To a tamne (03.02.22)

štwórtk, 03. februara 2022 spisane wot:

Psyčk z mjenom Jucy je w sewjerorynsko-westfalskim Herne šěsć hodźin tra­jace zasadźenje wohnjoweje wobory a Techniskeho pomocneho skutka zawinił. Wokoło 20 hodź. bě žona telefonisce zdźěliła, zo je so jeje lubušk Jucy w jamje liškow abo zajacow zminył. Na to pytachu pomocnicy z łopaćemi, bagrom a samo kanalowej kameru za nim, bjez wuspěcha. Nazajtra namakachu psyčka w zwěrjatowni, hdźež je jeho něchtó wotedał. Hdźe bě jeho wuhladał, wón njepřeradźi.

Kuriozne njezbožo z dźěćacym jězdźi­dłom bobbycarom w münsterlandskim Ahausu je wujasnjene. Před tydźenjomaj bě tam dźěćo do žony zrazyło, kotraž na to padny, so zrani a sej cholowy roztorha. Zrjadować pak to njemóžachu, dokelž bě mać małeho šofera žonje mylnje wopačne telefonowe čisło dała. Z pomocu swědka su ju mjeztym wuslědźili.

To a tamne (02.02.22)

srjeda, 02. februara 2022 spisane wot:

Nimale 40 000 eurow a złotaki su cłownicy na lětanišću Karlsruhe/Baden we wačoku pasažěrki našli. Mjez stronami knihow bě 46lětna cyłkownje 40 700 šwicarskich frankow schowała. W titkach nósnikow měješe wona nimo toho złoto w hódnoće 6 300 eurow zapakowane. Pašowanja dla ju zastojnicy wozjewichu. Pjenježne srědki wjace hač 10 000 eurow dyrbja ludźo při zapućowanju a wopušćenju Němskeje přizjewić.

Hnydom trójce zjebał je njeznaty žonu w vogtlandskim Netzschkauwje. Skućićel bě 74lětnej při telefonje napowědał, zo je jeje dźowka njezbožo z dźěsćom zawiniła a nětko w jastwje sedźi. Rentnarka přepoda jemu na to štyricyfrowu sumu pjenjez. Krótko na to žadaše sej muž hišće wjetšu „kawciju“ za dźowku. Tež to pak jemu njedosahaše. Skónčnje dósta wón hišće dulu złota wot zjebaneje.

To a tamne (01.02.22)

wutora, 01. februara 2022 spisane wot:

Jědojty pawk – tak wulki kaž čłowječa ruka – je w kupnicy žiwidłow w Krefeldźe zasadźenje wohnjoweje wobory zawinił. Sobudźěłaćerjo discountera běchu čłonko­nohača w kisće bananow z Dominikan­skeje republiki wuhladali a přikładnje reagowali. Woni tyknychu kistu scomt bananami a pawkom do plastoweje tity, po tym zo běchu jeho fotografowali. Fachowcy móžachu jeho tuž spěšnje identifikować. Tale družina z Južneje Ameriki je drje jědojta, njeje pak smjertna.

Na wšě 70 lět bjez jězbneje dowolnosće a zawěsćenja po puću był je muž w Jendźelskej. Lěta 1938 rodźeny muž bě so njedaloko Nottinghama do kontrole dóstał, njeměješe pak ani papjery ani zawěsćenje za swój Mini One. Zastojnikam wón rozłoži, zo wot 12. žiwjenskeho lěta bjez njezboža awto wodźi. Jězbnu dowolnosć njeje nihdy wobsedźał.

To a tamne (31.01.22)

póndźela, 31. januara 2022 spisane wot:

Łožo pokradnyli su paduši z bydlenja w Dürenje pola Kölna. Kaž policija zdźěli, su so njeznaći swětły dźeń do bydlenja w prěnim poschodźe wjaceswójbneho domu zadobyli, jako wobsedźerka doma njebě. Skućićeljo pokradnychu telewizoraj, hrajnu konsolu, kamorčk a 140 centimetrow šěroke łožo z matracu. Policija pyta za swědkami, kiž su snadź transport spěraweje rubizny wobkedźbowali.

Hižo druhi króć je žona w Francoskej dźěćo we wuchowanskim jězdźidle wohnjoweje wobory porodźiła, we woběmaj padomaj samsneje wuchowanskeje straže. Žona bě štwórtk z awtom po puću do kli­niki, jako pytny, zo so porod bliži. Wona zajědźe na parkowanišćo wuchowanskeje straže, hdźež so hnydom wo nju starachu. Krótko na to so mała Ohana narodźi. Lěta 2018 bě so porod prě­njeho dźěsća žony podobnje wotměł.

To a tamne (28.01.22)

pjatk, 28. januara 2022 spisane wot:

Z awtom do wobchoda za kwasne šaty zrazyła je žona w Kerpenje pola Kölna. Do toho bě 69lětna při zaparkowanju před wobchodom pedalej za borzdźidło a płun zaměniła. Awto z wotmachom wotjědźe, přerazy wukładne wokno a wosta we wobchodźe stejo. Přistajena wuńdźe ze stróželemi, tež šoferka wosta njezranjena.

Ćeknjeny proch srěbacy roboter je wobydlerjow awstriskeho městačka Wieselburg zaběrał. Roboter za žiwi­dła wobchod rjedźi a je poprawom hotowy, hdyž so tam rano w sedmich durje wočinja. Awtomatiska kamera pak pokazowaše, kak so Fluffy přez wočinjene durje zminje. Jako mějićel wobchoda pytny, zo je „Fluffy“ preč, bě přepozdźe. Po zjawnej namołwje wobchodnika su wobydlerjo roboter we wotpadkowej firmje našli. Dźěłaćerjo běchu na chódniku stejacy nastroj sobu wzali.

