Zapósłane (20.06.17)

wutora, 20. junija 2017 spisane wot:

Jan Wjenk z Wotrowa piše: Na přihotach a wonkownym wuhotowanju ryzy serbskeho kwasa Sofije Wróblec a Mariana Wjenka z Wotrowa sobotu, 10. junija, ale tež druhich swjedźenjow mam za wažne, tež jónu wutrobny dźak a zapłać Bóh Monice Cyžowej wuprajić, kotraž fundus serbskeje drasty w Róžeńće z wulkej prócu wěcywustojnje wudźeržuje a dźerži. Někotružkuli žonu a holcu je wona hižo fachowsce poradźowała a pomhała dostojnosć narodneje drasty z wobsahom jednotliwych dźělow hromadu zestajeć, ju wotpowědnje poručić a wupomhać. Naše byće a traće njesmě so na žadyn pad pozhubić. Narodnosć a nabožnosć słušatej hromadźe.

Jurij Łušćanski z Budyšina přispomnja: W rańšim magacinje ARD pokazachu minjeny­ pjatk přinošk wo štwórtkownym swjedźenju Božeho ćěła w Chró­sćicach. Předstajichu swójbu Tadeja Cyža, wosebje družku Paulinu. Přinošk Olenki Pilz wusyłachu w rjedźe sćelaka „Woran glaubst Du?“ Kaž redaktorka zwěsći, bě jej­ cuzy nabožny swět dožiwiła, a skónči reportažu z prašenjom: „Što wěrju ja?“

Na festiwalu chcemy derje wobstać

štwórtk, 08. junija 2017 spisane wot:

Serbski folklorny ansambl Wudwor wjeseli so nad kóždym rejwarjom/rejwarku, kotryž/kotraž so ćělesu přidruži. Alfons Wićaz je so někotrych młodych sobuskutkowacych prašał, što so jim lubi a na čo so hižo wjesela.

Bernadet Zahrodnikec z Jaseńcy: Mi so w skupinje wosebje tež zhromadnosć lubi. Tohodla so na kóždu probu wjeselu. Sym na naš wustup na folklornym festiwalu jara wćipna. Chcemy tam jara derje wobstać. A runje tak wćipna sym na wukrajnych hosći, na rejwarki a rejwarjow. Najrjeńša a najzajimawša za mnje je naša „Burska reja“, dokelž je temperamentna.

Pawoł Haška ze Serbskich Pazlic: W dorostowej skupinje smy ze mnu sedmjo ze 7. lětnika na Budyskim Serbskim gymnaziju. Skutkuju wot lońšeho decembra sobu. Tule sobu rejwać mi wulke wjeselo wobradźa. Proby so mi lubja. A rjenje bě w treningowymaj lěhwomaj. Pomhamy sej mjez sobu. Dyrbimy pak na probach hišće disciplinowaniši być.

Stare fotografije wuraz identity

pjatk, 02. junija 2017 spisane wot:

Drježdźany (ML/SN). „Fotografija je sej přiběrajcy wšědny dźeń serbskeje wjesneje ludnosće zdobyła, na přikład jako foto wo kwasu, swójbje abo jako dopomnjenka na wojersku słužbu. Na zbožo, hewak njebychu mnohe fota nastali, kotrež su zapřijate do wot Jürgena Maćija wudateho zwjazka ‚Wotmolowane – Historiske fotografije serbskeje Hornjeje Łužicy‘. K tam přiwzatym wobrazam słuša dopomnjenske foto wo wopyće serbskich reprezentantow 1889 na sakskim kralowskim dworje na 800. jubileju rodu Wettinow.“ Takle wopisuje Christian Ruf w nimale cyłostronskim přinošku „Kusk zadźeržaneho časa“ dźenika Dresdner Neueste Nachrichten nowostku Ludoweho nakładnistwa Domowina.

Na rozmołwje pola fararja Wita Sćapana

štwórtk, 01. junija 2017 spisane wot:

Dmitrij Kapitelman, němskorěčny spisowaćel, žurnalist a hudźbnik, běše jako dźěćo židowskeje swójby do Němskeje přišoł. Na štyri njedźele přesydli so wón z Berlina-Neuköllna do Budyšina. Za nowinu Die Zeit spisa w tym času kolumnu „Unter Deutschen“, w kotrejž tematizuje zadźěwki integracije. W 10. slědźe wozjewi renoměrowana nowina reportažu „W patchworkowym Božim domje dožiwjam nana Sćapana połneho přećiwkow“.

