To a tamne (12.04.22)
Hnydom cyły móst pokradnyła je cwólba paduchow w Indiskej. Něhdźe 18 metrow dołhu železnisku konstrukciju su w běhu třoch dnjow rozebrali a dźěle wotwjezli. Policija je wosom podhladnych zajała a w tym zwisku bager, 247 kilogramow železa a dalši material sćazała. Dźěle mosta běchu wikowarjam šrota předali.
Makabernu zběrku wulkich wutykanych zwěrjatow je španiska policija njedaloko Valencije namakała. Po wotpowědnym pokiwje podachu so zastojnicy k ležownosći w małym měsće Bétera z halemi a wulkej wilu: Tam wuhladachu 1 090 wutykanych elefantow, nosorohačow, běłych mjedwjedźow, lawow, leopardow a tigrow – nastajenych před kulisu afriskeje sawany. Je to najwjetša priwatna zběrka, kotruž su hdy w Španiskej namakali, policija zdźěla. Policija trochuje hódnotu na 30 milionow eurow.
To a tamne (11.04.22)
Britojo, kotřiž rady pinguiny liča a kiž chcyli někotre měsacy w Antarktice žiwi być, móža so za cyle wosebite dźěło přizjewić. Organizacija Antarctic Heritage Trust pyta zajimcow za dźěło w přistawje Port Lockroy. Něhdyše wojerske zepěranišćo na kupje Goudier Island je wot lěta 2006 muzej a sobu najizolowaniša póstowa filiala swěta. Nadawk mustwa je, twarjenja hladać, pinguiny ličić a jich zawostajenstwa zrumować.
Kačka je sej nócnu kupjel z ćopłej wodu w jednej z Mnichowskich halowych kupjelow lubić dała. Sobudźěłaćerjo objekta zwěrjo pjatk rano w jednym z basenkow wuhladachu, wohnjowa wobora zdźěla. Wšitke pospyty, kačku z wody wuhnać, pak zwrěšćichu. Skónčnje móžachu přiwołani wohnjowi wobornicy zwěrjo popadnyć a do swobody pušćić. Kak bě kačka do kupjele přišła, njewědźa.
To a tamne (08.04.22)
900 eurow před pjenježnym awtomatom namakała je 23lětna žona w sewjerosakskim Delitzsch a je pjenjezy pola policije wotedała. Kaž zastojnicy zdźěla, nětko za wobsedźerjom pjenjez pytaja. Policija potrjechenu wosobu prosy, so z dopokazom wo wotzběhnjenju na policajskim rewěrje přizjewić.
We wuliwje duše z porstom tčacy wostała je žona w šwicarskim Winterthurje pola Züricha, jako kupjel rjedźeše. Wohnjowi wobornicy dyrbjachu ju wuswobodźić, štož spočatnje ani tak lochko njebě. Hnydom tři jězdźidła wohnjoweje wobory běchu na akciji wobdźělene. Susod bě wołanje žony słyšał a policiju alarmował. Ani policistam ani wuchowanskim sanitetarjam so njeporadźi, problem rozrisać. Skónčnje dyrbjachu wobornikow přiwołać. Tući z pomocu piły wuliw rozrězachu a žonu njezranjenu wuswobodźichu.
To a tamne (07.04.22)
Wjeselo nad woprawdźitym hrabnjenčkom mjez studowacymi w Nürnbergu njetraješe dołho: Zmylka dla běchu awtomaty tamnišeho bliskowobchada semestersku jězdźenku za 2,07 město 207 eurow předawali. Powěsć wo „rabaće“ bě so póndźelu spěšnje rozšěriła a nawal na awtomaty zbudźiła. Zamołwići su zmylk mjeztym skorigowali. Kelko studentow je sej tuni tiket kupiło, njewědźa.
Putin dóstanje nowe mjeno – znajmjeńša w parku dźiwiny w hornjej Frankskej. Tam bydli dźiwje swinjo z mjenom ruskeho prezidenta. Te pak chcedźa jemu wójny w Ukrainje dla sćazać, zamołwići parka dźiwiny w Mehlmeisel w Bayreuthskim wokrjesu zdźěla. Zwěrjo bě hižo jako proso do parka přišło a swojeho ruskeho nana dla tute mjeno dóstało. „Putin“ waži mjeztym 200 kilogramow a čuje so mjez 21 swinjemi jara derje, kaž zdźěleja.
To a tamne (06.04.22)
Ze zymskeho spara wotućili su tři mjedwjedźe Torgauskeho hrodu Hartenfels. Pěstowarske dźěći su je dźensa witali a smědźachu zhromadnje z hladarku tež za kulisy pohladać, prašenja stajeć a při picowanju mjedwjedźow z mjenom Bea, Benno a Jette přihladować. Dźerženje mjedwjedźow w Torgauwje ma dołhu tradiciju a saha hač do 15. lětstotka wróćo. Zwěrjata słušeja wokrjesej Sewjerna Sakska, hladarka je pola krajnoradneho zarjada přistajena.
