Kóžde lěto spočatk meje wotměwa so w Budyšinje korčmowy swjedźeń. Mjeztym zo bě to w 90tych lětach wulke zarjadowanje cyłeho města, je wone dźensa trochu mjeńše, ale jara rjane.
Budyšin (SN/MWj). Hižo 13. raz wotměje so 6. meje Budyski korčmowy swjedźeń w swojej tuchwilnej formje. Na njón přeproša towarstwo Staroměšćanska tejka, w kotrymž su gastronomojo zjednoćeni. Tónraz wobdźěli so 13 korčmow, dwě mjenje hač loni, zdźěli dźensa rěčnik towarstwa a mějićel bary „Caracas“ André Herold. Mjeztym zo so towarstwo wo wabjenje z banerami a flajerami stara, rozhladuje so kóždy wobdźěleny korčmar w swójskej režiji wo hudźbnu kapału. Paleta hudźbnych směrow saha wot popa a rocka přez folk a evergreen hač k srjedźowěkowskemu spektaklej. Wšojedne pak, kotra skupina hdźe hraje, zastup je wšudźe darmotny. Nadrobniše informacije wo skupinach su móžne pod adresu www.feiern-in-bautzen.de.
Bukecy (CS/SN). Dźakowano spěchowanskemu programej „Mosty do přichoda“ móže Bukečanska gmejna problem parkowanskeje situacije wokoło swojeho šulskeho terena rozrisać. Wot planowaneje cyłkowneje sumy něhdźe 200 000 eurow dóstanu 141 000 eurow jako spěchowanje, potajkim 75 procentow. Wjele chwile, swoje plany zwoprawdźić, pak nimaja. Na tamnym boku, tak diskusija na zašłym posedźenju gmejnskeje rady pokaza, přeja sej gmejnscy radźićeljo dołhodobnje kmane rozrisanje. Tohodla wuwi so horca, ale tež konstruktiwna diskusija wo namjeće, kotryž bě Budyska planowarka Beate Hübner předpołožiła. Dojednali su so skónčnje na wariantu, kotruž ma inženjerka nětko pruwować a přesadźić.
Budyšin (CK/SN). W jobcenteru Budyskeho wokrjesa bě kónc minjeneho lěta 20 529 přijimarjow Hartza IV registrowanych, z toho 15 589 w dźěłakmanej starobje. Kaž z nětko předstajeneje statistiki wuchadźa, je to 2 000 mjenje hač w lěće 2015 a samo 8 000 mjenje hač před pjeć lětami. Jako přičiny toho mjenuje nawoda jobcentera Mathias Bielich dobre hospodarske wuwiće a demografiske efekty. Tak so kóžde lěto 500 přizjewjenych žonow a muži na wuměnk poda, praji šef zarjada.
Kubšicy (CS/SN). Ze swojimi 70 městnami je Kubšiski sportowy dom jako zarjadowanska městnosć jara požadany, a to nic jenož mjez čłonami tamnišeho sportoweho towarstwa. Na swojim zašłym posedźenju je Kubšiska gmejnska rada wobzamknyła, twarjenje energetisce saněrować. Naprawu móža zwoprawdźić, dokelž je Sakska natwarna banka próstwje wo spěchowanske srědki přizwoliła. Cyłkownu twarsku sumu něhdźe 100 000 eurow dóstanu po 50 procentach spěchowanu. Twarić započeć chcedźa po 24. kalendrowym tydźenju, potajkim srjedź junija. Do toho pak přewjedu swój sportowy swjedźeń. Twarske dźěła na fasadźe a na třěše kaž tež klempnarske dźěła su mjeztym wupisane.
Čornje jěł a dospołnje wopity
Budyšin. Zastojnicy zwjazkoweje policije su wčera popołdnju w Budyšinje dospołnje wopiteho muža z ćaha ze Zhorjelca do Drježdźan wjedli. Sobudźěłaćerka železniskeho předewzaća Trilex bě hižo za čas jězby policiju informowała, zo so 39lětny sobujěducy lědma na nohomaj dźerži a zo nima jězdźenku. Jako ćah w Budyšinje zasta, zastojnicy muža hižo wočakowachu. W njeho kreji naměrichu pozdźišo 3,9 promilow alkohola.
Warnuja před jebanstwom
Budyšin. We wjacorych padach su njeznaći minjeny tydźeń spytali staršich ludźi telefonisce zjebać a jim pjenjezy wulišćić. Na zbožo pak w žanym padźe k přepodaću pjenjez dóšło njeje. Cuzy so jako policisća abo statni rěčnicy wudawachu a powědachu, zo bu pječa padušna cwólba zajata, pola kotrejež namakachu debjenki a pjenjezy. Nětko chcychu w bydlenju zazwonjenych wosobinsce pruwować, hač bu pječa namakana rubizna tam pokradnjena. Policija wuraznje warnuje, na tajke telefonaty reagować a radšo hnydom zdźělić, hdyž něchtó na tele wašnje zazwoni.
Knižne předstajenje
Budyšin. Składnostnje 75. posmjertnin delnjoserbskeho basnika Fryca Rochi předstaja štwórtk, 27. apryla, w 19.30 hodź. w Budyskej Smolerjec kniharni jeho knihu „A pó zemi libju te strusacki“. Z njeje čitaja wudawaćel Pětš Janaš, Marja Elikowska-Winklerowa a Katrin Urbanscyna.
Porěča wo kubłanju
Chrósćicy. Dźěłowy kruh SPD „Serbja“ přewjedźe zjawne zarjadowanje zajutřišim, štwórtk, w 19 hodź. w Chróšćanskim Krawčikec hosćencu. Tam chcedźa sej wutworić poziciju wo naležnosći nuznje trěbneho koncepta za wukubłanje serbskeho wučerskeho dorosta. Zawodne mysle poda předsydka Serbskeho šulskeho towarstwa Ludmila Budarjowa. Na zarjadowanju wobdźěli so tohorunja šulskopolitiska rěčnica frakcije SPD w Sakskim krajnym sejmje Sabine Friedel. Wšitcy zajimcy su přeprošeni.
Forum wo Trumpje a cyrkwi
FSV Budissa Budyšin
– 1. FC Lok Lipsk 2:1 (0:1)
Zestawa domjacych: Große – Kolan, Patka, Hausdorf, Heppner, Salewski (88. Němec), Hoßmang, Kloß, Müller (59. Hermann), Rosendo, Barth (77. Iliadis)
W druhej z třoch hrow w tak mjenowanym jendźelskim tydźenju wočakowaše Budissa na Młynkec łuce koparjow 1. FC Lok Lipska. Team trenarja Torstena Gütschowa běše sej předewzał skónčnje raz dobyć. Pavel Patka móžeše ze škitnej masku w mjezwoču domjacemu škitej trěbnu stabilitu dać. We wrotach steješe tónkróć Marek Große a pokaza přeswědčiwy wukon. Kaž hižo často startowaše Budissa derje do hry a měješe prěnje móžnosće, nawjedowanje docpěć. Daniel Barth pak njemóžeše přetworić. Přichodnu wrotowu scenu bě Barth spřihotował, wotpołožiwši bul Ezequielej Horacijej Rosendźe, kiž jón nimo wrotow třěli. Hosćo swoju prěnju składnosć hnydom wužichu. Daniel Becker docpě 0:1 (22.) ze 16 metrow. Znowa běchu Budyšenjo po někotrych dobrych šansach w zastatku.