Z wudaća: srjeda, 12 julija 2017

Poslednje lěto darmotne

Podstupim. Braniborska SPD chce dźěćom poslednjeho předšulskeho lěta wot nazymy 2018 darmotny wopyt pěstowarnje zmóžnić. Naprawa ma prěni krok po puću k dospołnje darmotnej pěstowarni być, rjekny frakciski šef SPD Mike Bischoff dźensa w Podstupimje. Opoziciska CDU žada sej porno tomu wjace personala w pěstowarnjach.

Wot jutřišeho wothłosować

Sernjany. Techniskich problemow dla njebě minjene dny móžno hłosować za hrajkanišćowu iniciatiwu Fanta, na kotrejž so mjez druhim skupina Sernjanskich staršich wobdźěla. Kaž zamołwići zdźěleja, so wothłosowanje tuž jutře, 13. julija, w 0.01 hodź. wotprědka započnje. Wothłosowanje skónči so regularnje 10. awgusta w 23.59 hodź.

„Njerjana“ zelenina popularna

Njebjelčicy (bl/SN). Mjeztym šesty raz wotměwa so tuchwilu mjezynarodny tydźeń młodźinskich dźěłarničkow w Njebjelčicach. Wot njedźele ma tamniša gmejna tuž někotrych wobydlerjow wjac. Z Čěskeje přebywaja tu z wučerku dwě holcy a třo hólcy w starobje 14 do 18 lět. Z partnerskeje gmejny Hlučín witaja młodostnych kóžde lěto znowa w Njebjelčanskej Heldec hospodźe. Wočako­wali su tež dalšich přećelow z partnerskeju gmejnow Namysłów w Pólskej a Ladánybene w Madźarskej. Z organizatoriskich přičin pak dyrbjachu woni krótkodobnje wotprajić.

Nimo wukrajnych wobdźělnikow wuhladaš na dźěłarničkach wjace hač 15 młodostnych – mjez nimi tójšto serbskich – z Njebjelčic a wokolnych wsow, z Budyšina a Biskopic. Zhromadnje woni tam nětko něšto trajneho tworja.

„Kóń je kulturne herbstwo a njesmě so ze wsow zhubić,“ měni předsyda Holešowskeho jěchanskeho towarstwa Frank Lehder. Wot 24. decembra 1999, takrjec jako hodowny dar, ma wone swoje sydło na kromje lěsa pola Holešowskeje Dubrawki. Prjedy bě tam swinjacy chlěw, kotryž su ze swójskej mocu a podpěru předewzaća Beyer z Łomska na konjenc z 25 městnami přetwarili. Bjezposrědnje pódla njeho bě polo. Mjeztym maja tam modernu jěchansku halu a jěchanišćo. Pod hesłom „tež kóń trjeba dobru zemju, zo by so derje pohibować móhł“, su samo wosebitu jěchansku zemju z wysokohódnotnym pěskom a tekstilijemi připrawili. Tež płoniny do směra na Łupjansku Dubrawku su nětko derje hladane łuki. Tak je so jedne z najmodernišich jěchanišćow na wuchodźe Sakskeje wuwiło, a to cyle na zakładźe čestnohamtskeho dźěła.

Njedawno wotmě so mjezynarodne zetkanje Syće młodych akademikarjow- sorabistow w Budyskim Serbskim instituće. 21 referentow je tam wo swojich slědźenjach rozprawjało. Někotrych tu w małym serialu předstajamy.

W štwórtej generaciji stara so Karsten Ringpfeil w Stróži pola Rakec wo nimale 400 hektarow hatow. Po maturje na Budyskim Schillerowym gymnaziju je wón na Berlinskej Humboldtowej uniwersiće rybjace hospodarstwo a wobhospodarjenje wodźiznow studował. „Najprjedy běch so na hospodarske wědomosće wusměrił. Wukonjejo ciwilnu słužbu w Njeswačanskim parku pak spóznach, zo njeje ničo rjeńše, hač so z wobhospodarjenjom hatow zaběrać.“

Budyšin (SN/JaW). Přetwar spušćadła w Nižej Wsy pola Rakec je zakónčeny. Wo tym informuje Budyski krajny zarjad rěčnych zawěrow. „Dźensa zakónčene dźěła skića lěpši škit před wulkej wodu“, rěka w nowinskej zdźělence. Tak móžachu z natwarom ekologiskeho přechoda zdobom dalše za wulku wodu strašne městno při Wojerowskej Čornicy wotstronić. Cyłkownje nałožichu 1,2 milionaj eurow za přetwar, spěchowanske srědki dóstachu z europskeho fondsa za regionalne wuwiće EFRE.

