To a tamne (08.12.23)
Curryjowu kołbasu w spódnich cholowach je muž we wobchodźe w delnjosakskim Obernkirchenje pokradnyć chcył. Detektiw wobchoda bě 50lětneho wobkedźbował, jako tón dwě tyzy hotoweje jědźe z curryjowej kołbasu do spódnjeje drasty tykaše. Paducha narěčachu, jako chcyše wón nimo kasy hić. 50lětny njeměješe dowidźenja a přistajenych wobchoda ranješe. Muž je tam mjeztym derje znaty: Jemu běchu hižo před dlěšim časom zakazali, do wobchoda přińć.
Drogi wuslědźił je policajski psyk na wuměnku w Stuttgarće při wječornym wuchodźowanju. 11lětne zwěrjo bě ze swojej 34lětnej wobsedźerku, cłownej zastojniču, při milinowym kašćiku nimo šoł a naraz zašćowkał. Zastojniča namaka na to wjacore při kašćiku přilěpjene titki z hašišom. Policija drogi sćaza. Štó bě je tam zawostajił, hišće njewědźa.
To a tamne (07.12.23)
Wo swój swětosławny symbol starosća so italske město Bologna. Wěža Garisenda so mjeztym strašnje nachila a je nuznje ponowjenja trěbna. Měšćanosta Matteo Lepore wobydlerjow hižo na to přihotuje, zo móhło saněrowanje 48 metrow wysokeje wěže ze srjedźowěka hač do dźesać lět trać a 20 milionow eurow płaćić. Wěža so hižo 3,20 m nachila. Twarscy fachowcy so boja, zo so Torre della Garisenda sypnje. Naměsto wokoło wěže su hižo w oktobru zawrěli.
Palacy so adwentny wěnc je minjeny nóc w Drježdźanach zasadźenje wohnjoweje wobory zawinił. Wobydlerka hornjeho poschoda wjaceswójbneho domu bě wohnjowu woboru wołała, dokelž so kur po bydlenju a po schodach waleše. Wobornicy woheń zhašachu, bydlenje přewětrichu a žonu zastarachu. Woni namołwjeja, palace so swěčki dohladować.
To a tamne (06.12.23)
Słužbne awto w sněze zhubił je 21lětny w Bayerskej, po tym zo bě pěši za pomocnikami pytał. Młody muž bě do hosćenca w Seeshauptće nad Starnbergskim jězorom přišoł a wo pomoc prosył. Samsny čas pak bě na to zabył, hdźe awto steji. Tež pytanje z wjacorymi pomocnikami a policistami wosta bjez wuspěcha. 21lětny so na to rozsudźi, w hosćencu přenocować a přichodny dźeń za zasněženym awtom pytać. Hač je swój wóz skónčnje namakał, policija rjec njemóžeše.
Wjace drjewa hač dotal kradnyli su w Berlinje. Policija je hač do kónc oktobra 51 padustwow zličiła. Minjene lěta běchu stajnje 30 do 40 tajkich padow měli. Najwjace drjewa pokradnychu na twarnišćach, z lěsa abo na kromje dróhow. Tež w parkach, zahrodach a twarskich wikach ludźo drjewo spakosćichu, dokelž je zaso přiběrajcy k tepjenju wužiwaja.
To a tamne (05.12.23)
Z hodownymi ćahami chce w Litawskej statne železniske předewzaće Lietuvos Gelezinkeliai wjace ludźo pohnuwać, ćahi wužiwać. Hač do 7. januara zasadźuja w čłonskim kraju EU na štyrjoch čarach ćahi ze swjedźensce wupyšenymi wagonami, kotrež su z hodownymi štomami a druhimi tradicionalnymi swjedźenskimi symbolemi wudebjene. Akciju přewjedu hižo třeći króć. Minjene lěta su we wupyšenych ćahach hač do 74 000 přidatnych sobujěducych zličili, železnica zdźěla.
Šofera taksija je policija w Japanskej zajała. Mužej wumjetuja, zo je hołbja wotpohladnje přejěł a tak zakoń wo škiće dźiwich zwěrjatow ranił. 50lětny bě při ampli šwitu hołbjow na dróze widźał. Jako bě ampla zelena, muž hnydom pospěši a do hołbjow zajědźe. Při tym jednu z nich přejědźe. Po zajeću so wón zakitowaše, pokazujo na swoje prawo, dróhu wužiwać.
To a tamne (04.12.23)
Amplowy mužik w kolesatym stole pokazuje so wot najnowšim w Londonje. Runoprawnje wužiwaja na někotrych amplach britiskeje stolicy tež žony w tajkim stole. Přičina nowostki je wčerawši mjezynarodny dźeń zbrašenych. Nastorčił bě akciju trójny olympiski dobyćer we wjesłowanju Pete Reed, kiž sedźi wot 2019 po infarkće w kolesatym stole.
Na wšěch 59 króć přez teoretiske pruwowanje jězbneje dowolnosće přepadnył je jězbny šuler w jendźelskim Birminghamje. Hakle při 60. pospyće je wobstał. Płaćili su njeličomne pospyty šulerja abo šulerku – splah njeje znaty – 1 600 eurow. Po informacijach britiskeho wobchadneho ministerstwa je naposledk 44 procentow wšěch šulerjow a šulerkow teoretiske pruwowanje w prěnim pospyće wobstało. 59 přepadnjenych pospytow je rekord w lěće 2023, sćelak BBC rozprawja.