To a tamne (27.01.22)

štwórtk, 27. januara 2022 spisane wot:

Po tym zo stej tołčene běrny na so mjetałoj a so hišće biłoj, su dwě žonje z jastwa w šwabskim Aichachu znowa zasudźili. Wobydlerce samsneje cele běštej so loni w juliju zwadźiłoj a jědź na so mjetałoj – tón dźeń sydachu tołčene běrny. Při ćělnym rozestajenju so wobě žonje zraništej. Augsburgske sudnistwo zasudźi jednu z njeju k pokuće 2 700 eurow. Tamna ma 1 800 eurow płaćić.

Hnujace zasowidźenje španiskeje swójby ze swojim sydom lět zhubjenym psom je w interneće wjele kedźbnosće zbudźiło. Sobudźěłaćerka tankownje Pepe Tenorio bě pastyrskeho psa Dica před dnjemi při awtodróze wuhladała a sobu wzała. Dźakowano jeho plakeće při šiji móžeše skótna lěkarka wobsedźerjow spěšnje wuslědźić a jim psa wróćić. Tući ze sylzami we wočach wbohe skoćo domoj witachu. Dico bě wot lěta 2015 zhubjeny.

To a tamne (26.01.22)

srjeda, 26. januara 2022 spisane wot:

Žadyn dobry poměr k swojemu telefonej nimaja Francozojo. Na telefonaty w krutej syći 17 procentow ludźi zasadnje njereaguje a dalšich 26 proc. ­jenož, jeli wołaceho na telefonowym čisle spó­znawaja, zdźěli statistiski zarjad w Parisu. Telefonat na handyju dwaj procentaj ludźi zasadnje ignorujetej, 30 procentow reaguje jenož pola znatych čisłow. 77 procentow žonow hnydom na telefon dźe, ale jeno 69 muži.

Pobrachowaca plaketa při čisłowej tafličce bě zahuba za Kölnjana, kiž bě na wšě 30 lět bjez jězbneje dowolnosće po puću. 63lětny zastojnikam wuzna, zo bě swoje „papjery“ hižo 1992 přisadźił a zo je wot toho časa „bjez njezboža“ po měsće jězdźił. Policistam bě pobrachowaca plaketa napadnyła. Dokelž njemóžeše šofer při kontroli jězbnu dowolnosć pokazać, čaka nětko chłostanje na njeho.

To a tamne (25.01.22)

wutora, 25. januara 2022 spisane wot:

Z hašišowej cigaretu w hubje sam z mobilnym telefonom fotografował je so muž na dwórnišću w hornjobayerskim Moosburgu, byrnjež zwjazkowy policist pódla njeho stał. Tón čakaše na ćah k Mnichowskemu dwórnišću, hdźež měješe słužbu. Zastojnik je personalije 38lětneho registrował. Na to jědźeštaj wobaj z ćahom. Hižo po jednej staciji 38lětny spěšnje wulěze, při čimž je za policista dalši joint a nóž ležo wostajił.

Z wotpadkami dospołnje zanjerodźene awto je policija w Essenje zadźeržała. ­Jězdźidło bě zastojnikam napadnyło, dokelž sedźeše šofer jara blisko za wodźi­dłom. Na to so wukopa, zo je wóz połny njerjada, tež tam, hdźež dyrbi šofer z nohomaj borzdźić a kuplować. To móhło w nuzowym padźe strašne być. Šofer ma wěsty čas chwile njerjad zrumować a swoje awto znowa předstajić.

To a tamne (24.01.22)

póndźela, 24. januara 2022 spisane wot:

Do dźesać metrow hłubokeho zastaranskeho šachta padnył je muž w hotelu hessenskeho Hanauwa, při čimž so ćežko zrani. Wězo njemóžeše so hižo sam wuswobodźić. A tak dyrbješe wosebita jednotka wohnjoweje wobory přijěć, kotraž móže ludźi z wulkeje wysokosće wuchować. Na akciji bě 35 wobornikow wobdźělenych. Skónčnje so poradźi, muža z powjazami z wuskeho šachta wućahnyć. Kak móžeše do njeho padnyć, njewědźa.

Z nožom w ruce je wobsedźerka małeho wobchoda w Berlinje-Kreuzbergu dweju rubježnikow wućěriła. Mužej běštaj do wobchoda zastupiłoj a sej z pistolu pjenjezy žadałoj. 53lětna pak njeda so zatrašić a wućahny kuchinski nóž, na čož so rubježnikaj zminyštaj. Jedyn z njeznateju přiwšěm hišće z brónje třěli, kotraž pak wukopa so jaka trašawka. Wobsedźerce wobchoda so ničo njesta.

To a tamne (21.01.22)

pjatk, 21. januara 2022 spisane wot:

Warnowanski lac woblečene kokoše běchu srjedu popołdnju na dróze blisko porynsko-pfalcskeho Haßlocha po puću. Wo tajkim wobrazu chětro zadźiwana je šoferka awta policiju informowała. Kaž so wukopa, bě honač z pjeć kokošemi z ležownosće twochnył. Warnowanskej lacaj dweju kokošow wšak njeběštej jako škit w nadróžnym wobchadźe postajenej. Dokelž honač při teptanju kokošow jara energisce postupuje, bě wobsedźerka za nje ekstra škitne lacy zhotowiła.

Při wobchadnej kontroli awta ćeknył, ale tam swoju móšnju zabył je srjedu popołdnju 29lětny sobujěducy w Berlinje. Jako so wón trochu pozdźišo jeje dla k jězdźidłu wróći, policija hižo na njeho čakaše a jeho nablaku zaja.

Serbska debata

nowostki LND