FSV Budissa Budyšin
–BFC Dynamo 0:4 (0:0)
Zestawa domjacych: Große – Heppner, Hoßmang, Hausdorf, Hänsch, Hermann (65. Müller), Kolan (61. Šisler), Kloß, Salewski (83. Barnickel), Rosendo, Žuljević
Do hry buchu wjacori koparjo Budissy Budyšin rozžohnowani: Maik Salewski, kapitan Martin Kolan, Patrick Baudis, Daniel Barth, Theocharis Iliadis a Norman Wohlfeld. Po tym drje chcyše so Budissa swojim swěrnym fanam porjadnje prezentować, štož pak so jej scyła njeporadźi. Hosćo hru wot spočatka postajachu, a Budyšenjo móžachu wjeseli być, zo so přećiwnikej w prěnim połčasu žane wrota njezešlachćichu.
Krótko po połčasu BFC nawjedowaše (47.). A we 58. min. rěkaše třělc wrotow znowa Kai Pröger. BFC nětko žane štomy zwutorhać njetrjebaše, dokelž so hosćićel cyle jednorje poda. To njebě žana kopańca za regionalnu ligu. Přez dwójny dyr Dennisa Srbenyja (77., 85.) bě hra doskónčnje rozsudźena. Šansu na čestne wrota měješe hišće Maik Salewski, ale Berlinski wrotar třělwu wotwobara.
We wurisanju „Młodźina trenuje za olympiju“ wotmě so minjeny tydźeń w Großröhrsdorfje regionalne finale koparkow w starobnymaj klasomaj III a IV. Šulerki 5. do 7. lětnika Serbskeho gymnazija Budyšin (SGB) startowachu mjez cyłkownje pjeć šulemi a nawróćichu so ze slěbrom a bronzu.
Starobna skupina IV (5. a 6. lětnik): Štyri šule wuchodneje Sakskeje kwalifikowachu so za regionalne finale w kopańcy holcow, jeno tři gymnazije pak běchu w Großröhrsdorfje zastupjene. Najmłódše koparki SGB startowachu přećiwo holcam, Schilleroweho gymnazija Budyšin z połnym zapalom a nawjedowachu k połčasej z 1:0 přez wrota Leticije Gust, kotraž wot dźewjećmetrowskeho dypka suwerenje přetwori. Sportowy kontrahent pak so njepoda a wuruna přez swoju najlěpšu hrajerku na 1:1. Samsna šulerka zwyši dwě mjeńšinje do wothwizdanja na 2:1. Wulkemu faworitej z Biskopic so serbske holcy mócnje wobarachu a dopušćichu jenož dwoje wrota. Wrotarka Salome Bjeńšec steješe zwjetša na prawym městnje a dalše šansy Goethoweho gymnazija znješkódni.
kónčny staw starobneje skupiny IV
Sokoł Ralbicy/Hórki II
– LSV Nowe Město 1:3 (1:1)
Zestawa domjacych: Bjeńš – Šnajder, Bogusz, Dinar, T. Matka (65. Čornak), Kobalc, Młynk, J. Matka, M. Matka, Šěn, Jakubaš
Koparske mustwo z Noweho Města nad Sprjewju ma poprawom potencial, znajmjeńša klasu wyše hrać. Wone njeje w druhej połseriji hišće žanu hru přěhrało. Wot prěnjeho wokomika přewzachu hosćo komando. Sokoljo pak derje stejachu. Prěnju stoprocentnu móžnosć njezamó přećiwnik wužić, jako pjeć metrow před wrotami bul wyše nich třěli. W 15. min. bu jedyn ze spěšnych nadběhowarjow wot Symana Bogusza w šěsnatce połoženy. Kopar z rjanym mjenom Arlilsom Do Carmo Ferreira postajenu jědnatku wěsće přetwori. Z prěnjej składnosću pak móžachu Sokoljo wurunać. Wólny kop ze 40 metrow docpě Tomaša Matku, kiž ze zadnjej hłójčku do hornjeho kuta k 1:1 přetwori (24.). Sokoljo dobywachu dale a wjac dwubojow, naspomnjenjahódne šansy pak sej njewuhrachu. Krótko do kónca prěnjeho połčasa pospyta so přećiwnik hišće raz z 20 metrow. Jurij Bjeńš w domjacych wrotach pak bul w poslednim wokomiku hišće na łatu wodźeše.
