To a tamne (04.01.24)

štwórtk, 04. januara 2024 spisane wot:

Žane suweněry wjace na sławnym Brooklynowym mosće w New Yorku: Wšědneho nawala 30 000 ludźi dla je město předawanišća New Yorkskich dopomnjenkow na 140 lět starym mosće zakazało. Wopytowarjo maja přichodnje wjace městna dóstać, zo móhli sej na 1,8 kilometrow dołhim mosće panorama města lubić dać. Kolesowarjow běchu hižo 2021 na swójsku čaru po druhim mosće pósłali. Najebać to je tołkańca ludźi na 1883 wotewrjenym mosće dale a wjetša.

Wulke ličenje zwěrjatow su w Londonskim zwěrjencu zahajili. Sobudźěłaćerjo maja při kóždolětnej inwenturje wšitkich zwěrjećich wobydlerjow dokładnje registrować. Akcija drje chwilku traje, wšako maja tam něhdźe 14 000 wšelakich zwěrjatow, nawodnistwo zwěrjenca zdźěli. W coologiskej zahrodźe bydli 300 družin, mjez nimi nopawy, pinguiny a tigry.

To a tamne (03.01.24)

srjeda, 03. januara 2024 spisane wot:

Powjaznicu zlemiła je myš w Awstriskej – runje silwester. Defekta dla dyrbješe něhdźe 150 hosći w panoramowym hosćencu na tysac metrow wysokej horje Karren pola Dornbirna dlěje wutrać hač planowane. Po informacijach medijow bě myš kabl překusała a elektroniski system powjaznicy zlemiła. Wopytowarjow dyrbjachu z awtami z hory dowjezć.

Plěsniwe całty za policistow w silwesterskej nocy w Berlinje drje změja prawniske sćěhi. Dźěl całtow bě skaženych. Swačinu za zastojnikow bě jedna z Berlinskich cateringowych firmow přihotowała a w chłódźenych jězdźidłach silwester připołdnju na policajsku stražu při­wjezła. Tam składowachu pakety w chłódźakach. Najebać to běchu całty skažene. W Berlinje bě silwester 3 000 zastojnikow zasadźenych. Kelko z nich je plěsniwe całty dóstało, njeje dotal znate.

To a tamne (02.01.24)

wutora, 02. januara 2024 spisane wot:

Přihot pizzy je w Italskej „swjata“ tradicija, na kotruž su Italčenjo jara hordźi. A tohodla je za nich jara wažne, kotre wudźěłki za pokładźenje pizzy wužiwaja. Sławny pjekar pizzy z Neapela pak je ­nětko z widejom w socialnych medijach wulku kedźbnosć wubudźił. Gino Sorbillo, mějićel wjacorych hosćencow w Italskej a we wukraju, chce pizzu z ananasom pokłasć a je hosćom poskićeć. W Italskej­ pak je pizza z ananasom „smjertny hrěch“. We wideju Sorbillo ludźi namołwja, kulinarisku chłóšćenku woptać.

Policisća su w Połčnicy pašturlicu wuchowali. Pazoraka ze zranjenym křidłom su zańdźenu sobotu na kromje města Połčnicy wuhladali, policija zdźěli. Ptačka dowjezechu zastojnicy skótnemu lěkarjej.

To a tamne (29.12.23)

pjatk, 29. decembera 2023 spisane wot:

Kołp na kolijach na mosće we Wolgasće zapadnje kupy Usedom w Mecklenburgsko-Předpomorskej je železniski a nadróžny wobchad nachwilnje zlemił. Že­leznicar bě zwěrjo wuhladał a policiju ­informował. Pomoc přińdźe ze stron čakaceho šofera wosoboweho awta. „Wočiwidnje wěcywustojny muž“ zwěrjo hrabny a na druhi bok mosta donjese, hdźež jeho zaso na swobodu pušći.

Na zwěrjeći wuměnk rozžohnowali su Podstupimscy cłownicy na drogi wukubłanu psycu Fluse. Dźesać lět dołho bě mjeztym dwanaće lět stary pos aktiwnje słužbu wukonjał a při 264 zasadźenjach nimale 270 kilogramow drogow wuslědźił. Zasadźena bě Fluse předewšěm na Berlinskim lětanišću Tegel a na nowym BER. Wosebje chwalachu sej policisća jeje charakter: Dźěćom bě wona jara přichilena, skućićelam pak scyła nic.

To a tamne (28.12.23)

štwórtk, 28. decembera 2023 spisane wot:

60 lět bjez jězbneje dowolnosće po puću był je muž w Jendźelskej. Policisća su jeho při kontroli na awtodróze njedaloko sewjerojendźelskeho Prestona lepili. Zastojnikam pokaza muž prastary a dawno wotběžany certifikat, kotryž jemu dowola, z přewodnikom w awće po puću być směć. Nětko dyrbi šofer ze sudniskej skóržbu ličić. Dotalny rekord bě druhi muž loni nastajił: Wón sedźeše 70 lět bjez jězbneje dowolnosće za wodźidłom.

Dwě promilej alkohola w kreji měješe 36lětna wodźerka wosoboweho awta, jako takle wopita w vogtlandskim Auerbachu do parkowaceho awta zrazy. Kaž policija zdźěli, bě žona na napřećiwny bok jězdnje zajěła a tam do awta a do płota prasnyła. Wona so snadnje zrani. Pomocnicy ju ambulantnje zastarachu. Wěcni škodu zražki trochuje policija na nic mjenje hač 28 000 eurow.

