Pólski parlament rozjimuje dźeń a wjace nabožnych temow

Waršawa. W pólskim sejmje so nabožne temy dźeń a bóle přesadźeja, cyle po woli noweho narodnokonserwatiwneho knježerstwa pod nawodom strony Prawo a sprawnosć (PiS) Jarosława Kaczyńskeho. Tak su w prěnim tydźenju apryla z hłosami zapósłancow PiS wobzamknyli, 100. róčnicu Fatimskeho dźiwa oficialnje woswjećić. Dnja 13. meje 1917 bě so w portugalskej Fatimje pječa swjata Marija třom dźěćom zjewiła a jim tři potajnosće přeradźiła. W prěnim wona připowědźi, zo maja hrěšnicy w helskim wohenju ćerpjeć. W druhej potajnosći wěšćeše bórzomny kónc Prěnjeje swětoweje wójny a hišće hóršu wójnu, njedyrbjeli-li ludźo přestać Boha hanić. Třeća potajnosć poćahowaše so na to, zo stanje so bamž z woporom atentata.