Radworscy šulerjo so z powołanjemi rozestajeja
Radwor (SN/BŠe). Znate přisłowo „Bjez prócu a potu njepřińdźeš k złotu“ je tónle tydźeń hesło předmjety zwjazowaceje wučby na Radworskej zakładnej šule „Dr. Marja Grólmusec“. „Kóžde šulske lěto wosebitu wučbu přewjedujemy. Lětsa zaběramy so z powołanjemi. Ideju su šulerjo a wučerjo w naprašowanju namjetowali“, rozłožuje nawodnica zakładneje šule Brigita Grundmannowa. W běhu projekta nazhonjeja dźěći wot 1. do 4. lětnika, zo je wažne stajnje pilnje wuknyć, wšako tole za pozdźiše žiwjenje nuznje trjebaja. Runje tak dóstawaja šulerjo dohlad do najwšelakorišich powołanjow, hdźež jim na přikładach rozkładuja, kotre předmjety su za wukubłanje wosebje wažne. Hladajo na powołanje policista stej to na přikład němčina a sport. Dale je předwidźane we wobłuku projekta wšelake zarjadnišća a předewzaća kołowokoło Radworja wopytać.