Krótkopowěsće (26.05.17)

pjatk, 26. meje 2017 spisane wot:

Banka šuli pjenjezy dariła

Chrósćicy. Kamjenska wotnožka Ludoweje banki Budyšin je Chróšćanskej zakładnej šuli pjenježny dar 305 eurow přewostajiła, zdźěli nawoda kubłanišća Měrko Šmit. Wužiwać chcedźa pjenjezy za wudospołnjenje serbskeje katolskeje kwasneje drasty. 7. junija chcedźa ju we wobłuku­ programa „Kwasna rewija“ w „Jednoće“ předstajić.

Šmórnu stolicu ze zapisa?

Praha. Natwar nowych, wyšich hač stometrowskich mróčeleškrabakow w Praskej štwórći Pankrác móhł poziciju čěskeje stolicy Prahi w zapisu swětoweho kulturneho namrěwstwa UNESCO wohrozyć. Centrum swětoweho namrěwstwa kaž tež Mjezynarodna rada za pomniki a sydlišća chcetej nětko přepytować, hač njejsu nowe wysokodomy unikatnu Prasku panoramu wobškodźili.

Swjedźeń dróši hač planowane

Drježdźany. Lońši centralny swjedźeń k Dnjej jednoty Němskeje w Sakskej bě dróši hač předwidźane. Swobodny stat wuda za njón něhdźe 6,1 milion eurow, byrnjež běchu naposledk 4,3 miliony zakalkulowali.­ To zdźěli politikar Lěwicy André Schollbach, kiž bě so w statnej kencliji naprašował.

Krótkopowěsće (24.05.17)

srjeda, 24. meje 2017 spisane wot:

Prapremjera na cyrkwinskim dnju

Berlin. We wobłuku Němskeho ewangelskeho cyrkwinskeho dnja dožiwi kruch komponista Sebastiana Elikowskeho-Winklera „rěč a wěra 2“ swoju prapremjeru jutře na koncerće „Sichtungen“ w Berlinskej cyrkwi swj. Hilžbjety. Prěni dźěl na Jana Kilianowy choral „Zbudźenje za Serbow“ poćahowaceje so kompozicije měješe prapremjeru na wosebitym koncerće spočatk lěta.

Witaja noworjadowanje

Njebjelčicy. Iniciatiwa Serbski sejm wot Sakskeho krajneho sejma wobzamknjenu změnu wysokošulskeho zakonja wuraznje wita. Nětko maja zajimcy ze serbskorěčnymi znajomosćemi spěšniši přistup k wučerskemu studijej. W nowinskej zdźělence žada sej iniciatiwa dalše konkretne kročele, kaž lěpše wuknjenske wuměnjenja­ na Lipšćanskej uniwersiće.

Domy bomby dla ewakuowali

Krótkopowěsće (23.05.17)

wutora, 23. meje 2017 spisane wot:

Kabinet so w Praze schadźował

Praha. Składnostnje pjećlětneho wobstaća swojeho kontaktneho běrowa w čěskej stolicy je so sakske krajne knježerstwo z ministerskim prezidentom Stanisławom Tilichom (CDU) dźensa w Praze schadźowało. Hósć posedźenja bě čěski hospodarski minister Pavel Bělobrádek. Kontaktny běrow je w twarjenju Serbskeho seminara zaměstnjeny.

Wabja za wopyt wustajeńcy

Drježdźany. Z informaciskim kašćikom wot dźensnišeho na Drježdźanskim lětanišću za to wabja, Žitawski pokład historiskich narownych taflow wopytać. Přehladka wo „cyle hinašej reformaciji w Hornjej Łužicy“ je hač do apryla 2018 přistupna. Wona wopřijima 80 ekspo­natow ze 16. a 17. lětstotka.

Projekt šulerjow nominowany

Wostrowc. Mjezynarodny zetkawanski centrum Marijiny doł we Wostrowcu je za lětuše myto UNESCO nominowany, kaž rěčnica Němskeje UNESCO-komisije zdźěla. Při tym dźe wo projekt, z kotrymž młodostni přeslědźa, što móhło so w jich wokolinje na dobro škita klimy a při lutowanju energije wšitko polěpšić. Na projekće wobdźěla so wjace hač sto šulerjow.

Krótkopowěsće (22.05.17)

póndźela, 22. meje 2017 spisane wot:

Jan Malink přednošował

Budyšin. Z wulkim zajimom je wčera popołdnju 30 serbskich a němskich zajimcow wuwjedźenja superintendenta Jana Malinka w Budyskim Serbskim muzeju k 500 lětam serbskeho ewangelskeho žiwjenja sćěhowało. Wodźenje bě poskitk we wobłuku 40. mjezynarodneho dnja muzejow.

