Drježdźany (dpa/SN). Ličba rjemjeslniskich zawodow w Sakskej je loni snadnje woteběrała. Kaž forum rjemjesła wčera wozjewi, steješe 3 212 přichadam 4 014 wotchadow napřećo. Ličba firmow je wo 1,4 procenty niša. Za jednu z hłownych přičin maja fakt, zo su so mnozy solosamostatni wróćo sćahnyli. „Dalokož su powołansce kwalifikowani, su mnozy z nich jako socialneho zawěsćenja winowaći přistajeni do wubědźowanja kmanych rjemjeslniskich zawodow přešli. Tajke su na přikład w twarskim a we wutwarnym přemysle“, kaž rěkaše.
Nimo toho su přemysło ze starobnych přičin a předewšěm na wsach wotedali. „Druhdy so kwalifikowani rjemjeslnicy njeatraktiwnych wobłukowych wuměnjenjow dla, kaž su to brěmjenja statneje běrokratije we wobchodniskim wšědnym dnju, natwara swójskeje powołanskeje eksistency boja“, mjenowaše Sakski forum rjemjesła dalšu přičinu.
Swinjaca mrětwa w Choćebuzu
Niska (UM/SN). „Niska jedna“ – pod tutym hesłom steješe wčera 15. pominanska straža Nišćanskich wagonotwarcow. Wona pak njeje so před wrotami zawoda wotměła, ale zahaji so jako manifestacija na Naměsće młodźiny. Z toho sformowaše so protestny ćah z něhdźe 300 wobdźělnikami po hasach nutřkowneho města. Namołwu „Niska jedna“ móhli w dwójnym zmysle rozumić: Na jednej stronje jako znamjo, zo wagonotwarcy dale trajace mjelčenje jednaćelstwa Tatravagonka AG k přichodej twornje njeakceptuja a nětko sami jednaja. Na tamnej stronje su so wobchodnicy a wikowarjo k najwjetšemu zawodej města wuznawali. „Njeje žanoho wobchoda, kotryž žadyn poćah k wagonowni nima“, rjekny Nišćanski citymanager André Schulze. Wón je akciju koordinował. „Wšudźom su mi prajili: Mój nan je tam dźěłał, mój bratr tam dźěła. Kóždy ma w tajkim městačku něšto z najwjetšim zawodom činić.“ Wotpadnje-li wagonownja jako dźěłodawar, dyrbja z wotćehnjenjom mnohich potrjechenych swójbow ličić. To ma njepřewidźomne sćěhi za kupnu móc w měsće.
Lubin/Slopišća (SN). Tradicionalne zarjadowanje za zajimowanych rybarjenja wobydlerjow Błótow biosferowy rezerwat Błóta a wokrjes Dubje-Błóta tež lětsa zaso wuhotujetej. Wudźerjo, rybarjo a fachowcy su 11. měrca na 16. dźeń mjenka (Quappe) do Slopišća (Schlepzig) přeprošeni, zo bychu so nastupajo nowe dopóznaća kołowokoło wodoweho swěta w Błótach a wokolinje wuměnili.
Nowy Life-projekt Europskeje unije je spěchowanju zestawy rěčneje mušle (Bachmuschel) wěnowany. Wo tym Maria Böhme z Přirodoškitneho fondsa Braniborskeje přednošuje. Rybarski biologa Frank Fredrich rozprawja wo zetkawanjach z „wulkimi a małymi rybami“ kaž tež wuslědkach jeho rybyłójenja w Błótach a w jich wokolinje. Wo přičinach a konkluzijach katastrofy Wódry loni w awgusće z wosebitym wusměrjenjom na sćěhi za žiwota na a we wodźe Christian Wolter z Leibnizoweho instituta za ekologiju wodźiznow a nutřkowne rybarstwo porěča. Přiběraca problematika niskeje wody w Błótach je tema Eugena Nowaka ze zarjadnistwa tamnišeho biosferoweho rezerwata.
Ottendorf-Okrilla (SN/mb). Policija je hižo wčera rozpušćenje protestneho campa w Łužničanskej holi zdokonjała. Popołdnju su policisća poslednju „wobsadźerku“ z terena wotwjedli, hdźež dźěłaćerjo statneho zawoda „Sakski lěs“ nětko štomy porubaja, zo by šćerkownja KBO na zakładźe zrěčenja z 90tych lět tu šćerk wudobywać móhła. Žona běše so w mobilnym nuzniku schowała, kotryž so mjez štomomaj na paleće znošowaše. Po informacijach policije njebu při zrumowanju campa nichtó zranjeny.