Rom (B/SN). Rjad maltezow je sej po swojej nawjedowanskej krizy noweho naměstnika wuzwolił. Wulka statna rada rjadu wuzwoli sej 72lětneho Italčana Fra Giacoma Dalla Torre za přechodneho nawodu na jedne lěto. Wón ma rjad wjesć hač k wólbam noweho wulkomištra. Předchadny wulkomišter, Jendźelčan Matthew Festing, bě po internych konfliktach w rjedźe w januaru na ćišć bamža wotstupił.
Šwicarska garda ma přirost
Rom (B/SN). Bamžowska Šwicarska garda dóstanje lětsa dosć nowych wojakow. 6. meje je we Vatikanje 40 rekrutow slub na bamža Franciskusa złožiło. Loni bě jich jeno 23 rekrutow. Bamžowscy stražnicy su minjeny čas sylnišo wo rekrutow wabili.
Najwjetše zasadźenje železnicy
Posledni mejski kónc tydźenja wotměje so lětuše 1015. Budyske nalěćo. Na wopytowarjow měšćanskeho swjedźenja čaka znowa wobšěrny program, kotryž su nowinarjam wčera předstajili.
Budyšin (CS/SN). Wot 26. do 28. meje předstaji so we wobłuku Budyskeho nalěća na třoch jewišćach něhdźe 500 wuměłcow. Kaž kulturny šef města Andreas Hennig zdźěli, budu mjez nimi stari znaći, kotřiž na swjedźenju prosće pobrachować njesmědźa, kaž kapała Jolly Jumper pjatk abo Thomas Stelzer sobotu.
Oficialne wotewrjenje swjedźenja sobotu prěni raz za to wužija, spožčić Budyski čestny wopon. Jón přijmjetaj Ellen Spengler a Reiner Löffler. Nadawk, prěni sud piwa natočić, přewozmje wyši měšćanosta partnerskeho města Heidelberga dr. Eckart Würzner (njestronjan). Partnerske město Jablonec nad Nisou prezentuje so wšitke tři dny ze stejnišćom swojeje turistiskeje informacije.
Łaz (AK/SN). Zo móhli sebje samoho lěpje zwičnić, měli turistiscy poskićowarjo Łazowskeje gmejny mjezsobu wušu syć wutworić. Tole podšmórny wjesnjanosta Thomas Leberecht (CDU) wčera jako wuslědk turistiskeho stajneho blida. Ćežišća měli być Serbja, Krabat a kolesowanje. Přeprosyła bě gmejna zastupjerjow towarstwow, hosćencow, pensijow, firmow kaž tež dalšich zajimcow.
Knižne předstajenje
Budyšin. Nowu bajkowu knihu „Das goldene Gut“ předstaja štwórtk, 18. meje, w 19.30 hodź. w Budyskej Smolerjec kniharni. Spisowaćelka Róža Domašcyna je 60 serbskich bajkow přenjesła. Mnohe z nich znaje wot swojeje wowki, wobhnadźeneje bajkarki. Nětko móža je tež němskorěčni zajimcy w zwjazku z ilustracijemi Jutty Mirtschin čitać.
Hudźba z tekstami Jurja Brězana
Budyšin. Na komornym wječoru Serbskeho ludoweho ansambla jutře, srjedu, w 19.30 hodź. w Budyskej Röhrscheidtowej bašće hudźi ćěleso Trio con moto a čita z knihi Jurja Brězana „Moja archa Horni Hajnk“. Dialog je sensibelny, zabawjacy, ale tež brizantny, z widom na łamliwosć našeho swěta, z kotrymž bjezstarostnje wobchadźamy. Hudźbnicy Hanka Tiedemann (prěčna fleta / j.h.), Bettina Witke (husle / j.h.) a Helfried Knopsmeier (violoncello) přednjesu twórby zańdźenosće a přitomnosće, kotrež chcedźa hrajo z powědančkami Jurja Brězana splesć. Čitanja budu w němskej rěči.
Prawje so požadać
Padustwo wujasnjene
Budyšin. Po tym zo su so njeznaći minjeny pjatk do banki na Budyskej Bohatej zadobyli a kompjuterowej wobrazowce pokradnyli, je policija tónle pad hišće samsny dźeń wujasniła. Podhladnaj staj Budyšanaj w starobje 20 a 21 lět. Wobaj běštaj dźeń do toho młodostneho wurubiłoj a staj policiji derje znataj.