Serbske kubłanske srjedźišćo LIPA zetkanišćo generacijow
Smjerdźaca (SN/MiR). Swójbne a kubłanske srjedźišćo LIPA je w minjenym semestrje wjace hač 300 zajimcow ze swojimi poskitkami přiwabiło. Zapřijeći do ličby njejsu ani hišće ći, kotřiž přebywachu na swójbnym kóncu tydźenja loni w decembru w Smochćicach.
„Smy jara wjeseli, zo mamy telko wobdźělnikow na našich poskitkach. Wšako maš po wšej Łužicy atraktiwny wuběr na mnohich polach“, rozłožuje nawodnica LIPY Lucija Handrikowa, „smy tuž stajnje zaso překwapjeni, zo su nam naši kursisća tak swěrni.“ Wosebje požadane, kaž nazhonjenja mnoholětneho skutkowanja pokazuja, su strowotniske kursy. A tych maja cyłkownje jědnaće wob tydźeń. Wosebje woblubowane su tajke za maćerje z małymi dźěćimi. W času, kaž maćerje w kulturnym domje sportuja, su jich dźěći w LIPJE zastarane. Derje wužiwanej stej tež dźěćacej sportowej kursaj w Smjerdźacej a Chrósćicach. Rejwanska skupina za chowancow pěstowarnje w Smjerdźacej je tohorunja woblubowana.
