REKORDNJE wjele piwa je Čěska w minjenym lěće eksportowała. Prěni raz je teje „złoteje chmjelowiny“ wuwjezła za wjace hač šěsć miliardow krónow (přibližnje 225 milionow eurow). Z 1 108 hektolitrami bě Słowakska prěni króć najwjetša woteběraćelka před dotalnym „primusom“ Němskej, kotraž je 923 hektolitrow piwa kupiła. Na třećim městnje sćěhuje Pólska z 345 hektolitrami, na štwórtym Šwedska z 268 hektolitrami a na pjatym Wulka Britaniska z 227 hektolitrami. Cyłkownje su čěske piwarnje – Prazdroj, Budvar a dalše znate wulke hromadźe z něhdźe 300 minipiwarnjemi – lěta 2015 dobrych 19 milionow hektolitrow nawarili, wozjewja telewizija ČT 24. Nimo toho su Češa tež dale swětowy mišter w piwopiću. Na wosobu přeličene „wutrubi“ kóždy wobydler wob lěto nic mjenje hač 147 litrow, štož je před susodnymi Němcami a Awstričanami nahladny předskok něhdźe 40 litrow. Přiwšěm statistika­ wujewja, zo je přetrjeba piwa minjene pjeć lět snadnje woteběrała – wo pjeć procentow. Trend k tomu wočakuja tež za přichodne lěta.