Z wudaća: štwórtk, 20 julija 2017

štwórtk, 20 julija 2017 14:00

„To je tón serbski Mácha!“

Jan Donat z Chrósćic (1917–1997), kiž bě w Praze započał wučerstwo studować, bě wot 1948 do 1962 wučer łaćonšćiny, čěšćiny a biologije na Serbskej wyšej šuli w Budyšinje a Małym Wjelkowje. W lěće 1971 nachwata po dalokostudiju na pedagogiskej wyšej šuli w Drjež­dźanach trěbne wotzamknjenje – z 30stronskim diplomowym dźěłom „Idejowo-historiski wobrys žiwjenja a two­rjenja Jurja Khěžki“. Překlepk manuskripta mentorki prof. Lucije Hajnec přepoda dr. Beata Brězanowa njedawno Serbskemu kulturnemu archiwej. Zajimawe je Jana Donatowe dźěło, dokelž wužiwaše wón nimo ćišćanych žórłow a dopomnjenkow swójski a Jana Korjenkowy (1921–1982) zapisnik, dale „Wokolnik“ Serbowčanow z oktobra 1936 a šulsku chroniku Arcybiskopskeho gymnazija w Praze. Njech nam někotre wujimki (z přełožkom čěskich citatow) wosobinu basnika Jurja Chěžki, kotrehož stote narodniny 22. julija wopominamy, znowa zbliža.

Hórki a Chrósćicy

wozjewjene w: Kultura
štwórtk, 20 julija 2017 14:00

Druhe městno ze staflu

Marko Ryćer (prěni wotlěwa), 18lětny serbski lochkoatlet ze Šunowa, je sej ze staflu­ Drježdźanskeho SC na 117. němskich lochkoatletiskich mišterstwach w Erfurće 2. městno w starobnej klasy U 20 w běhu na 4x400 m zawěsćił. Foto: Alfons Ryćer

wozjewjene w: Sport
štwórtk, 20 julija 2017 14:00

Proša na prěni serbski supercup

Sportowa jednotka Njebjelčicy přeproša na prěni serbski supercup. Što za tym tči a na kotre wosebitostki móža so přihladowarjo wjeselić, chcyše Stefan Möller wot hrajerja hosćićelskeho teama a sobu­organizatora koparskeho turněra, Ta­deja Cyža, wědźeć.

Njedźelu wuhotuje SJ Njebjelčicy tak mjenowany serbski supercup. Što móža sej fanojo kopańcy pod tym předstajić?

T. Cyž: Hinak hač znajemy to wot wšelakorych profijowych ligow, njeje to jednotliwa hra mištra přećiwo pokalnemu dobyćerjej. Jedna so tu wo mały turněr serbskich koparskich towarstwow – a to budu Sokoł Ralbicy-Hórki, ST Marijna hwězda, SJ Chrósćicy a SJ Njebjelčicy.

Kajki je modus premjerneho turněra? Na čo móža so přihladowarjo wjeselić?

wozjewjene w: Sport

Spěchowanske towarstwo Njepilic dwór Rowno zhladuje na wjelelětnu zhromadnosć z Grodkowskim skutkom za zbrašenych (BWS). A hišće wjele dlěje pěstuje styki z Běłowodźanskej rezidencu-starownju „Złota nazyma“. Towarstwu je wažne, zo móža zbrašeni abo pomocy potrěbne wosoby w Rownom něhdyši wšědny dźeń w serbskim burskim žiwjenju dožiwjenjowpołnje nazhonić. Zhromadne dźěło mjez wšitkimi sobuskutkowacymi wuběrnje funguje. Wšako haja spomóžnu mjezsobnosć.

wozjewjene w: Hospodarstwo
štwórtk, 20 julija 2017 14:00

Tyši jeho, zo je so ptačina zhubiła

W swojej lětušej dowolowej seriji předstajamy wosoby, kotrež na někajkežkuli wašnje stawizny a přirodu zachowuja, zo starožitnosće zběraja a je zdźěla zjawnosći spřistupnjeja.

Do Radworja jěducy wuhladaš za Chasowom dwurěčny pućnik, pokazowacy na „Lěsny park“. Dalši skedźbnja na njón po Młynskich chěžach za železniskim nasypom. Zapołožił je powučnu idylku 70lětny Radworčan Ludwig Sachsa.