Policija pyta za skućićelemi

Choćebuz. Po namócnych rozestajenjach wosrjedź Choćebuza z pjeć zranjenymi pyta policija z wotmachom za skućićelemi. Dotal pozadki njeznaja, kaž rěkaše. Sobotu wječor bě mjez swjećacymi němskimi a wjacorymi syriskimi mužemi k zwadźe dóšło. W tym zwisku so pjeć němskich muži w starobje 28 do 33 lět kałnjenja a rěznjenja dla zrani. Třoch móžachu mjeztym z chorownje pušćić.

Předewzaćelske myto do Załomja

Drježdźany/Załom. Nawodaj Załomskeho zawoda k předźěłanju płodow, nan Maximilian Deharde a syn Werner, staj myto „Sakski předewzaćel lěta 2017“ dóstałoj. Při tym běchu posudźowarjo dobre hospodarske połoženje zawoda runje tak hódnoćili kaž jeju wobchadźenje z přistajenymi a čestnohamtske aktiwity.

Waldschmidt HSV wuchował

Krótkopowěsće (19.05.17)

pjatk, 19. meje 2017 spisane wot:

Třikrajowy festiwal J-O-Ś zahajili

Žitawa. W Zhorjelsko-Žitawskim Gerharta Hauptmannowym dźiwadle su zawčerawšim třikrajowy dźiwadłowy festiwal J-O-Ś zahajili. Mjeno poćahuje so na hory němsko-čěsko-pólskeho třiróžka Ještěd, Oybin a Śnieżku. Hač do 21. meje předstaja dohromady 17 kruchow. Hłownu produkciju bě wyši hrajny nawoda NSLDź Steffen Wolfram přewzał.

Smartphone hižo při snědani

Budyšin. Po naprašowanju chorobneje kasy KKH słuša za młodu generaciju k snědani, zo čitaja mejlki abo sćelu přećelam krótkopowěsće. 62 procentow woprašanych młodostnych w starobje 18 do 29 lět je přiznało, zo při snědani na swój smartphone hladaja. Starša generacija porno tomu radšo dale nowinu čita. Jenož kóždy šesty z 50- do 70lětnych wužiwa samsne medije kaž młodźina.

Bombardier wuradźował

Krótkopowěsće (18.05.17)

štwórtk, 18. meje 2017 spisane wot:

Nowelěrowany zakoń schwaleny

Drježdźany. Powołanske akademije po cyłej Sakskej móža wot 1. awgusta 2017 po nowych měritkach dźěłać. Sakski parlament je na swojim wčerawšim posedźenju nowelěrowany zakoń wo powołanskich akademijach wobzamknył. Sakska statna ministerka za wědomosć a wuměłstwo dr. Eva-Maria Stange (SPD) rjekny, zo „sylnja zakoń zamóžnosć wukonow akademijow a jich awtonomiju“.

Žadanje iniciatiwy wobjednali

Podstupim. Braniborski krajny sejm je dźensa žadanje ludoweje iniciatiwy, planowanu wokrjesnu reformu njezwoprawdźić, wobjednał. Knježaca koalicija SPD a Lěwicy bě hižo do posedźenja připowědźiła, zo žadanje wotpokaza. Iniciatiwa bě něhdźe 130 000 podpismow přećiwo nanuzo­wanemu zjednoćenju wokrjesow a bjezwokrjesnych městow zno­syła.

Hraničny měznik wuchowali 

Krótkopowěsće (17.05.17)

srjeda, 17. meje 2017 spisane wot:

Sudnicy wuzwoleni

Drježdźany. Sakski krajny sejm je na swojim dźensnišim posedźenju štyrjoch čłonow sakskeho wustawoweho sudnistwa wuzwolił. Jürgena Rühmanna, prezidenta financneho sudnistwa, su w zastojnstwje wiceprezidenta wobkrućili. Wólby běchu trěbne, dokelž podadźa so někotři na wuměnk abo dźewjećlětna wólbna doba so kónči.

Planuja trasu spěšnoćaha

Praha. Čěscy kaž tež sakscy geologojo su w sewjernej Čěskej z prěnimi přepytowanjemi terena w zwisku z planowanym natwarom spěšnoćahoweje čary Praha–Drježdźany započeli. 123kilometrowsku trasu chcedźa w lěće 2028 twarić započeć. Wobstatk budźetej mjez druhim tež 16 a 26 kilometrow dołhej tunlej. Zasadnje wažne tuž je dno geologisce dokładnje přepytować.

