Hamburg (SN/BŠe). Na 40. Hamburgskej pućowanskej přehladce, hdźež móža so wopytowarjo wo najwšelakorišich idejach dowola wobhonić, je tež Łužica sylnje zastupjena. Hnydom pjeć poskićerjow ma wot wčerawšeho hač do njedźele w měsće na sewjeru Němskeje wustajenišćo. Z połnym kófrom idejow je Budyska turistiska informacija runje tak prezentna kaž Žitawska. Hač łužiska jězorina abo Łužiske hory – wšitko je w regionje bliske a po krótkich pućach docpějomne. Wažny to argument za wotměnjawy dowol.

Pućowanje je tež tema turistiskeho zjednoćenstwa Hornjołužiske hory, kotrež je w Hamburgu zastupjene. Budyski hotel Best Western wosrjedź 1 000lětneho města wabi na wikach tohorunja z bohatym poskitkom. Mjez druhim pokazuje na woblubowany hosćenc „Lubin“, hdźež wobkuzłuja kucharjo swojich hosći z regionalnymi a mjezynarodnymi jědźemi. Runje tak za sprjewine město wabja měšćanscy wodźerjo. Pod wšelakimi temami móža zajimcy jónkrótne wodźenja po Budyšinje knihować.