Krótkopowěsće (28.02.22)
Incidenca zaso přiběraca
Budyšin. Po mjeńšej incidency minjeny tydźeń je hódnota po Roberta Kochowym instituće zaso přiběraca, w Budyskim wokrjesu wučinja wona dźensa 1 309,7 a w Zhorjelskim 1 025,7. Minjeny pjatk rozprawješe wokrjes Budyšin wo 624 zwěsćenych natyknjenjach z koronawirusom, wokrjes Zhorjelc poda 556 infekcijow. Kaž hornjołužiskej wokrjesaj dale zdźělištej, lěkuja dohromady 141 na koronu schorjenych w chorownjach.
Lózy hólcy w „homeofficu“
Nuknica. Lózy hólcy su dźensa swój najnowši spěw „Homeoffice“ na platformje YouTube wozjewili. Wosebity hósć a hłowny wokalist je rapper Krazy Kocor. Ze šibałym widejom, kotryž je sej dwě hodźinje po prěnjej prezentaciji hižo wjace hač sto zajimcow wobhladało, Lózy hólcy wšědny dźeń w pandemiji satirisce rozjimuja. Pytajće na mjenowanej internetnej stronje pod mjenom skupiny.
Jězbne plany znowa změnili
Krótkopowěsće (25.02.22)
Chcedźa nuzowy stop
Choćebuz. Ze spěšnej próstwu Choćebuskemu zarjadniskemu sudnistwu chcetej Němska wobswětowa pomoc a Zelena liga nuzowy stop wudobywanja brunicy w Janšojskej wuhlowej jamje docpěć. Tomu so energijowy koncern LEAG spřećiwja. Kaž dźensa wottam rěka, by hnydomny kónc wudobywanja fatalne sćěhi na pohórnistwowu krajinu, předewšěm na dnownu wodu, měł.
Nowe hódnoćenje trěbne
Berlin. Po tym zo je na wuchodźe Europy wójna wudyriła, chce Lěwica wo swojim wotpokazanju hospodarskich sankcijow ze stron Europskeje unije rozmyslować. Frakciski šef strony w zwjazkowym sejmje Dietmar Bartsch je powěsćerni dpa mjez druhim prajił: „Tónle historiski zarěz nuzuje nas k nowemu hódnoćenju.“ Hišće minjeny tydźeń bě strona wo zrozumjenje za ruske zajimy wabiła.
Incidenca wostała
Krótkopowěsće (24.02.22)
Nowa hudźba Caroliny Eykec
Berlin. Ze singleomaj „Crystal Glacier“ a interpretaciju Debussyjoweho krucha „Clair de Lune“ přihotuje tereministka Carolina Eyckec zjawnosć na nowy album „Thetis 2086“, kotryž ma w aprylu wuńć. W jeho srjedźišću steja přiroda, zemja a uniwersum. Wobě nowej singleej serbskeje hudźbnicy stej hižo na YouTube přistupnej.
Incidenca zaso lochce stupa
Budyšin. Incidencna hódnota w Budyskim a Zhorjelskim wokrjesu zaso lochce stupa. Po Roberta Kochowym instituće wučinja wona dźensa za Budyski wokrjes 1 187,2. Wčera zličichu tu 1 010 natyknjenych z koronawirusom, 61 pacientow lěkuja w zwisku z koronu w hornjołužiskich klinikach. Za Zhorjelski wokrjes podawa RKI incidencu 1 002,6; cyłkownje zwěsćichu tam wčera 700 nowoinfekcijow – dwě z omikronwariantu – 79 ludźi je w chorowni.
Čěska přiwozmje ćěkancow
Krótkopowěsće (23.02.22)
Incidenca dale snadniša
Budyšin. Po Roberta Kochowym instituće koronaincidenca dźensa dale woteběra a je w Budyskim wokrjesu 1 129,5, w Zhorjelskim 927,1. Budyski wokrjes informowaše wčera wo 360 natyknjenjach z wirusom a wo dalšim smjertnym padźe. Wokrjes Zhorjelc zwěsći 573 dalšich infekcijow a třoch zemrětych pacientow. 137 ludźi lěkuja w zwisku z koronu w hornjołužiskich klinikach.
