Z wudaća: pjatk, 17 měrca 2017

Budyski Kamjentny dom je lětsa srjedźišćo sakskeho krajneho wubědźowanja „Młodźina hudźi“, kotryž so tam tónle a přichodny kónc tydźenja wotměje. Rady su młodym hudźbnikam, kaž tule bubnarjomaj Christophej a Michelej Sprengerej z Drježdźan (nalěwo a naprawo), sobudźěłaćerjo domu – mjez nimi technikar Andreas Krampf – poboku. Foto: SN/Maćij Bulank

Cordula Ratajczakowa

Hač starosće wo dźěći, kotrež su snano wot prawicarjow wohrožene, hač wobraz wo ossijach-přěhračkach a wessijach-dobyćerjach abo Łužica jako drje woblubowana, ale hospodarsce słaba domizna – wšelakore běchu nastorki, wo kotrychž su přihladowarjo po serbskej premjerje krucha Olivera Bukowskeho „Za brězami“ minjenu sobotu w NSLDź diskutowali. Zo pohnuwa dźiwadłowa inscenacija k rozmyslowanju, je derje, a hdyž to hišće na zabawne wašnje čini – kaž w tym padźe –, ćim wjace ludźi wona docpěwa.

Hinak hač film w kinje je dźiwadło zhromadne dožiwjenje hrajerjow a přihladowarjow. A hdyž maćizna krucha k tomu hišće zhromadny swět a stawizny wotbłyšćuje – kaž tule pytanje łužiskeje swójby po přewróće za wuspěšnymi přežiwjenskimi strategijemi –, so poćah hišće bóle zesylni. Ći horjeka na jewišću powědaja nam deleka w křesłach wo něčim, štož su zdźěla sami dožiwili, a my wěmy, wo čo dźe – dźiwadłowa hra wo nas za nas, a to z našimi hrajerjemi. Što móžeš sej wjace přeć?

Wobchadnej zwjazkaj zjednoćić hižo dawno planowane

Budyšin (SN/mwe). Budyski wokrjes je do dweju wobchadneju zwjazkow dźěleny: Stej to wobchadny zwjazk Hornje Łobjo (VVO) a zaměrowy zwjazk Hornja Łužica-Delnja Šleska (ZVON). Tale w Němskej skerje rědka situacija měła so po žadanju Budyskeho wokrjesneho zwjazka CDU pruwować. To rěka, zo dyrbjałoj so VVO a ZVON pod wobkedźbowanjom swojich strukturnych rozdźělow skónčnje na zjednoćenje přihotować.

Předpředań za lětuše Budyske lětnje dźiwadło „Olsenowa cwólba wupućuje“ zahaji so 8. apryla w 11 hodź. w Budyskim NSLDź. Za šěsć tydźenjow trajacy spektakl pod hołym njebjom na Hrodźe stara so dźiwadło tónraz wo wjace městnow za přihladowarjow.

Budyšin (SN/CoR). Hišće so předpředań za 22. Budyske lětnje dźiwadło započała njeje, naprašowanjow pak je Němsko-Serbske ludowe dźiwadło hižo tójšto měło. „Hačrunjež bychmy hižo móhli, žane zastupne lisćiki do oficialneho starta předpředanje 8. apryla njepředawamy“, rozłoži medijowa rěčnica NSLDź Gabriele Suschke na wutornej nowinarskej konferency.

Hórčanska Wehnertec dróhotwarska firma je nadawk znowaplestrowanja pućikow na Chróšćanskim kěrchowje přewzała, wo čož so mjez druhim Jens Lehmann z Budyšina stara. Poprawom chcychu z plestrowanskimi dźěłami hižo 1. měrca hotowi być, hubjeneho wjedra dla pak njemóžachu termin dodźeržeć. Na kěrchowje maja tele dny tež přiwuzni zemrětych ruce połnej dźěła, zo bychu do jutrow rowy swojich lubych z macoškami a druhimi kwětkami rjenje zwosadźeli. Foto: Feliks Haza

Budyšin (SN/at). Město Budyšin wobdźěli so znowa na wubědźowanju „Rěčam přichilena komuna“. Wo tym je sej dźěłowy kruh za serbske naležnosće měšćanskeje rady přezjedny. Na posedźenju gremija předwčerawšim w radnicy zdźěli jeho předsydka dr. Susanne Hozyna, zo wobdźělenske podłožki předleža.

