Krótkopowěsće (18.01.22)
Dwaj nowaj čłonaj w radźe
Budyšin. Wjelelětny zastupowacy předsyda Sakskeho wustawoweho sudnistwa dr. Jürgen Rühmann je nowy zastupowacy čłon serbskich zastupnikow w radźe Załožby za serbski lud. Wón naslěduje Marka Dźisławka, kiž je zastojnstwo časowych přičin dla złožił. Nawodnica wotrjada kultury w ministerstwje za wědomosć, slědźenje a wuměłstwo Braniborskeje Brigitte Faber-Schmidt wobsadźi po wobzamknjenju kabineta druhe městno kraja w gremiju.
Incidenca snadnje woteběrała
Budyšin. RKI podawa ze 169,1 tróšku mjeńšu incidencu za Budyski wokrjes. Dohromady 162 nowoinfekcijow z koronawirusom a jědnaće smjertnych padow je wokrjes wčera zwěsćił. W Zhorjelskim wokrjesu su 13 dalšich natyknjenych registrowali. Incidenca je tež tu po informacijach RKI na 170,4 spadnyła.
Wabjenske telefonaty wozjewić
Krótkopowěsće (17.01.22)
Ryćer dale na čole
Bóšicy. Stanij Ryćer wostanje Bóščanski wjesnjanosta. 282 wobydlerjow, kotřiž su wolili, hłosowaše za njeho, štož wučinja 92,5 procentow. Wólbne wobdźělenje bě z 49,9 procentami snadne – 315 ze 631 wólbokmanych je woliło –, dźesać hłosow bě njepłaćiwych. Na lisćikach běchu wolerjo štyrjoch dalšich kandidatow namjetowali, mjez druhim Měrćina Šołtu z Noweje Jaseńcy, kiž dósta 15 hłosow.
Incidenca snadnje přiběra
Budyšin. Incidenca snadnje přiběra. Roberta Kochowy institut je dźensa za Budyski wokrjes hódnotu 209,4 a za Zhorjelski 212,7 podał. Minjeny pjatk informowachu w Budyskim wokrjesu wo 108 dalšich infekcijach z koronawirusom a wo 13 smjertnych padach. We wokrjesu Zhorjelc zličichu samsny dźeń 67 natyknjenjow. Ličba w zwisku z koronu zemrětych je tam wo dwanaće rozrostła.
LernSax nětko tež serbsce
Krótkopowěsće (14.01.22)
Něhdźe 200 nowych infekcijow
Budyšin/Zhorjelc. Hornjołužiskej wo-krjesaj wostanjetej mjez tuchwilu najmjenje wot pandemije potrjechenymi regionami Němskeje. Budyski wokrjes informuje wo 99 dalšich natyknjenych z koronu a wo wosom zemrětych. Incidenca po RKI je 184,1. W Zhorjelskim wokrjesu zličichu 107 nowoinfekcijow. Incidenca tam wučinja 191,6.
Mužakow z inspiraciju był
Ralsko. Jako přewodźerjow w kónčinje „Narodny geopark Ralsko“ w sewjernej Čěskej su 16 t. mj. „georangerow“ wukubłali. Tući chcedźa zajimcow na zanjesene a lědma znate městna přewodźeć a je tež wěcywustojnje předstajić. Z inspiraciju za tajke „geo-dyrdomdejstwa“ bě zhromadne dźěło z geoparkom Mužakowski zahork, hdźež hižo podobne wodźenja přewjeduja.
Znowa bjez wizuma
Krótkopowěsće (13.01.22)
Incidenca na snadnym niwowje
Budyšin/Zhorjelc. Incidency we wokrjesomaj Budyšin a Zhorjelc stagněrujetej na snadnym niwowje w němskim přerězku. Po Roberta Kochowym instituće wučinjatej hódnoće tu 199,3 resp. 189,6. Budyski krajnoradny zarjad informuje wo 146 nowych natyknjenjach z koronawirusom, 14 schorjenych je zemrěło. W Zhorjelskim wokrjesu zličichu 130 dalšich infekcijow a šěsć smjertnych padow.
Pokazaja ptačokwasny program
Budyšin. Serbski ludowy ansambl pokaza po přiměrjenju strowotniskich předpisow nětko tola wječorny ptačokwasny program „Njewěsta njewjesta“. SLA planuje inscenaciju dohromady trójce předstajić, a to 21., 22. a 23. januara w Chróšćanskej wjacezaměrowej hali „Jednota“. Wo wuměnjenjach za wopyt kaž tež móžnosćach, zastupne lisćiki sej kupić, chce SLA krótkodobnje informować.
