Z wudaća: wutora, 18 apryla 2017

Ćisk (HH/SN). Dźěći mějachu wjeselo, hdyž móžachu sobotu na Ćišćanskim Kasperec­ dožiwjenskim statoku jejka wóskować. Wšako bě so dožiwjenska bróžnja na „jutrownu jejkadebjensku dźěłarnju“ přeměniła. Serbowka Doris Kasperec holcam a hólcam na zrozumliwe wašnje wujasnjowaše, kak jejka prawje wóskuja. Mnoho swójbow bě so sobotu na statok podało, zo bychu so zhromadnje na jutry přihotowali. „Runje tak bě to tež w našej swójbje z wašnjom. Dźensa spytam wšitkim, kotřiž su zajimowani, naše stare tradicije­ dale sposrědkować“, Doris Ka­sperec měnješe. „Jejkadebjenje słuša za nas k najrjeńšim zaběram w jutrownym času“, wona rjekny. Tohorunja w pěstowarni so pjerachojo z tym zaběraja a w Ćišćanskim dźěćacym towarstwje na debjenje jejkow rady přeprošuja. Doris Kasperec­ je towarstwo před dźewjeć lě­tami załožiła.

wozjewjene w: Łužica
wutora, 18 apryla 2017 14:00

Pokiwaj (18.04.17)

Porěči wo Pückleru

Slepo. Wjerch Pückler a jeho poměr k Serbam je tema zarjadowanja jutře, srjedu,­ w 15 hodź. w Slepjanskim Serbskim kulturnym centrumje. Na přednošk Wernera Měškanka w němskej rěči přeprošuje Choćebuska Šula za delnjoserbsku rěč a kulturu. Zastup płaći 4,50 eurow.

Dožiwjenje za swójby

Pančicy-Kukow. Zazběh lětušich zarjadowanjow w zežiwjenskim a zelowym centrumje klóštra Marijina hwězda w Pančicach-Kukowje budźe jutře, 19. apryla, wot 13 do 17 hodź. swójbny dźeń. Wopytowarjo budu so klóšterske sotry za jich žiwjenjom prašeć, wosebite klóšterske nudle zhotowjeć a swěčki debić móc. Hórčanski wowčer Gerat Šmit a Wojerowska dźěćaca a młodźinska farma wěstaj wjele wo domjacym skoće powědać, fyzioterapeutka Angelika Thiele předstaji swój nalětni fitnesowy poskitk.

wozjewjene w: Pokiwy
wutora, 18 apryla 2017 14:00

Policija (18.04.17)

Nurjaka mortweho namakali

Kamjenc. Přičina, čehodla je 58lětny nurjak z Drježdźan při nurjenju w Kamjenskej skale kónc tydźenja swoje žiwjenje přisadźił, dotal jasna njeje. Slědźenja kriminalneje policije dale traja a rjec so njehodźi, hač bě so nurjak w 60 metrow hłubokej wodźiznje ćělnje přenapinał.

Palacy so traktor zhašeli

Lubnjow. W Lubnjowje (Liebenau) pola Kamjenca su wohnjowi wobornicy z Brunowa (Brauna), Hlinka (Cunnersdorf) a Kamjenca sobotu nawječor palacy so traktor zhašeli. Čehodla pak bě so jězdźidło na łuce stejo nimale dospołnje wupaliło, dotal hišće jasne njeje.

Kontejner w płomjenjach

Mały Wosyk. W Małym Wosyku pola Porchowa je wčera w nocy něchtó drastu w drastowym kontejneru zapalił. Wěcna škoda wučinja něhdźe 1 500 eurow.

wozjewjene w: Policija

Serbska debata

nowostki LND