čłonojo staraja so jako kulturni managerojo wo najwšelakorišu kulturnu zaběru dźěći a młodostnych.

Pomnik priwatneje iniciatiwy, běrowowe a hospodarske twarjenja předewzaća Reclay forest kaž tež wobzamknjenje lětušeho etata běchu temy wčerawšeho posedźenja Raworskeje gmejnskeje rady.

Po mnohich lětach su tele dny započeli, nowy wodowód za pitnu wodu mjez Běłej Wodu a Hamorom twarić. Prěnje 80 metrow plastikoweje roły z přeměrom 45 centimetrow su specialisća z Coswiga paralelnje k zwjazkowej dróze B 156, blisko zajězda do dnjowych připrawow Rychwałdskeje jamy, hromadźe skowali. 20kilometrowski wodowód kładu w dwěmaj wotrězkomaj. W Běłej Wodźe je Choćebuska firma dźěłać započała. Kónc nowembra ma wšitko dotwarjene być. Foto: Joachim Rjela

Budyšin (SN). Na mortwym ptaku kosćełamaku při Łazowskim zběrniku zwě­sćichu 10. měrca pjeriznowu mrětwu. W tymle zwisku postajene zawrjene pasmo w Budyskim wokrjesu wupřestrěwa so po njewobtwarjenych płoninach mjez druhim na arealu wojerskeho zwučowanišća Hornja Łužica, na přirodoškitnej kónčinje při wuchodnej mjezy gmejnow Sprjewiny Doł a Łaz runje tak na wulkich wotrězkach wokoło Łazowskeho zběrnika. Na to skedźbnja Budyski krajnoradny zarjad w nowinskej zdźělence. Zdobom bu wobkedźbowanske pasmo zarjadowane, kotremuž přisłušeja wšitke dźěle mjenowaneju gmejnow, kotrež njejsu wobstatk zawrjeneho pasma.

Porno tomu su škitne naprawy we wobłuku Njedźichow z powšitkownym postajenjom wot 12. měrca zběhnjene, kaž krajnoradny zarjad wčera wozjewi.

Za wjesny dźěl gmejny Rakecy Kaču Korčmu 28. februara změnjene zawrjenske postajenje dale płaći.

Pjerizna a plahowane ptaki maja dale bjez wobmjezowanjow zawrjene wostać.

Frankfurt nad Mohanom (dpa/SN). Po lěta trajacym tarifowym konflikće z pi­lotami předewzaća Lufthansa je nětko k wujednanju dóšło. Dotal běchu piloća 14 króć dźěło złožili. We wšitkich dypkach su so piloća a Lufthansa ze zastupjerjemi dźěłarnistwa Cockpit dorozumili, zdźěli dźensa lětanska towaršnosć. Dojednanja wo mzdach a zawodnych rentach płaća hač do junija 2022.

Racija w Audi-centrali

Ingolstadt (dpa/SN). Mnichowske statne rěčnistwo je dźensa rumnosće centrale awtotwarca Audi přepytało. Pozadk toho je wotpłunowy skandal. Audi bě w USA dieselowe awta z ilegalnej software předawał, kotraž hódnoty wotpłuna pomjeńša. Njeposrědnje po wotkryću skandala w USA bě Mnichowske statne rěčnistwo pruwowanske jednanje zahajiło. Rěčnik koncerna Audi nochcyše so dotal k wumjetowanjam wuprajić.

16 miliardow eurow minusa

Něhdźe 850 předewzaćow po cyłej Sakskej tónle tydźeń za akciju „Pohladaj nutř“ šulerjam­ swoje durje wotwěra. Lětsa su to wosebje zarjady a wjetše firmy, kaž Bu­dyski zawod Edding, produkciske stejnišćo předewzaća V.D. Ledermann & Co. Tam poby dźensa statny sekretar hospodarskeho ministerstwa Stefan Brangs (SPD, 2. wotprawa). Zwjesela, zo je so za lětušu akciju 30 procentow wjace šulerjow při­zjewiło hač loni. Foto: SN/Maćij Bulank

Den Haag (dpa/K/SN). W Nižozemskej ma dźensa něhdźe 13 milionow woby­dlerjow nowy parlament wolić. Wuslědk wotuma wočakuja z njemałej napjatosću, je drje po poslednich woprašowajach prawicarskoliberalna strona VVD premiera Marka Rutteho słabje faworizowana, prawicarscy populisća Geerta Wildersa su pak jej njeposrědnje na pjatach. Prawdźepodobnje dóńdźe k změnje knježerstwa, dokelž dotalna wulka koalicija z VVD a socialdemokratow njemóže drje hišće jónu trěbnu wjetšinu wočakować. Eksperta němskeje CDU za wonkowne naležnosće Norbert Röttgen měni, zo by za Europsku uniju žałostne konsekwency měło,­ bychu-li prawicarscy populisća w Nižozemskej parlamentne a naslědnje w Francoskej prezidentske wólby dobyli.

24hodźinsku jězbu z awtom na so wzałoj staj čłonaj Domu reprezentantow USA, dokelž njemóžeštaj sylneho sněhowanja a wichora dla z lětadłom lećeć. Wostudło pak jimaj njebě, wšako wusyłaštaj swój roadtrip w interneće. Tak powědaštaj republikan a demokrat na 2 575 kilometrow dołhej jězbje wo politiskich temach, reagowaštaj na komentary a wotmołwještaj na prašenja zajimcow.

Zo prominentni přećiwo nowemu prezidentej USA wustupuja, njeje žane potajnstwo. Tajkej přećiwnikaj Donalda Trumpa staj mjez druhim filmowc Robert de Niro a spěwarka Madonna. A dalši so jimaj nětko přidruža, rap-spěwar Snoop Dogg. W scenje swojeho noweho hudźbneho wideja třěli wón z brónju na klawna,­ kiž je Trumpej podobny. Z brónje pak njewutřěli kulku, ale chorhojčku z napisom „Bang“.

Mnichow/Moskwa (dpa/K/SN). Bayerski ministerski prezident Horst Seehofer (CSU) je na třidnjowskim wopyće w Moskwje. Jeho přewodźeja delegacija wosobinow z politiki, hospodarstwa a wědomosće kaž tež zastupnicy medijow. Wjeršk budźe jutře zetkanje z prezidentom Wladimirom Putinom w Krjemlu. Zaměr Seehoferoweje wuprawy je, polěpšić poćahi mjez Bayerskej a Ruskej na polach hospodarstwa, wědomosće, kultury, kubłanja a ratarstwa. W časach wužadanjow nastu­pajo wěstotu na swěće krizow a wójnow ma Seehofer za njepa­rujomne, wostać w rozmołwje. Wězo dyrbja tež Rusojo něšto za to činić, šef CSU dodawa.

Praha (ČŽ/K). Čěska socialdemokratiska strona ČSSD je w morawskej stolicy Brnje swój stronski zjězd wotměła. Wuznamny je wón za nju předewšěm tohodla był, zo su na dnjowym porjedźe stali wólby předsydstwa a k tomu nowy dlěšodobny program. Kaž wočakowane, su dotalnemu předsydźe ČSSD Bohuslavej Sobotce zastojnstwo znowa dowěrili. Wón dósta dwě třećinje hłosow – 460 delegatow wupraji so za njeho, 201 přećiwo njemu. Sobotka­ rjekny: „Sym spokojom.“ Před lětomaj bě nětčiši ministerski prezident hišće 85 procentow přihłosowanja delegatow nažnjał. Za jeho prěnjeho naměstnika wuzwolichu přitomni nutřkowneho ministra Milana Chovaneca.