Tři rysowanki tworja horni ramik přinoška: Tachantska cyrkej pozběhuje so nad domami a wěžemi k pomróčenemu njebju, srjedźa zwobraznja moderny wuměłc wupřestrětu ruku a pódla steji katolski tachantski farar, dekan a prelat za wołtarjom simultaneje cyrkwje.

Wo wustajeńcy wo reformaciji

srjeda, 31. meje 2017 spisane wot:

Lipsk (ML/SN). „Wulka próca tči za wustajeńcu. Wysoko hódnoći wona kulturne herbstwo, zbudźa hordosć na serbskich prjedownikow we Łužicy a dopokazuje jednotu mjez rěču a wěru. Muzejownica Andrea Pawlikowa k tomu rjekny: ,Bjez wěry njebychu mnohe tradicije byli. Wustajeńca je dźěl cyłkowneho projekta Wobliča reformacije w Hornjej Łužicy, Čěskej a Šleskej.‘“ Takle piše Andreas Kirschke­ w tydźeniku Ewangelsko-lutherskeje krajneje cyrkwje Sakska Der Sonntag pod nadpismom „Reformacija po serbskim“ wo nowej wosebitej wustajeńcy Budyskeho Serbskeho muzeja „Pjeć lětstotkow – Serbja a reformacija“.

Zapósłane (30.05.17)

wutora, 30. meje 2017 spisane wot:

Sieghard Kozel ze Stróže piše ze swojeho dowola wo dožiwjenjach na kromje wjerška G 7:

Sicilska bě minjeny kónc tydźenja hosćićelka wjerškoweho zetkanja statow G 7. Smědźach tole jako „wočiswědk“ sobu dožiwić.­ Wočakowanja na podawk njeběchu hižo wulke, a wuslědki wostachu daloko pod nimi. Nawal kołowokoło tohole zetkanja sebjewuzwolenych najsylnišich sydom statow swěta pak bě enormny. Hdźežkuli sy był, wšudźe bě sćin podawka pytnyć. Nowina La Sicilia we wosebitym wudaću wulce wozjewi „G7 Taor­mina – kupa drje je centrum swěta“.

Na zwonkownosćach njeje pobrachowało. Taormina, městačko z 11 000 wobydlerjemi na wyšinje horin Peloritani, je mjez turistami jara woblubowane. Tež ja sej rady tam dojědu, sym-li na Sicilskej. Naraz pak bě wšo hinak. Hižo na lěta­nišću Catania mjerwješe so z wojakami. Dróha do bliskeho předměstačka Letojanni bě zdźěla zaraćena a wobsadźena z wojakami w połnym wuhotowanju a z mašinowymi třělbami. W hotelu Antares­-Olimpia bě dohromady 600 policistow a wohnjowych wobornikow. Dwaj dnjej bě pobrjóžna dróha zjawnosći zakazane pasmo – kaž oficialnje wozjewichu.

Zapósłane (26.05.17)

pjatk, 26. meje 2017 spisane wot:

Trudla Malinkowa z Budyšina piše:

Rubrika „Spomnjeće“ w Serbskich Nowinach z 22. meje bě wěnowana Korli Awgustej­ Fiedlerjej, zasłužbnemu serbskemu wučerjej a hudźbnikej składnostnje jeho stotych posmjertnin. Při tym so tež naspomnja, zo je w Budyšinje dróha po nim pomjenowana. Budyska Fiedlerowa dróha je w nowym měsće njedaloko Mosta měra. Nažel pak njeje po zasłužbnym Serbje pomjenowana, ale po prawizniku a dobroćelu města Budyšina. Na to pokaza wučer a domizniski slědźer Felix Wilhelm 1935 w swojim spisu „Die Bedeutung der Gassen- und Straßennamen im alten und neuen Bautzen“, hdźež rěka: „Fiedlerstraße. Carl Traugott Fiedler, Kgl. Sächs. Auditeur und Oberamtsgerichtsadvokat in Bautzen, hinterließ sein Vermögen im Gesamtbetrage von 135 665,08 Mark unter dem 4. Oktober 1826 den Stadtarmen, den Zöglingen des Waisenhauses und den Bürgerschützen.“

