To a tamne (23.06.17)

pjatk, 23. junija 2017 spisane wot:

Rěčaca ampla ma dźěći a dorosćenych w Neu-Ulmje pohnuć, dróhi jeno při zelenej swěcy přeprěčić. „Dźakuju so, hnydom budźe zelene“, rjeknje dźěćacy hłós, hdyž něchtó knefl při ampli pěškow tłóči. Tak chcedźa wěstotu dźěći powjetšić, kaž ze schwabskeho města rěka. W sewjero­rynsko-westfalskim Marlu maja hižo tři lěta rěčace ample. Pilotowy projekt tam mjeztym wulki wothłós zbudźa.

Štyri policajske a wohnjowoborne awta, gumijowy čołm, 17 muži – a to wšo za jeničku kačku. Wona bě so njedaloko milinarnje Kiebingen w Rottenburgu nad Neckarom w šnórje wudy zapopadnyło, kotraž wisaše při milinowodźe nad rěku. Pěška bě ju w tymle njepřijomnym połoženju wuhladała a zastojnikow alarmowała. Něhdźe hodźinu pozdźišo bě kačka z putow wuswobodźena a móžeše skónčnje dale płuwać.

To a tamne (22.06.17)

štwórtk, 22. junija 2017 spisane wot:

Najebać kyriliske pismiki móhli němscy přiwisnicy kopańcy na Confed-cupje w Ruskej wjace rozumić, hač je jim wědome. Mnohe němske słowa dźě maja hižo lětstotki krute městno w ruskej rěči. Powěsćernja dpa mjenuje za to přikłady kaž landschafty, buterbrody, parikmacher, jarmarka, schlagbaum, wachtjor, fejerwerk abo rejs.

37lětna samodruha je swojeho ćěšenka njewočakowano, ale bjez komplikacijow w awće na zwjazkowej dróze B 217 blisko delnjosakskeho Hamelna porodźiła. Z mandźelskim bě wona po puću do porodźernje. Při tym je dźěćko porika spěšnišo na swět chcyło, hač staj sej to my­sliłoj. Dokelž bě nan doma handy zabył, zadźerža wón w swojej nuzy awto z módrej swěcu na třěše, w kotrymž pak njesedźeše nuzowy­­ lěkar. Krótko na to wšak so „baby­ B 217“ narodźi.

To a tamne (21.06.17)

srjeda, 21. junija 2017 spisane wot:

Rój kuntworow je w Hamburgu zasadźenje wohnjoweje wobory zawinił. Starosćiwy wobydler bě ju alarmował, dokelž bě běły kur při wěži hłowneje cyrkwje swj. Michała widźał. Wobornicy pak njemóžachu kur zwěsćić. Hakle po dlěšim pytanju dohladachu so pod wěžu roja kuntworow, kotryž drje zdaloka wupadaše kaž kur.

Wot staršeju wopušćenu młodu lěsawu (Waldohreule) je lěsnik Markus Roth w badensko-württembergskim Allmanns­weileru wuchował. Do toho bě wona dwaj dnjej apatisce na samsnym blaku w lěsu sedźała. Doma dawaše jej muž spočatnje sykane mjaso. Mjeztym žerje mały hósć kokošace a howjaze mjaso. Hdys a hdys sydnje so wuchowarjej na ramjo.

To a tamne (20.06.17)

wutora, 20. junija 2017 spisane wot:

Martin Luther jako playmobilowa figurka eksistuje mjeztym milion króć. Minjene dny su milionty 7,5 centimetrow wulki eksemplar z pjerom a bibliju w ruce wupósłali, zdźěli zhotowjer hrajkow Geobra Brandstätter w frankskim Zirndorfje. Mini-Luther w talaru je tak najwuspěšniša jednotliwa figura w stawiznach předewzaća. We wobchodach ju njepředawaja, dóstanješ pak figurku w turistiskich centralach. Produkować dała bě ju Ewangelska cyrkej w Němskej.

