Choćebuz (SN/MiR). Šula za delnjoserbsku rěč a kulturu Choćebuz swjeći tele dny žadny jubilej. Z konferencu póndźelu, 26. septembra, wot 15 hodź. na žurli Choćebuskeje radnicy chcetej šula a župa Delnja Łužica na to skedźbnjeć, zo přewjeduja so rěčne kursy delnjoserbšćiny mjeztym 65 lět. Dr. Pětš Šurman ze Serbskeho instituta přednošuje tam wo stawiznach tychle kursow.

„Nadźijam so póndźelu na mnohich, kotřiž su so něhdy na jednym z kursow delnjoserbšćiny wobdźělili abo je na­wjedowali“, měni nawodnica kubłanišća Marja Elikowska-Winklerowa, „wosebje wćipna sym na tych, kotřiž su z Hornjeje do Delnjeje Łužicy přišli, zo bychu tule delnjoserbšćinu wuknyli. Wjacori z nich su so po kursu zaso do swojeje domizny nawróćili.“ Jara zajimuje so nawodnica šule za dopomnjenki wobdźělnikow a za dokumenty, kotrež móža ludźo tež do Choćebuskeho kubłanskeho zarjadnišća słać. Wšako je so tójšto originalnych wobrazow w běhu lět zhubiło abo zničiło.