Wo runoprawosći w napisach

srjeda, 17. meje 2017 spisane wot:

Drježdźany (ML/SN). Čehodla njeje móžno­ serbske mjeno na wjesnu taflu w samsnej wulkosći kaž němske pisać. Tole praša so zadźiwana zapósłanča Zelenych w Sakskim krajnym sejmje Franziska Schubert. Nowina Dresdner Morgenpost wěnowaše problematice wobšěrny přinošk pod nadpismom „Zwada wo 35 milimetrow“. Němske mjena na wjesnych taflach su mjenujcy 105 milimetrow wulke, serbske jeno 70, „dokelž njeje tole pječa normowaneje wulkosće dla hinak móžno“. Tak cituje nowina sak­skeho wobchadneho ministra Martina Duliga (SPD). Tón wšak přiznawa, „zo by runje tak wulke pismo hódne było a Serbskemu zakonjej a sakskej wustawje wotpowědowało“.

Zapósłane (12.05.17)

pjatk, 12. meje 2017 spisane wot:

Lothar Röhr, hudźbny nakładnik z Niederhausena pola Frankfurta nad Mohanom, je předstajeni oratorija „Serbske jutry“ w Drježdźanach a Budyšinje sobu dožiwił. Wón piše:

Hižo někotre lěta mam wjeselo, z Janom Cyžom hromadźe dźěłać, hač při wobstaranju notow za Serbski ludowy ansambl abo jako nakładnik jeho kompozicijow. Tak sym tež noty za jutrowny oratorij wudał. Jako mi komponist zdźěli, hdy so twórba předstaji, sym spontanje do Budyšina jěł. Činjach to tež, dokelž je Budyšin jara rjane město. Tam mi zmóžnichu, z hudźbnicami a hudźbnikami w busu ansambla sobu do Drježdźan jěć směć. Wšitko přijomni ludźo z wjele humorom. Dožiwich zwučowanje, kak měłoj so chór a orchester we wołtarnišću Dwórskeje cyrkwje prawje zestupać a zesydać, hladajo na wulku ličbu po cyrkwi běhacych turistow njebě to zawěsće jara přijomna naležnosć. W 15.30 hodź. so koncert skónčnje zahaji.

Dalše kapacity trěbne

wutora, 09. meje 2017 spisane wot:

Dźěłanišćo za serbske kubłanske wuwiwanje (ABC) w Choćebuzu zhladowaše wčera ze swjatočnosću na 25. róčnicu załoženja. Milenka Rječcyna je měnjenja přitomnych gratulantow zestajała.

Claudia Kosacowa, referentka za serbske naležnosće w ministerstwje za kubłanje, młodźinu a sport: Před tydźenjomaj móžach so wo bohatosći nadawkow a wo projektach ABC přeswědčić. Sym přeco hišće połna zaćišćow wo angažemenće a motiwaciji, z kotrejž tu dźěłaja. Skutkowanje sobudźěłaćerjow ma nošnu rólu při posrědkowanju delnjoserbšćiny wosebje při zwoprawdźenju we wučbje, a to tež dalše 25 lět.

Cornelia Orphal, zastupowaca nawodnica statneho šulskeho zarjada Choćebuz: Dr. Christiana Piniekowa předstaji wuknjenske a wuwučowanske srědki, kotrež ABC wuwiwa. Byrnjež jara měrnje wustupowała, namołwi wona cyle wědomje šulski zarjad, skutkować jako multiplikator. Prošu wo dalše dobre zhromadne dźěło mjez wšitkimi partnerami, zo by so w našim regionje serbskosć zachowała. Jako šulski zarjad smy wjeseli, zo podpěruje nas ABC při pytanju a zdobywanju wučerskeho dorosta.

nawěšk

SERBSKE NOWINY podpěruja:

fueorg misain karten sorbisch

  • Lětuši 12. mjezynarodny folklorny festwial "Łužica 2017" je zahajeny. Wčera so skupiny we wobłuku swjedźenskeho ćaha po Budyšinje kaž tež na zahajenskim programje předtsajichu. Tule namakaće někotre impresije wo zahajenju festiwala. Fota: SN/Maćij Bu