Předewzaća so starosća
Choćebuz. Hladajo na konflikt mjez Ruskej a Ukrainu su předewzaća w južnej Braniborskej znjeměrnjene wuskich hospodarskich splećenjow z woběmaj krajomaj dla. „Mnohe naše čłonske zawody ze starosću na politiske wuwiće zhladuja“, rjekny Wolfgang Krüger, hłowny jednaćel IHK Choćebuz. Wobjim wuwožowanjow z Braniborskeje do Ruskeje, Ukrainy a Běłoruskeje wučinješe po jeho słowach loni 307 milionow eurow.
Připóznaće krajneho rady
Krótkopowěsće (22.02.22)
Serbski přełožk pola Microsofta
Budyšin. Software-koncern Microsoft je składnostnje wčerawšeho dnja maćeršćiny wo tym informował, zo hornjoserbšćinu jako rěč wotnětka do swojeho Bing-translatora a do Microsoft-office-nałožowanjow zapřijmje. K tomu je serbske zhromadźenstwo same aktiwnje přinošowało, předewšěm Rěčny centrum WITAJ a Serbski institut. Załožba za serbski lud ma wudobyće za „dalši krok po puću serbskeje digitalizacije“.
Indicenca znowa woteběraca
Budyšin. Po Roberta Kochowym instituće wučinja incidencna hódnota dźensa w Budyskim wokrjesu 1 237,2 a w Zhorjelskim 979,4, štož je mjenje hač wčera. Wot minjeneho pjatka hač do wčerawšeho rozprawjachu we wokrjesu Budyšin wo 1 107 natyknjenjach z koronawirusom. We wokrjesu Zhorjelc bě jich 753. Zdobom je tam ličba zemrětych w zwisku z koronu wo tři přiběrała.
Kónc za konopny projekt LEAG
Krótkopowěsće (21.02.22)
Dźeń maćeršćiny
Drježdźany. Składnostnje dźensnišeho dnja maćeršćiny hódnoći sakska ministerka za kulturu Barbara Klepsch (CDU) přinošk serbšćiny ke kulturnej mnohotnosći we Łužicy. „Lětstotki wobohaćatej serbska rěč a kultura Łužicu. Wonej skićitej wulku wjelorakosć literatury, wuměłstwa, hudźby a wědomosće. Dwurěčnosć w regionje mamy zachować a hódnoćić“, ministerka rjekny a skedźbni na tomu słužacu kampanju „Sorbisch? Na klar.“
Incidenca dale přiběra
Budyšin/Zhorjelc. 674 dalšich natyknjenjow z koronawirusom poda Budyski wokrjes pjatk, Zhorjelski zwěsći 481, jedne z nich z omikronwariantu. Aktualniše ličby hač do redakciskeho kónca hišće njepředležachu. Incidenca w hornjołužiskimaj wokrjesomaj dale stupa: za Budyski podawa Roberta Kochowy institut dźensa 1 413,0 a za Zhorjelski 1 072,0.
Saněruja stare jamy
Krótkopowěsće (18.02.22)
Nowi čłonojo přirady
Berlin. Parlamentariska přirada Załožby za serbski lud ma wot wčerawšeho rjad nowych čłonow. Tak powołachu zapósłancy Němskeho zwjazkoweho sejma w Berlinje Simonu Koß za SPD a dr. Christianu Schenderlein za CDU do přirady. Jako jeju zastupjerjow pomjenowachu Silviju Lehmann a Knuta Abrahama. Parlamentariska přirada radu Załožby za serbski lud poradźuje.
Nowosć ze załožby
Budyšin. Wot wčerawšeho ma Załožba za serbski lud w swojim online-wobchodźe pod noty serbskich ludowych a popularnych spěwow za dujerjow. Poskitk wobsahuje partitury 14 pěsnjow we wobdźěłanju za wšelake dujerske instrumenty a bijadła. Zajimcy móža sej pak kompletny pakćik za 12,95 eurow pak kóždu pěseń jednotliwje za 2,95 eurow kupić.
