Hinc Cuška z Budyšina wo aktualnym wusyłanju magacina „Wuhladko“ piše:

Ze zajimom sćěhowach přinošk wo rozsudźe předsydy Domowiny Dawida Statnika, w Budyskim wo­krjesnym sejmiku za namjet AfD hłosować. Chětro so dźiwach, zo rjad profilowanych serbskich wosobow wotpokaza, so zjawnje k tomu zwuraznić. Měnju, zo smě tež předsyda Domowiny po swojim přeswědčenju stronje přisłušeć, zo njesměł so pak we wšěm stronskej disciplinje kłonić.

Elwira Hančo ze Slepoho wupraja so k přinoškej wo „Slepjanskim dźěćetku“ na Wjacławskich wikach w Budyšinje (SN 23. decembra 2022). Wona je čłonka towarstwa „Kólesko“ a awtorka knihi „Gładźarnica“, w kotrejž wopisuje drastu dźěćetkow.

Njepřemyslena akcija, kotruž drje su organizatorojo za dobru ideju měli, je w Slepjanskej wosadźe wulki hněw zbudźiła: jako su na hodownych wikach w Budyšinje dźěćetko našeje wosady napodobnili, a to hišće do 1. adwenta! Tuta groteskna scenerija „Slepjanskeho dźěćetka“ ze swojimi přewodźerkami běše mi hrózbny napohlad, přetož ze Slepjanskej drastu so woprawdźe wuznaju. Njewěm ani, što je mje bóle mjerzało: hač wopak a njerodnje zdrasćene holcy abo zo bě tónle wustup w Budyšinje wot poprawneho nałožka dospołnje wotrěznjeny.

Stanij Statnik z Ralbic: Moje wosobinske měnjenje k rozprawnistwu w Serbskich Nowinach z 28. nowembra a 15. decembra 2022:

We wudaću Serbskich Nowin 28. nowembra 2022 móžachmy na lokalce dosć wobšěrny přinošk Jana Krala wo posedźenju Ralbičanskeje gmejnskeje rady ­čitać. A tu wosebje wo prócowanju ­Mišnjanskeje firmy na płoninje mjez ­Šunowom a Smjerdźacej nastajić na 70 hektarach!!! fotowoltaikowu připrawu (do samsneho směra dźěchu w zašłosći prócowanja klóštra wo nastajenje wětrnikow na tutej płoninje).

Najprjedy jónu je to zwjeselace, zo njeje so přespěšny rozsud tworił, hladajo tež na powabkowy pjenježny „ćopły“ dešć.

Prawje mam wothłós wjetšiny radźićelow, do rozsuda zapřijeć wobydlerjow w formje wobydlerskeje zhromadźizny. Nje­zrozumliwje je mi w tutym zwisku ­namjet Tomaša Bjeńša, zo ma gmejnska rada tworić jednohłósne měnjenje a so hakle potom na wobydlerstwo wobroćić (z poslednich temowych diskusijow w gmejnskej radźe abo we wuběrkach ­wěmy, zo woznamjenja jednohłósne měnjenje wot Tomaša Bjeńša). Hač je Tomaš Bjeńš hižo zabył, štó su byli jeho wolerjo a z kajkim narokom?

Alojs Nawka reaguje z mejlku na přinošk Serbskich Nowin 23. decembra:

Fatalita

Čitajo Serbske Nowiny z 23. decembra 2022 na prěnjej stronje (přinošk z Chrósćic z nadpismom „Hórnikowa“ abo „Hórnikowa dróha“?) spodźiwach so jara. Na přisłušacym wobrazu wuhladaš dwaj pućnikaj w Chrósćicach: „Hórnikowa dróha“ a katastrofu „Ćišinskowa dróha“. Tajkele skomolenje Ćišinskeho je kaž fawca do serbskeje duše; to ći črije zuje. Prawje ma rěkać „Ćišinskeho dróha“ abo „Dróha Ćišinskeho“.