To a tamne (01.03.23)

srjeda, 01. měrca 2023 spisane wot:

Pasant w Podstupimje je zawčerawšim spytał, dweju rubježnikow zadźeržeć. Do toho běštej we wobchodźe juwele pokradnyłoj. Rubježnikaj chcyštaj poprawom spěšnje twochnyć, tola pasant so ­jimaj do puća stupi. Jednoho rubježnika je wón kruće dźeržał, tola skónčnje móžeše so wuwinyć. W šmjatańcy z pasantom pak je rubježnik nimo juwelow tež hamor, titku a jedyn čriji zawostajił. Kriminalna policija pad nětko přepytuje.

Na dowolowej kupje Mallorca bědźachu so minjene dny ze sněhom, kiž je zymska nižina z mjenom „Juliette“ wobradźiła. Nětko pak warnuja meteorologojo před powodźenjemi a sylnym wichorom. Dowolnicy a domoródni měli tuž w domach wostać.

To a tamne (28.02.23)

wutora, 28. februara 2023 spisane wot:

Dlěje hač 30 lět bě muž ze Schwerina bjez jězbneje dowolnosće awto jězdźił. Dokelž bě wón přehnawał, jako je druhe jězdźidło přesćahnył, je so tole skónčnje wukopało. Kaž policajska rěčnica minjeny štwórtk zdźěli, jedna so wo 57lětneho muža, kiž bě 6. februara blisko hrodu ze swojim awtom po puću. Jako jeho druhi šofer přesćahny, dóńdźe k zražce, na kotrejž ma 57lětny snadnu sobuwinu. Při přepytowanju njezboža wón hišće po­twjerdźi, zo nima jězbnu dowolnosć sobu. Pozdźišo policija zwěsći, zo dyrbješe muž papjery hižo w lěće 1992 wotedać.

Lětuša zyma w Němskej bě po słowach meteorologow znowa jasnje přećopła. To je dwanata ćopła zyma zasobu.

To a tamne (27.02.23)

póndźela, 27. februara 2023 spisane wot:

Na tropiskim sewjeru Awstralskeje je hoberski krokodil muža při rěce nadběhował a na to jeho psa morił. Ataka bě minjenu srjedu w Bloomfieldźe w zwjazkowym staće Queensland, hdyž je 37lětny při rampje za čołmy ze swojej psycu „Magic Molly“ šoł, kaž powěsćernja AAP rozprawješe. Rangerojo su 4,2 metraj dołhi reptil štwórtk wječor 200 metrow wot městna nadpada namakali a zatřělili, dokelž běše „inakceptabelne riziko“.

Dźiwadźelnica Heike Makatsch podawa nětko tež yoga-hodźiny w Berlin-Charlottenburgu. Tydźensce jónu wona wuwučuje wotměnjejo so z dalšej wučerku, kaž yoga-studij minjeny pjatk na Instagramje piše. Po tym je Makatsch tam w lěće 2021 zakładne wukubłanje absolwowała. Tuchwilu wona swoju wědu w natwarnym wukubłanju pohłubša. Z yoga je kluč do wjace hač jenož ćělneje strowoty namakała, dźiwadźelnica měni.

To a tamne (24.02.23)

pjatk, 24. februara 2023 spisane wot:

Swoje dźěćo je mać na socialnym zarjedźe w Berlin-Neuköllnje porodźiła. Dokelž hižo dwě dźěsći ma a jej hrozy bydlenje zhubić, dóstanje nětko wosebitu pomoc wot zarjada. Žona bě wutoru w prawidłownej rěčnej hodźinje wo strowotniskich problemach skoržiła. Krótko na to su hrona započeli. Hdyž nuzowy lěkar přichwata, je hłójčka hižo widźeć była. Kaž sćelak RBB rozprawješe, traješe porod 15 minutow. Mać a ćěšenk do chorownje dowjezechu, jimaj so derje dźe.

Zmylk druheho šofera při přesćěhowanju je so zahubnje za muža w Schwerinje wuskutkował. Tón bě wjace hač 30 lět bjez jězbneje dowolnosće jězdźił. 57lětny bě 6. februara blisko hrodu z awtom po puću. Hdyž druhi šofer jeho přesćěhaše, sta so njezbožo z pječa snadnej sobuwinu Schwerinjana. Při zwěsćenju nje­zboža rjekny zastojnikam, zo papjery sobu nima. Policija na to zwěsći, zo bu jemu 1992 jězbna dowolnosć na přeco sćazana.

To a tamne (23.02.23)

štwórtk, 23. februara 2023 spisane wot:

Młodostny z Bangladeša je so po njewotpohladanej jězbje we łódźnym kontejneru zaso do domizny nawróćił. 16­lětny njeje so při chowance z přećelemi w januarje z kontejnera na łódźi w Chittagongskim přistawje wuswobodźić móhł, rjekny sobudźěłaćer wonkowneho ministerstwa w Dhaka powěsćerni dpa. Po wjacorych dnjach na morju su hólčeca w Malajziji zesłabjeneho w swojim kontejneru našli. Wottam su jeho do kliniki dowjezli, hdźež bu hladany.

Po spektakularnym zadobyću do drohotneje butiki w nutřkownym měsće Hamburga su 48lětneho na Essenskim hłownym dwórnišću zajeli. Muž je njeskutka nuznje podhladny, zdźěli wčera policija w Hamburgu. Po přepytowanjach je z kradnjenym awtom loni 18. oktobra rano do wukładneho wokna nobel-wobchoda jěł a na to drohe toboły spakosćił.