Ze swojim běhanskim kolesom je so štyrilětny na jězbu po Schwerinje nastajił. Swojej maćeri wón ničo njepřeradźi, jako so wčera popołdnju z nakromneho dźěla města do centruma poda. Po tym zo bě syna podarmo pytała, zawoła mać policiju. Hodźinu pozdźišo pěšce mały ćeknjenc napadny, a wona zawoła policiju. To měješe hólc hižo štyri kilometry zady so.

To a tamne (19.06.17)

póndźela, 19. junija 2017 spisane wot:

Zwada dweju hólcow na wróćojězbje z křesćanskeho zarjadowanja je so tak přiwótřiła, zo so swójbni při wotewzaću dźěći w Mainzu do włosow dóstachu. Jědnaćelětnaj běštaj so w busu wo mo­bilny telefon wadźiłoj, při čimž so jedyn z njeju na nosu zrani. Staršej hólca a 15lětna sotra na to mać kontrahenta atakowachu. Policija protokolowaše „storkanja, kopanja a ranjenja“. Swójbje běštej so hižo wospjet wadźiłoj.

Wosrjedź nakupowanskeho stresa je sobotu­ na Würzburgskim Hłownym torhošću 300 ludźi meditěrowało. Na zawkach a yogamatach ležo wuprudźachu woni „jara přijomnu měrnu naladu“, zdźěli Mirko Betz, kiž bě „meditaciski flashmob“ organizował. Akciju je wón městu do toho jako demonstraciju přizjewił. Dokelž bě hesło trěbne, rěkaše wone „Za měr na swěće“.

To a tamne (16.06.17)

pjatk, 16. junija 2017 spisane wot:

Skažena ryba, hnijace larwy insektow a smjerdźate hadźace hłowy – wšo to su cłownicy w Mnichowje w póstowej posyłce ze Sambije namakali, kiž měješe priwatna wosoba w Mnichowje jako chłóšćenku dóstać. Larwy insektow pochadźeja wot wačkow, kotrež w južnym dźělu Afriki jako delikatesu jědźa. Na­jebać to cłownicy posyłku sćazachu a zničichu, dokelž to zakoń za škit přećiwo mrětwam předpisuje, cłownistwo zdźěli.

Na wšě 48 hodźin w Pariskich podzemskich katakombach staj młodostnaj wutrać dyrbjałoj, doniž jeju policija njenamaka. 16- a 17lětnaj běštaj dehydrěrowanaj a steještaj pod šokom. Pariske katakomby su 300 kilometrow dołhe. Něhdy jako skały wužiwane chódby su jenož zdźěla přistupne. W přistupnym dźělu składuja nopy a kosćowcy. Zbytny dźěl je za wopytowarjow zakazany. Najebać to so stajnje zaso ludźo do njeho zwaža. Tam pak jara spěšnje orientaciju zhubja.

To a tamne (15.06.17)

štwórtk, 15. junija 2017 spisane wot:

Awtowu honjeńcu kaž w filmje dožiwichu wčera wječor w Magdeburgu policisća, po tym zo chcychu 25lětneho šofera awta kontrolować. Tón smaleše do směra nutřkowneho města. Přesćěhace policajske jězdźidło spyta wón z njejapkim borzdźenjom wobškodźić. Přiwšěm jeho zadźeržachu a skónčnje zajachu. Na to so wukopa, zo njeměješe pod wliwom drogow stejacy muž žanu jězbnu dowolnosć, awto bě wotzjewjene a čisłowe taflički pokradnjene. Nimo toho předležeše přećiwo njemu wukaz zajeća.

Njepowalnaj staj kontrahentaj w zwadźe wo předawanje praženych kołbaskow při awto­dróze A 9 w Durinskej. Wotpowědny zarjad hrozy mějićelce kioska z pjenježnej pokutu. Ta wšak scyła na to njemysli so podać a chce so z peticiju na kanclerku Angelu Merkel wobroćić. 3 200 ludźi je peticiju hižo podpisało.

