Situacija na Budyskej Serbskej zakładnej šuli, nastupajo šulskich nowačkow za šulske lěto 2023/2024, je dale ze starosćemi zwjazane. Krajnoradny zarjad je na naprašowanje Serbskich Nowin reagował.
Budyšin (SN/MiR). Hač na jedyn pad, hdźež maja w jednym lětniku tři rjadownje, ma Budyska Serbska zakładna šula lětnje dwě rjadowni. Kubłanišćo je tak mjenowana dwučarowa šula. Tež w šulskim lěće 2023/2024 ma tomu tak być. Krajnoradny zarjad, jako nošer, njewidźi tuchwilu kapacity za to, tři rjadownje, tež hdyž je dosć dźěći přizjewjenych, zarjadować. Wšako pobrachuje na kubłanišću kapacita za wutworjenje dalšich rumnosćow. „Na zakładźe wobšěrneho wobtwarjenja ležownosće njewobsteji móžnosć rozšěrjenja“, zdźěli zarjad na naprašowanje SN. To rěka, zo njemóža tam přitwarić abo na nowotwar myslić.
Kóždolětny europski projektowy dźeń zmóžnja rozmołwu mjez politikarjemi na runinje EU, Zwjazka a krajow ze šulerjemi. Zaměr je, zrozumjenje za to pohłubšić, kak EU dźěła, zdobom tež zajim za europski projekt zbudźić.
Budyšin (SN/MG). Hdyž hrajetej Valerie a Wilhemina w małej žurli Budyskeho Dźiwadła na hrodźe, dyrbja wšitcy druzy změrom być. Katka Pöpelec, kotraž z dźěćimi Žylowskeho horta we wobłuku Dnjow serbskeho dźěćaceho dźiwadła na jich kruchu „Ptaškowa swajźba“ dźěła, na to kedźbuje. Na jewišću so delnjoserbsce hraje, hdyž pak Pöpelec přikazy dawa, wona to w němskej rěči čini. To zaleži na snadnym rěčnym niwowje dźěći, kaž mi přeradźi. „Zakładne znajomosće drje dźěći maja a wěste wěcy tež rozumja. Na kóždy pad pak so wone jara prócuja“, Katka Pöpelec doda.