To a tamne (22.02.23)

srjeda, 22. februara 2023 spisane wot:

Najlěpše sambašule Rio de Janeira su na kóncu swětoznatych ćahow w Sambodromje brilěrowali. Šěsć top-šulow ćehnješe na poslednim dnju wubědźowanja hač do wutorneho zaheho ranja z kostimami bjez mjezy, spektakularnymi wozami a inowatiwnymi wosebitymi efektami po stadionje samby z wjace hač 70 000 přihladowarjemi. Mnohe sambašule su swoje ćahi tež historiskim brazilskim temam abo figuram wěnowali. Tak je šula „Paraíso do Tuiuti“ stawiznu prěnjotnje z Indiskeje pochadźacych buwołow na kupje Marajó powědała.

Mału holčku, kotraž bě so po raznym zemjerženju w Syriskej pod rozwalinami narodźiła, staj jeje ćeta a teje mandźelski adoptowałoj. „Wona budźe kaž jedne z mojich dźěći. Budu wšitko za nju činić“, rjekny nowy adoptiwny nan, Chalil Sawadi, wčera powěsćerni dpa. Ćeta a wuj mataj samaj štyri dźowki a dweju synow. Swójba je swoju chěžu při žałostnym rženju zhubiła a bydli nětko w stanje.

To a tamne (21.02.23)

wutora, 21. februara 2023 spisane wot:

Něšto měsacow do krónowanja Charlesa III. zahaji so předań suweněrowych artiklow. Britiske hornčerske předewzaće Emma Brigdewater liči z wulkim naprašowanjom za šalkami, talerjemi a čajowymi kanami. Motiw – krónu z lawom a jednorohačom jako znamjo britiskeje monarchije – z hubicowym kołkom nanjesu a potom z ruku wudebja. Krónowanje je 6. meje w Londonskej Westminster Abbey.

Druha wulka technoparada „Rave The Planet“ z dźesaćitysacymi wobdźělnikami je za 8. julija w Berlinje planowana. Hišće hač do kónca februara móža so zajimcy za wobdźělenje z wótřerěčakowym wozom požadać. Lětuše moto je „Music is the Answer“ (hudźba je wotmołwa). Parada ma demonstracija za zachowanje elektroniskeje hudźbneje kultury za měr na swěće być.

To a tamne (20.02.23)

póndźela, 20. februara 2023 spisane wot:

Francoski minister za dźěło Olivier Dussopt je wosrjedź parlamentariskeje debaty k diskutowanej rentowej reformje křižowku wuhódał, při čimž jeho lepichu. „Sym hłuposć worał“, wuzna 44lětny politikar minjeny pjatk w sćelaku BFMTV. Dokelž debata hižo dwaj tydźenjej traje a so stajnje přetorhnje, je w přestawce hódančko do ruki wzał a njeje je hižo wotpołožił. Dussopt dyrbi reformu w narodnej zhromadźiznje a tež zwonka njeje přećiwo sylnej kritice zakitować.

Po 25 lětach njewotměwa CDU w Mecklenburgsko-Předpomorskej žanu politisku popjelnu srjedu. Tole su čłonojo strony njedawno rozsudźili. Zwjazkowa CDU je zarjadowanje zapłaćiła a ma nětko hinaše ćežišća. Na zetkanju wobdźěli so 1 000 hosći, tež ze druhich stronow. Jako wurunanje planuja swjedźeń w lěću.

To a tamne (17.02.23)

pjatk, 17. februara 2023 spisane wot:

By-li Bobi čłowjek był, je wón hižo před něšto časom swoje 200. narodniny wo­swjećił. Pastyrski psyk z Portugalskeje je mjenujcy dobrych 30 lět stary – a kaž wěmy, je sydom psyčich lět telko kaž jedne čłowječe lěto. Tuž zapisa so „najstarši žiwy wšěch časow“ do Guinnessoweje knihi rekordow. Najebać swojeje staroby honi so Bobi po zahrodźe swojeho knjeza Leonela Costa.

Ataka na žurnalistku, při kotrejž je jej choreograf statneje opery Hannovera Marco Goecke psyče howno do mjezwoča zmazał, ma nětko konsekwency. Tak je wón swoje dźěłowe městno jako baletny direktor zhubił. Njepřemysleny nadpad je přejara zasady statneho dźiwadła zranił a domej zeškodźał.

To a tamne (16.02.23)

štwórtk, 16. februara 2023 spisane wot:

Ratar je 1 200 kilometrow po Thailandskej nóžkował, zo by so na dnju Walentina ze žonu woženił, kotruž njeje hišće nihdy wosobinsce zetkał. 52lětny Suthep bě 56lětnu předawarku Thanapu před pjeć měsacami w interneće zeznał, jako sej rybowu pastu pola njeje skaza. Thanapa je swojeho Suthepa najprjedy skerje žortnje namołwjała, pěši k njej do daloko zdaleneje južneje prowincy Satun přińć. Suthep je wěc chutnje brał. Na dnju Walentina je wón Satun docpěł a so ze Thanapu zmandźelił.

Nurjerjo francoskeho cłownistwa su pod z Brazilskeje přijědźenej łódźu 180 kilogramow kokaina w hódnoće wjace hač 15 milionow eurow namakali. Nurjerjo běchu něšto spodźiwne při łódźi pod wodu wuhladali a to bliže přepytowali, zarjad wčera zdźěli. Kapitana łódźe su cłownicy najprjedy raz zajeli.

Serbska debata

nowostki LND