To a tamne (14.06.17)

srjeda, 14. junija 2017 spisane wot:

Chětro strašne parkowanske městno za swoje awto je sej wopita šoferka w vogtlandskim Treuenje wupytała, a to na kolijach železniskeho přechoda. Z nimale dwěmaj promilomaj alkohola w kreji chcyše wona na to wotjěć. Kedźbliwi pěšcy pak tomu zadźěwachu a alarmowachu policiju. Ta awto zrumowa a wupisa 60lětnej žonje pokutu.

Na Rynje płuwaca čłowječa postawa z gumija je wulkozasadźenje policije a wohnjoweje wobory zawiniła. Kaž wottam rěkaše, běchu wjacori ludźo za­zwonili, dokelž běchu njedaloko Mainza sprostnjenu nahu wosobu na rěce płuwacu wuhladali. Na to dwaj helikopteraj, policija, wohnjowa wobora a hessenska wodoškitna policija na rěce pytachu. Zastoj­nicy pak móžachu změrować: Štož kaž čłowjek wupadaše, bě jenož wulka gu­mijowa klanka.

To a tamne (13.06.17)

wutora, 13. junija 2017 spisane wot:

Zazłobjeny jědnaćelětny hólčec je w durinskim Saalfeldźe zasadźenje policije zawinił. Wón bě doma twochnył, dokelž nochcyše jemu mać hrajku kupić, kotruž sej hólc přeješe. Policija na to po cyłym měsće hodźiny dołho a samo z psom za nim­ pytaše,­ doniž jeho skónčnje na ławce­ njenańdźe. Jim hólc jenož rjekny, zo přeje sej Fidget Spinner, nowu trendowu hrajku, kotruž bě w interneće widźał.

Defekt na zadnjej wósce 56 lět stareho traktora je jězbu jako „trecker-Willi“ znateho rentnarja Winfrieda Langnera do Pětrohroda přetorhnył. Kaž jeho dźowka medijam zdźěli, je narunanski dźěl mjeztym po puću do ruskeje eksklawy Kaliningrada, dokalž bě jeje nan minjeny tydźeń dojěł. 81lětny Langner bě so 20. meje z traktorom a małym bydlenskim wozom na puć nastajił. 5 000 kilometrow dołha jězba ma štyri měsacy trać.

To a tamne (12.06.17)

póndźela, 12. junija 2017 spisane wot:

Protestujo přećiwo awtam přichilenym městam su sta kolesowarjow zdźěla abo samo cyle bjez drasty po Londonje jěli. World Naked Bike Ride wotměwa so kóžde­ lěto w mnohich městach, w Londonje je tale demo tradicionalnje najwjetša. Z nahim protestom pokazuja wobdźělnicy tež na strachi, kotrymž su kolesowarjo w městach wustajeni, hdźež po jich słowach přemało na dobro tohole wobswět škitaceho wobchadneho srědka činja.

Z awtom nana je třilětny w Bremenje do parkowaceju awtow zrazył. Hólčk bě wčera dopołdnja z klučikom awta w ruce swojej maćeri twochnył. Z dalokoposłužowakom wón awto wočini, zalěze do njeho a startowaše motor. Wóz na to zaskoči, prasny pak do pódla so parkowaceju awtow. Tak zražka jězbu třilětneho zdobom skónči. Na zbožo so nichtó nje­zrani, kaž w policajskim reporće steji.

nawěšk

SERBSKE NOWINY podpěruja:

fueorg misain karten sorbisch

  • Lětuši 12. mjezynarodny folklorny festwial "Łužica 2017" je zahajeny. Wčera so skupiny we wobłuku swjedźenskeho ćaha po Budyšinje kaž tež na zahajenskim programje předtsajichu. Tule namakaće někotre impresije wo zahajenju festiwala. Fota: SN/Maćij Bu