To a tamne (27.12.23)

srjeda, 27. decembera 2023 spisane wot:

Přez generacije jako swjata česćena kamjentna kula je so w centralnej Indiskej jako jejo dinosawriera wukopało. W přihotach wotewrjenja wulkeho geologiskeho parka w zwjazkowym staće Madhya Pradesh su wědomostnicy swójbu zeznali, w kotrejž potajny kamjeń chowaja. W samsnej kónčinje su stajnje zaso powostanki prazwěrjatow namakali, mjez druhim hnězda z jejemi. Jedne tutych hnězdow leži njedaloko wsy swójby.

Pakety z drogami je morjo minjeny dny na pobrjohi južneje Awstralskeje připławiło. Wšo dohromady jedna so wo wjace hač sto kilogramow kokaina, policija zdźěla. Prěni paket běchu ludźo 80 kilometrow južnje metropole Sydneyja našli a policiju informowali. Policija so kedźbliwym swědkam dźakuje. Zdobom warnuja, namakanki sobu domoj wzać. Zwotkel pakety pochadźeja, njewědźa.

To a tamne (22.12.23)

pjatk, 22. decembera 2023 spisane wot:

Z trawusyčakom za sedźenje jědźeše wuměnkarka w Sontheimje nětko nakupować. Žona njewobsedźi žanu jězbnu dowolnosć a tež trawusyčak nima žanu čisłowu tafličku, policija wčera zdźěli. Zastojnicy běchu 66lětnu předwčerawšim lepili. Po informacijach policije móže tajki trawusyčak hač do 12 km/h spěšnje jěć. Žona trjeba za tajke jězdźidło w zjawnym wobchadźe jězbnu dowolnosć.

W Južnej Africe je stadło elefantow z rezerwata Ithala ćeknyła. Wobydlerjo wokolnych wjeskow běchu do toho płót wottwarili a dźěle toho předali, tamniše medije tele dny rozprawja. Nětko chcedźa zamołwići za zwěrjatami z helikopterom pytać. Elefanty drje agresiwne njejsu, ale móža wulke škody pola ratarjow zawinować, jeli so po polach z kukuricu pohibuja.

To a tamne (21.12.23)

štwórtk, 21. decembera 2023 spisane wot:

Něhdźe 3 000 jatych w Sakskej hodowne dny w swjatočnej atmosferje dožiwja. Tak su wšelake hodownički a Bože słužby předwidźane, zdźěli wčera sakske justicne ministerstwo. Zdobom wobsteja móžnosće dlěje jatych w jastwje wopytać. Zajeći smědźa sej ze swojimi dźěćimi hrajkać a paslić. Tohorunja chcedźa jatym dariki přepodać. Kuchnje w jastwach přihotuja nimo toho wšelake słódne pječenki.

Krótko do hód maja zajimcy astronomije składnosć, hwězdźiny w nocy na njebju wobkedźbować. Najwjac hwězdźinow wočakuja fachowcy 23. decembra. „Najlěpši čas, je na njebju wuhladać, je tuchwilu zahe rano wokoło 4.30 hodźin“, wuswětli předsyda zjednoćenstwa přećeljo hwězdow Uwe Pilz. Jelizo wjedrowe wobstejnosće dowola, smědźa so zajimcy na zajimawe wokomiki wjeselić.

To a tamne (20.12.23)

srjeda, 20. decembera 2023 spisane wot:

Wuměnkarski porik w Francoskej čuješe so wot čaporoweho wikowarja chětro zjebany a je na to skoržił. Tak njeznaještej hódnotu afriskeje maski a stej ju jemu za 150 eurow předałoj. Wikowar pak dósta za masku na awkciji 4,2 milionaj eurow. Skóržbu porika, zo měł so kup z lěta 2021 cofnyć, je sudnistwo w južnofrancoskim Alèsu wčera wotpokazało. Tak njeměješe wikowar čapora žanu wosebitu wědu nastupajo wuměłske objekty, sudnistwo rozsudźi.

Nižozemska železnica přewjeduje tuchwilu „tydźeń zhubjeneho plyšoweho zwěrjatka“. W běhu lěta su přistajeni železnicy w ćahach wjele tajkich dobrych přećelow dźěći našli. Fota někotrych zhubjenych a njewotewzatych pleńčatkow nětko wšědnje z małym tekstom w socialnych medijach wozjewjeja, předewzaće předwčerawšim w Utrechće zdźěli.

To a tamne (19.12.23)

wutora, 19. decembera 2023 spisane wot:

Jenož z kupanskim płašćom zdrasćeny spytaše paduch handyja w Hammje policiji wućeknyć. 37lětny přebywaše wčera w sawnje dožiwjenskeje kupjele, byrnjež tuta na tymle dnju jeno žonam přistupna była, policija zdźěli. Sobudźěłaćerjo spytachu podhladneho zadźeržeć, jako zwěsćichu, zo je šmóratko pokradnył. Tón pak skónčnje nahi ćekny a sej po puću kupanski płašć zwoblěka. Za kerkami schowaneho 37lětneho policija lepi.

Po dźesać dnjach pytanja su ludźo na juhu Indiskeje tigra popadnyli, kotryž je bura morił. Něhdźe 13 lět stare zwěrjo su na kofejowej plantaži w distrikće Wayanad našli, medije wozjewichu. Rubježne zwěrjo chcychu nětko do tigroweje stacije dowjezć. Tola wobydlerjo protestowachu přećiwo rozsudej a sej žadachu, zo měł so tiger morić. Woni so boja, zo jeho po něšto času zaso do wokoliny pušća.

Serbska debata

nowostki LND