Dźěłać kaž na zapadźe

Berlin. Wuchodoněmscy metalownicy nochcedźa dlěje hač 38 hodźin wob tydźeń dźěłać. Tole je 86 procentow přistajenych w Berlinje, Braniborskej a Sakskej při woprašowanju dźěłarnistwa IG metal zwurazniło. 38hodźinske rjadowanje płaći jenož we wuchodoněmskich krajach. Na zapadźe dźěłaja po tarifje 35 hodźin.

Krótkopowěsće (16.05.17)

wutora, 16. meje 2017 spisane wot:

Najrjeńšu meju zwěsćili

Wotrow. Wubědźowanje Kamjenskeje župy „Michał Hórnik“ wo najrjeńšu meju su Wotrowscy młodostni dobyli. Jich wobraz je so na Facebookowej stronje ze 641 hłosami před fotom Radworskeje meje přesadźił. Třeće městno doby Smječkečanska meja před tej Chróšćanskeje starownje. 15 młodźinskich cyłkow a wjesnych towarstwow bě wobraz zapodało. 2 000 ludźi je sobu wothłosowało.

Wurjadne posedźenje

Choćebuz. Brunicowy wuběrk Braniborskeje je so dźensa w Choćebuzu wurjadnje schadźował. Hłowna přičina běchu njedawno předstajene plany energijoweho koncerna LEAG. Předewzaće bě dotalne plany Vattenfalla za wutwar brunicowych jamow raznje redukowało. W tym zwisku wočakowachu dźensa stejišćo braniborskeho knježerstwa.

Sćelu pjenjezy do domizny

Berlin. Migranća z afriskimi korjenjemi sćelu po trochowanjach kóždolětnje něhdźe 1,2 miliardźe eurow swojim swójbnym do Afriki. Po nowym woprašowanju 90 procentow migrantow prawidłownje pjenjezy do stareje domizny sćele, hač do 10 000 eurow. Z pjenjezami financuja přiwuznym wšědnu potrjebu.

Krótkopowěsće (15.05.17)

póndźela, 15. meje 2017 spisane wot:

Parlamentariska přirada so zešła

Berlin. Parlamentariska přirada Załožby za serbski lud je dźensa swoje prawi­dłowne posedźenje w Berlinje wotměła. Pod nawodom zapósłanca CDU w Sakskim krajnym sejmje Marka Šimana wuradźowachu wo stawje projekta Witaj a wo wužadanjach přichodneho časa. Nimo toho rěčachu wo dobrym wuwiću Serbskeho ludoweho ansambla.

Žadaja sej koncept za Łužicu

Podstupim. Twarska industrija Braniborskeje a Sakskeje žada sej wot wobeju krajneju knježerstwow jasny koncept za strukturnu změnu we Łužicy. Kaž ze zhromadneje deklaracije wobeju industrijneju zwjazkow wuchadźa, je wažne, zo nastawaja dalše hospodarske srjedźišća. Předewzaća měli so hižo nětko na wužadanja za čas po brunicy nastajić.

Namócnosće zasudźili

Krótkopowěsće (12.05.17)

pjatk, 12. meje 2017 spisane wot:

Hladarkam so dźakowała

Wojerecy. Składnostnje dźensnišeho Mjezynarodneho dnja hladanja starych a chorych je zapósłanča CDU w zwjazkowym sejmje Marja Michałkowa Wojerowski Ławrjencowy dom wopytała, zo by so mjez wobydlerjemi a přistajenymi wo wosobinskich naležnosćach wobhoniła. Zdobom dźakowaše so hladarkam a hladarjam za zdokonjane dźěło.

Zakukleny po měsće běhał

Choćebuz. Jako wojowar teroristiskeje milicy Islamski stat zdrasćeny muž je wčera w Choćebuzu njeměr zbudźił. Čorny zdrasćeny, zakukleny a z čornej chorhoju z arabskimi pismikami wón po nutřkownym měsće běhaše. Muža zadźerža­wši policisća zwěsćichu, zo jedna so wo 38lětneho Choćebužana. Motiwy swojeho zadźerženja wón žane njemjenowaše. Wyši měšćanosta Holger Kelch (CDU) nima za akciju žanežkuli zrouzumjenje.

Kónc tydźenja tež njewjedra

nawěšk