Nětko dźe wo to, wuwić skutkownu ideju, z kotrejž so město předstaja. „Što stanje so we wubědźowanskej fazy w Budyšinje?“, prašeše so Wolfgang Zettwitz z měšćanskeho zarjadnistwa. Wón ma hižo nazhonjenja w tym nastupanju a namjetowaše, poradźowansku skupinu wutworić. Tež prěnje mysle je hižo mjenował, kaž na přikład wotpohladanu idejowu konferencu měšćanskeje rady wo němsko-serbskej zhromadnosći abo wuznam serbskeho zastupnistwa. Zajimawe je zdobom zhonić, što wokolne gmejny w tym nastupanju wot města Budyšina wočakuja, Zettwitz rjekny.

Dr. Susanne Hozyna namołwi Budyšanow, zo bychu woni pytanje ideje ze swojimi namjetami wobohaćeli.

Rostock (dpa/SN). Šef frakcije Lěwicy w zwjazkowym sejmje Dietmar Bartsch žada sej wuchodne ministerstwo. 27 lět po politiskim přewróće je hišće mnoho rozdźělow mjez wuchodom a zapadom Němskeje. Jako přikłady mjenuje wón w dźensnišim wudaću­ Ostsee-Zeitung hospodarstwo, mzdy, renty a infrastrukturu. Nowe ministerstwo měło wšitko hromadu wjesć. Mjenowane žadanje je jedyn ze zaměrow, kotrež chcył Bartsch, nastanje-li po wólbach zwjazkoweho sejma­ 24. septembra koalicija z SPD, zwoprawdźić.­

Memorandum podpisałoj

Moskwa (dpa/SN). Bayerska a Ruska chcetej přichodnje nastupajo kulturne dźěło wušo hromadźe dźěłać. Na to dojednaštaj so dźensa bayerski kultusowy minister Ludwig Spaenle (CSU) a jeho ruski­ kolega Wladimir Mjedinski w Mo­skwje. Wobaj podpisaštaj memorandum wo spěchowanju we wobłukach hudźba, dźiwadło, reja, film, tworjace a dekoratiwne wuměłstwo, wuměna wustajeńcow a škit kulturneho herbstwa.

Israel Syrisku nadpadnył

Naprašowanje za mało znatym topinamburom dale a bóle přiběra. Rědka zelenina rosće mjez druhim tež na honach błótowskeho biozawoda Schöneiche w Błótach. Hišće pak su pola přewłóžne, zo móhli tam žně zahajić. Jednaćel Christoph Frehn wjeseli so na mnohe dule topinambura a je hižo raz někotre z nich wurył. Foto: dpa/Patrick Pleul

Berlin (dpa/K/SN). Zwjazkowa ministerka za hospodarstwo Brigitte Zypries (SPD) radźi, na hroženja prezidenta USA z „America first“ sćerpliwje reagować. „Wuchadźam z toho, zo Donald Trump njeje resistentny napřećo dobrym radam“, ma wona za to. Kanclerka Angela Merkel (CDU) jemu zawěsće něšto rjeknje, hdyž so dźensa z nim we Washingtonje zetka. Trump bě jako prěni prezident připowědźił, z protekcionizmom a chłostanskimi cłami USA dowjesć zaso na čoło swěta. A jeli wón chłostanske cła woprawdźe zawjedźe, ma Zypries přeco hišće tež skóržbu před swětowej wikowanskej organizaciju WTO za móžnu. „A to njeby prěni raz było, zo Donald Trump na sudnistwje zwrěšći“, ministerka­ přispomni.

Dźakowano socialnej syći móžeše indiska železnica zašły kónc tydźenja hłódnemu ćěšenkej pomhać. Jej bu zdźělenka žony posrědkowana, kotraž bě w ćahu wobkedźbowała, kak młoda mać sobujěducych podarmo wo trochu mloka za swoje pjeć měsacow stare dźěćko prosy. Tak napisa z pomocu twittera próstwu ministerstwu, kotrež hnydom reagowaše a próstwu železnicy dale pósła. Hižo hodźinu pozdźišo přepodachu maćeri na dwórnišću čerstwe mloko.

7,44 karatow ćežki diamant na swójbnym wulěće namakał je 14lětny młodostny w ameriskim Arkansasu. Rědki eksemplar w hódnoće něšto tysac eurow chce sej pachoł wězo zdźeržeć.