Čakajo před fabriku plackow je muž w šwabskim Donauwörthće zasadźenje wohnjoweje wobory zawinował. 79lětny chcyše w zawodnym wobchodźe nakupować a bě so načakał. Tuž chcyše zaklinkać a na so skedźbnić. Město klinkačka pak stłóči muž na alarmowy knefl. Na to přijědźe 35 wohnjowych wobornikow a wohnjowy alarm zaso wotpinychu.
To a tamne (05.04.22)
W bijeńcy skónčiła je so wosobinska rozmołwa šefa ze sobudźěłaćerjom na parkowanišću w sewjerorynsko-westfalskim Hagenje, doniž policija njepřijědźe. Mužej běštaj so tam zetkałoj, zo byštaj wo hišće njepłaćenych mzdach rěčałoj. Połoženje pak so spěšnje přiwótři, jako šef (40) swojeho sobudźěłaćerja (60) z baseballowym retlom nadběhowaše. Tón spyta so z kijom wobarać a ćisny cyhel na šefa. Policija móžeše jeju změrować.
Třoch wulkowikowarjow drogow je policija w Düsseldorfje zajała. Mužojo a dalši kumpanojo su podhladni, zo su w běhu jednoho lěta wjace hač dwě tonje drogow předawali a tak miliony eurow zasłužili. Tak su mjez měrcom 2020 a junijom 2021 z tonami marihuany, 50 kilogramami hašiša a 30 kilogramami kokaina wikowali. Policija móžeše jich zaklučowanu komunikaciju wuslědźić.
To a tamne (04.04.22)
61lětny muž je so w sakskich šćěpjenskich centrumach na wšě 87 króć přećiwo koronawirusej šćěpić dał. Sobudźěłaćerjam Němskeho čerwjeneho křiža bě muž w jednym z Drježdźanskich šćěpjenskich centrumow napadnył. Policija je jeho mjeztym zajała. Muž bě so stajnje z nowym šćěpjenskim wupokazom přizjewił. Po šćěpjenju wón wonkownu stronu dokumenta ze swojim mjenom z nowej stronu wuměni a wupokaz předa.
15lětny młodostny je so w Posaarskej za wodźidło transportera sydnył a zhromadnje z towaršom k fastfood-hosćencej jěł. Takle zastaranaj podaštaj so na jězbu po awtodróze. Do toho pak młody muž druhemu šoferej napadny, jako jemu w jednosměrowej dróze napřećiwo přijědźe. Policija jeju zadźerža. Kak běštaj wobydlerjej domu socialneje pomocy ke klučikam transportera přišłoj, njewedźa.
To a tamne (01.04.22)
Eksotiska žaba je wjacore tysac kilometrow dołhu jězbu z Etiopiskeje do Wulkeje Britaniskeje derje přetrała – w tiće čerstweje mjetlički (Minze). Wikowar sadu a zeleniny je zeleno-brune blakate zwěrjo w měsće Corbridge wuhladał a organizaciju za škit zwěrjatow informował. Spočatnje ani njewědźachu, wo kotru družinu so jedna. Wočiwidne pak bě, zo dźe so jej derje a zo jej mjetlička zesłodźi.
Awto pacienta chorownje pokradnył je sobuwobydler w chorobnej stwě w braniborskim Perlebergu. Do toho bě so 77lětny muž dźiwał, zo so jeho muž w susodnym łožu stajnje zaso za awtom praša. Srjedu rano wón zwěsći, zo je so susod, runje tak kaž móšeń a awtowy kluč, zhubił. Policija je mjeztym zwěsćiła, zo je so susod z pokradnjenej chorobnej kartu do chorownje zapokazać dał. Zastojnicy nětko za mužom a awtom pytaja.
To a tamne (31.03.22)
Tysacy blešow ilegalneho alkohola je policija w Indiskej z pomocu dróhotwarskeje walcy zničiła. Alkohol w hódnoće 200 000 eurow bě policija za čas pandemiskeju lět w měsće Ahmedabad a staće Gujarat, hdźež je alkohol zakazany, sćazała. Wjacorych ludźi su zajeli. Něhdźe 200 zastojnikow zaruči, zo njeměješe zjawnosć žadyn přistup k městnu zničenja. Črjopy su zahrjebali, policija zdźěla.
Spěšniši hač wohnjowa wobora bě ćěšenk w Augsburgu. Žona měješe sylne hrona a njemóžeše nuzowemu lěkarjej durje wočinić. Tón wołaše na to wohnjowu woboru, zo by durje wotewrěła. Mjeztym pak bě so mały hólc hižo narodźił a mać móžeše wobornikam sama wočinić. Starša sotra narodźeneho bě při porodźe tohorunja pódla a połoženje „wustróžana“ wobkedźbowaše. Mać a wobě dźěsći dowjezechu do chorownje.