To a tamne (01.12.23)
Mobilne telefony na šulach zakazać chcedźa w Nowoseelandskej. Nowe konserwatiwne knježerstwo zdźěla, zo budźe we wólbnym boju připowědźeny plan w běhu sto dnjow přesadźeć. Po tutym puću chcedźa koncentraciju a wukony šulerjow stopnjować. Francoska bě handyje w šulach hižo 2018 zakazała, w Nižozemskej a Wulkej Britaniskej wo tym rozmysluja. Němska drje tež wo tym diskutuje, zwjazk wučerjow pak je so hakle njedawno přećiwo zakazej wuprajił.
Na wšěch 555 hodownych štomow z plasty w swojim domje nastajiłoj staj Thomas a Susanne Jeromin w delnjosakskim Rintelnje. Rekordny institut Němskeje je porik wčera wopytał, zo by zybolacu so zběrku jako nowy swětowy rekord připóznał. Před lětomaj měještaj hišće 444 štomow. Njewšědny dohodowny konik pěstujetaj mjeztym dwanaće lěta.
To a tamne (30.11.23)
Na policajsku stražu doběžała je psyca w nižosakskim měsće Peine pola Hannovera. Za zwěrjećom běchu cyły dźeń pytali. Do toho bě 66lětna wobsedźerka při wuchodźowanju do kolesowarja zrazyła. Na to bě so psyca wustróžiła a ćeknyła. Přichodny dźeń wuhladachu ju wokoło policajskeje straže. Jako zastojnicy durje wočinichu, psyca do zachoda skoči. Tam so policisća wo nju starachu.
Zhubjenych přeprošenjow dla su měšćanski jubilej z tysac hosćimi w bayerskim Freyungu wotprajili. Wulki dźěl přeprošenjow njeje hosći docpěł, měšćanske zarjadnistwo zdźěla. Město běchu informowali, zo drje su přeprošenja na póstowym puću něhdźe tčacy wostali. Tohodla su so zamołwići rozsudźili, swjedźeń wotprajić a klětu nachwatać. Přeprošenja běchu 16. nowembra rozesłali.
To a tamne (29.11.23)
Narodny hodowny štom powalił je wichor w stolicy USA Washingtonje. Na wobrazach bě wčera wječor hoberski ležacy štom widźeć, někotre lampički so hišće swěćachu. Kran běchu hižo nastajili. Dwanaće metrow wysoki štom steji bjezposrědnje při Běłym domje. Prezident Joe Biden chce swěčki na štomje jutře zhromadnje ze swojej mandźelskej Jill symbolisce zaswěćić a tak dohodownu sezonu oficialnje zahajić. We Washingtonje so tuchwilu mócnje wichori.
Dinosawrier je wotnětka nowy oficialny symbol awstralskeho zwjazkoweho stata Queensland. Muttaburrasaurus, kiž bě před sto milionami lětami w Awstralskej žiwy, je tak prěni fosilny emblem kraja. Tuchwilu su to koala, Great Barrier Reef a orchideja Cooktown. Z nowym symbolom chcedźa turizm wožiwić, kiž měri so přiběrajcy na fosilne namakanki w kraju.
To a tamne (28.11.23)
Zabyta pistola na nuzniku tankownje je w Stralsundźe zasadźenje policije a wosebiteje antiteroroweje jednotki zawiniła. Stražnik bě rewolwer z pjeć patronami na nuzniku zabył. Jako so na to dohlada, bě pistola preč. Krótko po nim bě dalši muž na nuzniku był a pistolu sobu wzał. Policija pak muža po wobšěrnym přepytowanju wuslědźi a toho bydlenje přepytowaše. Při tym rewolwer namakachu. Dwě kulce pak pobrachowaštej: Muž bě je na brjoze morja do powětra třělił.
98 hodownych štomow z wjace hač 142 000 lampičkami – to je lětuša hodowna dekoracija Běłeho domu. Jill Biden, mandźelska prezidenta USA, je pychu knježerstwoweje centrale we Washingtonje wčera předstajiła. Něhdźe 300 dobrowólnych pomocnikow je minjene dny wšitko spřihotowało a 34 000 hodownych kulow powěsnyło.
To a tamne (27.11.23)
Moderatorej Thomasej Gottschalkej je so telewizijny sćelak ZDF po poslednim wusyłanju show „Wetten das..?“ minjenu sobotu dźakował. „Wjeselimy so nad wulkim wothłosom tuteje show z Thomasom Gottschalkom a prajimy hišće raz dźakuju za njezapomnite wokomiki.“ Gottschalk je cyłkownje 154 wusyłanjow woblubowaneho telewizijneho klasikarja přewodźał. Kak ze show dale póńdźe, chce sćelak „w prawym času“ rozsudźić.
Drogi město kuchinskeho nastroja je posoł 74lětnemu w zapadnym wokrjesu Bodamskeho jězora domoj přinjesł. Muž informowaše policiju, po tym zo bě marihuanu a hašiš w posyłce namakał, nic pak skazanu kuchinsku mašinu. Prawdźepodobnje bě póst pakćik zaměnił, policija zdźěla. Skazał bě starc nastroj w interneće. Policija nětko za woprawdźitym adresatom drogow pyta.