Stare spušćadło w Nižej Wsy bě w Rakecach wospjet powodźenja zawinowało. „Z nowej připrawu móža wulku wodu w Rakečanskej Młynskej hrjebi zaměrnišo wotwodźeć. Zo móhli tež přitok z Wojerowskeje Čornicy lěpje regulować, su do noweho spušćadła haćidło zatwarili“, tak krajny zarjad rěčnych zawěrow. Z přetwarom spušćadła njebu jeno škit před wulkej wodu za Rakecy polěpšeny, ale tež přepušćomnosć rěki za ryby a dalše wódne žiwochi.

Twarskich dźěłow dla dyrbjachu do toho jědnaće štomow pušćić. Za nje su tam 15 nowych sadźili.

Washington (ČŽ/K). Ukraina je so swój čas měšała do wólbneho boja k wuzwolenju prezidenta USA a je demokratam pomhała, namakać kompromitowacy material přećiwo Donaldej Trumpej. Tole piše nowina New York Times, powołaca so na rěčnicu Běłeho domu Saruh Sanders. Wšitke tajke aktiwity su po jeje słowach dokumentowane, mjez druhim kontakty wulkopósłanca Ukrainy z demokratami. Ukrainske wulkopósłanstwo w USA twjerdźenja wotpokazuje.

Žurnalisća protestuja

Berlin (dpa/SN). Politikarjo, organizacije a žurnalisća su přećiwo sćazanju akreditowanja wjacorych žurnalistow na wjerškowym zetkanju G 20 protestowali. Rěčnik organizacije Reporterojo bjez mjezow mjenuje to „njeznjesliwe stigma­tizowanje“. Cyłkownje 32 žurnalistam běchu minjeny tydźeń „wěstotnych wobmyslenjow dla“ hižo spožčenu akreditaciju zaso sćazali. Mjeztym jewja so tukanja, zo su wukrajne tajne słužby, na přikład turkowske, do akcije splećene. Rěčnik­ knježerstwa Steffen Seibert tole dotal prěje.

Zetkanje zakitował

Durinska ministerka za ratarstwo Birgit Keller (Lěwica) je dźensa statnu sušernju symjenja­ w durinskim Fischbachu wopytała, zo by so tam wo dźěle wobhoniła. Durinski­ statny lěsniski zawod sadźa kóžde lěto milion štomow w lěsach kraja. Symjo­ za nowe rostliny w Fischbachu přihotuja a składuja. Něhdźe połsta wšelakich družin štomow a rostlin tam maja. Foto: dpa/Martin Schutt

Berlin (dpa/K/SN). Wonkowny minister Sigmar Gabriel (SPD) wumjetuje uniji w dotal njeznatej měrje zełharnosć w diskusiji wo krawalach składnostnje wjerška G 20 a nadawa kanclerce Angeli Merkel­ (CDU) ćežke poroki. We wšelkich nowinach­ wicekancler zwuraznja, zo su ataki­ ze stron CDU/CSU na měšćanostu Hamburga Olafa Scholza (SPD) absolutnje njepřiměrjene. „Štóž chce jeho wotstup – hižo tele žadanje je dospołnje přehnate –, dyrbi sej tež wotstup Angele Merkel žadać. Wona je za to zamołwita, zo bu Hamburg za wjeršk wuzwoleny.“ Kanclerka bě dźě sej z toho lubiła, zo jeje ródne město z atraktiwnymi wobrazami na nahladnosći přibudźe.

Po awtodróze do šule nóžkował je dwanaćelětny hólc w Hornjej Pfalcy. Policija dósta wčera wjacore telefonaty, po kotrychž je dźěćo ze šulskej tobołu na A 3 pola Nittendorfa po puću. Zastojnicy je na to sobu wzachu. Kaž so wukopa, bě sej hólc w šulskim busu do Regensburga wusnył. Jako wotući, wón wustróžany na přichodnej staciji wulěze. Hakle po tym pak zwěsći, zo scyła hišće w Regensburgu njeje, a so pěši na puć nastaji.

Lotowe zbožo wunuzować chcyše sej njeznaty paduch w Hornjej Frankskej. W Thiersheimskej kupnicy spakosći wón wčera tyzku ze 450 losami bayerskeje loterije­ a je na to wšitke zwočinjał. Z dobyćerskimi losami poda so do bliskeho Thiersteina, hdźež jemu jeničce 78 eurow wupłaćichu. Poprawom wšak lubja losy hač do 300 000 eurow.­ Telko zboža pakostnik nje­měješe.