Incidenca lochce zwyšena
Budyšin/Zhorjelc. Incidencne hódnoty za Budyski a Zhorjelski wokrjes dale, ale jeno snadnje, stupaja. Roberta Kochowy institut poda za dźensa hódnotu 1 261,4 za Budyski a 1 074,4 za Zhorjelski wokrjes. Jeničce wčera zwěsćichu w Budyskim wokrjesu 987 dalšich infekcijow z koronawirusom, w Zhorjelskim 612.
Krótkopowěsće (17.02.22)
Widejo bórze přistupne
Budyšin. Serbska popowa opera „Carpe noctem – Njeskónčna nóc“ předleži jako widejo. Kaž skupina Trio a kumple informuje, stej zwukowa a widejowa produkcija zakónčenej. Njedźelu wot 20 hodź. skupina widejo kaž tež jednotliwe hudźbne wideja na swojim YouTube-kanalu wozjewi. Planowane je pěsnje wot nalěća tež na dalšich portalach poskićić.
Incidenca zaso stupa
Budyšin/Zhorjelc. Roberta Kochowy institut je za Budyski a Zhorjelski wokrjes dźensa zaso stupace incidencne hódnoty zwěsćił. Za Budyski wučinja incidenca 1 238,2, za Zhorjelski 1 062,8. Dohromady 1 351 nowoinfekcijow z koronawirusom zličichu wčera w Budyskim wokrjesu, Zhorjelc podawa za wčera 914 natyknjenjow, wosom z nich z omikronwariantu.
K wikam z nowej knihu
Krótkopowěsće (16.02.22)
Ralf Bursy njeboh
Berlin. W starobje 66 lět je póndźelu hudźbnik a producent Ralf „Bummi“ Bursy po ćežkej chorosći zemrěł. Berlinjan bě w 1980tych lětach z hitami kaž „Feuer im Eis“ wuspěšny. Wuměłc bě Serbam jara přichileny a je njeličomne pěsnje za Serbski rozhłós produkował a spěwał. Z Měrćinom Weclichom je wón wusko hromadźe dźěłał. Hudźił je „Bummi“ Bursy tež na wjesnym swjedźenju w Sernjanach a Brětni.
Wuwiće rozdźělne
Budyšin/Zhorjelc. Incidencna hódnota koronawirusa so po Roberta Kochowym instituće we wokrjesomaj Budyšin a Zhorjelc rozdźělnje wuwiwa. Mjeztym zo je w Budyskim na 1 039,6 spadnyła, je wona w Zhorjelskim na 983,8 lochce postupiła. Budyski wokrjes wozjewi wčera 657 nowych infekcijow a dwaj smjertnej padaj, Zhorjelski 585 natyknjenjow, pjeć z nich z omikronwariantu.
Z wobrazom počesća Sokołow
Krótkopowěsće (15.02.22)
Incidenca lochce spaduje
Budyšin/Zhorjelc. Wot pjatka hač do wčerawšeje póndźele su we wokrjesomaj Budyšin (960) a Zhorjelc (813) cyłkownje 1 773 dalšich natyknjenjow z koronu zličili, w Zhorjelskim 14 omikronwarianty. Přiwšěm je incidenca we woběmaj wokrjesomaj lochce spadnyła. Tak podawa Roberta Kochowy institut dźensa za Budyšin hódnotu 1235,2 (-154,4) a za Zhorjelc 951,5 (-216,3).
Digitalna biblioteka
Budyšin. Portal delnjoserbskeje rěče Serbskeho instituta (SI) je wo poskitk bohatši. Wot kónca januara móža zajimcy pod prěnju wersiju digitalneje delnjoserbskeje biblioteki wužiwać. Wona wopřijima mjez druhim swobodnje přistupne digitalizowane wudaća staršich ćišćanych delnjoserbskich tekstow. Wo wužiwanju a dalšich wobsahach nowostki informuje SI zajutřišim, štwórtk, na online-prezentaciji.
Studowacych prjedy zapřijeć