wozjewjene w: Łužica
Thomas Aust a Riko Pohl (wotlěwa) plestrujetaj před Chróšćanskej pěstowarnju dźěl zachodneho areala a pućik, wšako bě tam přijězd přehnały. Jimaj poboku je Jörg Erhard, kiž z małym bagrom woršty pjeršće wurywa. Nadawk plestrowanja bě wot Chróšćanskeje gmejny po wupisanju Čornochołmčanska Budarjec firma za wuhotowanje krajiny dóstała. Foto: Feliks Haza

wozjewjene w: Łužica
štwórtk, 20 julija 2017 14:00

Susodźa sej njepřezjedni

Noworjadowanje ležownosćow njemóža wšelkich ćežow dla zakónčić

Budyšin (SN/mwe). Poprawom dyrbjało noworjadowanje ležownosćow w Budyskim wokrjesu dawno zakónčene być. Přeco zaso pak dochadźa k nowym ćežam a maličkosćam, kotrež procedury haća, hdźež sej samo zamołwići často žaneje praweje rady njewědźa. To wotbłyšćuje tež naprašowanje Serbskich Nowin na wokrjes.

W jednotliwym wopisuje nowinska rěčnica Budyskeho krajnoradneho zarjada Sabine Rötschke tuchwilnu situaciju jako tajku: Noworjadowanje wokoło Prěčec a z tym zwjazane postupowanje noworjadowanja ležownosćow, kaž wuměrjenje zahonow, polow, zahrodow atd., je so znowa zahajiło a zarjadniski pomocnik zamołwitu instancu wokrjesa podpěruje. „Najprjedy maja so wobdźělenske daty aktualizować a dojednanja pruwować a w datym padźe z wobdźělnikami wujednać“, z krajnoradneho zarjada dale rěka, „nimo toho přewjedźe wobdźělenska zhromadźizna po wšěm zdaću lětsa w třećim kwartalu nowowólby, zo by předsydstwo wudospołniła.“

wozjewjene w: Łužica
štwórtk, 20 julija 2017 14:00

Policija (20.07.17)

Nimale štyri promile intus měł

Chrjebja. Jako bě wutoru připołdnju w Chrjebi 31lětny na Hamorskej dróze z kolesa padnył, bjez toho zo by jeho něchtó storčił, zawołachu pasanća policiju. Zastojnicy Běłowodźanskeje policajskeje direkcije nochcychu swojim wočam wěrić, widźo na měrjenskim nastroju, zo ma muž 3,78 promilow alkohola w kreji. Wón dyrbi nětko z chłostanjom pjanosće we wobchadźe dla ličić.

Z 91 km/h po wsy

Lěskej. W Lěskeji pola Hućiny su policisća wutoru rano spěšnosć měrili. Hdźež je 50 km/h dowolenych, smaleše jedyn ze šoferow na B 156 z 91 km/h po wsy. Wodźer Mercedesa budźe nětko měsac bjez jězbneje dowolnosće, ma 200 eurow pokuty płaćić a dóstanje dypkaj do Flensburgskeje centralneje kartaje zapisanej. W běhu dweju hodźin registrowachu na woběmaj stronomaj dróhi wjace hač 1 200 awtow. Kóždy dźesaty šofer bě spěšnišo po puću, hač dowolene.

wozjewjene w: Policija
štwórtk, 20 julija 2017 14:00

Galerija zawrjena

Biskopicy. Biskopičanska galerija Carla Lohsy na Drježdźanskej dróze 1 wostanje jutře, 21. julija, zawrjena. Kaž z běrowa wyšeho měšćanosty rěka, je to techniskich přičin dla. Hewak je dom, w kotrymž móža sej zajimcy hač do 13. awgusta wustajeńcu Joachima Bethmanna „Auf der Suche“ wobhladać, we wote­wrjenskich časach radnicy přistupny.

Móst dale połojčnje zaraćeny

Budyšin. Budyski Móst měra wostanje do směra na město dale zaraćeny. Dokelž njemóžeše firma dźěła zakónčić, je wona město prosyła, nadawk hač do 28. julija podlěšić. Přičina dlijenja je, zo njebě wotwidźeć, zo nańdu wjele wjace zerzawych dźělow. Nimo toho dyrbjachu dźěła wjedra dla přetorhnyć.

wozjewjene w: Z městow a wsow
štwórtk, 20 julija 2017 14:00

Parkowanišća za koncert zawěsćene

Kamjenc (SN/mwe). Za koncert rockowych legendow CCR, The Lords a The Rattles, kotryž so 29. julija na Kamjenskej Pastwinej horje wotměje, změja fanojo dosć parkowanskich móžnosćow w Lü­cker­sdorfje k dispoziciji. Dokelž Kins­porsku dróhu tuchwilu wutwarjeja, tam žane městna njejsu. Zbrašeni móža so po zwučenym wašnju pod čisłom 03578/379 201 (204) w Kamjenskej radnicy přizjewić a změja móžnosć, z wotpowědnym wupokazom blisko jewišća parkować. Powšitkowne parkowanske městna su na taflach wupokazane.

wozjewjene w: Łužica

Serbska debata

nowostki LND