W Lipsku su so štyri jězdźidła zawoda „Sakski lěs“ wotpalili, wěcna škoda wučinja znajmjeńša sto tysac eurow. Policija tuka na zapalerstwo a njewuzamkuje zwisk z połdra lěta trajacym a nětko z policajskimi srědkami zakónčenym protestom we Łužničanskej holi. Krajny kriminalny zarjad je přepytowanje pada přewzał. W Drježdźanach su sympatizanća protesta fasadu a wokna běrowa Zelenych z parolemi pomórali – woni z tym zdźeržliwosć sakskeho zeleneho ministra za wobswět, Wolframa Günthera, w tutym rozestajenju kritizuja.
Ottendorf-Okrilla (SN/mb). Statny zawod „Sakski lěs“ je we Łužničanskej holi z porubanjom 7,5 hektarow lěsa započał. Wot wčerawšeho je tysac policistow z wjacorych zwjazkowych krajow w třoch změnach z rozpušćenjom protestneho campa přećiwo wudobywanju šćerka zaběranych. Dźens rano bě hišće třiceći „wobsadźerjow“ lěsa přitomnych, kaž Serbskim Nowinam na naprašowanje rěčnica policije, Katharina Korch, zdźěli. Mjeztym pak su dalši dobrowólnje teren wopušćili. Na naprašowanje našeho wječornika, čehodla trjebaš na kóždeho aktiwista 33 policistow, wona wotmołwi: Je hač do dźesać stotkow kóždy dźeń 24 hodźin w lěsu, wězo nic wšitke samsny čas, kotrež nimaja jenož demontažu domčkow na štomach, ale mjez druhim tež zahrodźenje tych 7,5 hektarow na starosći, kotrež chce „Sakski lěs“ hač do kónca měsaca na zakładźe zrěčenja z 90tych lět šćerkowni KBO Ottendorf-Okrilla bjez štomow přepodać. Předewzaće je w rukach horstki swójbow z Badensko-Württembergskeje, po informacijach Sakskich Nowin je towaršnik z najwjetšim podźělom „Dom Württembergska“, kiž słuša do němskeho wysokeho zemjanstwa.
Łužiski kruh wobsteji z 58 městow a gmejnow w Braniborskej a Sakskej. Krajej přesahowace zwjazkarstwo zastupuje zajimy regiona wot lěta 2016. Wo faciće lěta 2022 je Andreas Kirschke z Christinu Herntier rěčał. Wona je njestronska měšćanostka Grodka a rěčnica delnjołužiskich komunow we Łužiskim kruhu.
Knjeni Herntier, kak posudźujeće lěto 2022 za Łužiski kruh?
Choćebuz (SN/at). Zwjazkowy hospodarski minister Robert Habeck (Zeleni) chce hač do lěta 2030 tež we Łužiskim rewěrje wudobywanje a zmilinjenje brunicy zakónčić. Nětko je wón njewočakowanu podpěru z prominentneho městna dóstał. W njedawnym telewizijnym interviewje je Torsten Kramer, nawoda předsydstwa Łužiskeje energije a milinarnje (LEAG), rjekł: „Móžu sej wězo předstajić, zo njeje LEAG w lěće 2033 wjace wot wuhla žiwa.“ Wuprajenje sobudźěłaćerjow LEAG znjeměrnja a zamyla. Wšako běža jamy a milinarnje tuchwilu na hranicy wukonitosće a předewzaće dyrbješe tysac dźěławych přidatnje přistajić, zo by produkcija wšudźe zaručena była.
Swoje słowa je Kramer na informaciskim zarjadowanju sobudźěłaćerjow wutoru rano w „Suhlskim klubowym domje“ w Čornej Pumpje wujasnił. Wón je za sebje ličił. Radźenje planow za Gigawattowu factory a rosćace płaćizny za CO2-certifikaty su wuchadźišća za to, zo je lěto 2033 mjenował. Kramer na zarjadowanju zdobom rjekny: „My jako LEAG k lětu 2038 jako kóncom wudobywanja a zmilinjenja brunicy stejimy.“