Wotměja wuměłsku wuměnu
Krótkopowěsće (12.01.22)
16 zemrětych na dźeń
Budyšin. Wo 16 w zwisku z koronu zemrětych pacientach a 148 natyknjenjach z tymle wirusom je Budyski wokrjes wčera rozprawjał. Tak je tu incidenca po Roberta Kochowym instituće dźensa na hódnotu 198,7 woteběrała. We wokrjesu Zhorjelc wučinja wona po RKI 185,2. Tam informowachu wčera wo 140 infekcijach a šěsć smjertnych padach z časa wokoło Noweho lěta.
Wanderwitz za zakaz AfD
Berlin/Zwönitz. Sakski zapósłanc zwjazkoweho sejma CDU a bywši społnomócnjeny zwjazkoweho knježerstwa za wuchod Marko Wanderwitz je sej zakaz strony AfD žadał. Wosebje w Sakskej je wona mjeztym tak radikalizowana, zo demokratiju a swobodnodemokratiski zakładny porjad chutnje wohrožuje, rjekny wón powěsćerni dpa. Wanderwitz ma AfD za „prawicarskoekstremisku na hłowje a stawach“.
„Dom młodźinskeho prawa“
Krótkopowěsće (11.01.22)
Omikron Hornju Łužicu docpěł
Budyšin. Wirusowa warianta omikron je Budyski wokrjes docpěła. Krajnoradny zarjad je wčera dotal 17 padow wobkrućił. Incidencna hódnota mjeztym dale woteběra. Po RKI wučinja wona dźensa we wokrjesu 222,8. Wčera rozprawjachu wo 158 natyknjenjach z koronu a wo wosom smjertnych padach wot minjeneho pjatka. Wokrjes Zhorjelc zwěsći 171 infekcijow, třoch zemrětych a tři omikron-pady. Incidenca po RKI je tam 181,2.
Kulturny wuběrk
Budyšin. Kulturny wuběrk Domowiny je so wčera we wobłuku online-posedźenja skonstituował. Jeho jednohłósnje wuzwoleny předsyda je z Njebjelčic pochadźacy nowy čłon zwjazkoweho předsydstwa Feliks Ričel. Jemu poboku staj městopředsydka Franciska Grajcarekec a městopředsyda Jan Bělk, kaž třěšny zwjazk informuje.
Spěw wo Běłoruskej
Krótkopowěsće (10.01.22)
Dalši pacienća zemrěli
Budyšin. Incidenca je po Roberta Kochowym instituće dźensa w Budyskim wokrjesu 313,1 a w Zhorjelskim 271,8. Wokrjes Budyšin informowaše minjeny pjatk wo 161 natyknjenjach z koronawirusom a wo třoch smjertnych padach. Wokrjes Zhorjelc bě 96 infekcijow a 13 zemrětych w ziwsku z koronu zwěsćił.
Nowe rjadowanja na šulach
Drježdźany. Nowy korona-wukaz sakskeho knježerstwa předwidźi wobmjezowane regularne wotewrjenje dźěćacych dnjowych přebywanišćow a zakładnych šulow. Rjadownje a skupiny maja so kruće dźělić. W šulskich twarjenjach a stajnje potom, njehodźi-li so minimalny wotstawk połdra metra dodźeržeć, ma so nahubnik wužiwać. Za wuknjacych wot 5. lětnika wobsteji we wučbje za to winowatosć, w primarnym schodźenku nic. Wopytowarjo mjenowanych zarjadnišćow maja aktualny negatiwny test předpołožić.
Wulkopósłanc wotwołany
Krótkopowěsće (07.01.22)
Jasnje pod přerězkom Němskeje
Budyšin/Zhorjelc. Poměrnje krute postajenja hygieny w Sakskej so po wšěm zdaću pozitiwnje na pandemiske połoženje wuskutkuja. Hinak hač předewšěm na sewjeru Němskeje, hdźež bliža so incidency štyriměstnowym ličbam, stej hódnoće we wokrjesomaj Budyšin a Zhorjelc na 283,2 resp. 245,1 spadnyłoj. Dohromady zličichu w nimaj 221 nowych infekcijow z koronawirusom a jědnaće dalšich smjertnych padow.
Nowy kantor zrěčenje podpisał
Drježdźany. Nowy kantor Drježdźanskeho Křižneho chóra Martin Lehmann je wčera słužbne zrěčenje podpisał. W septembrje nastupi wón zastojnstwo, z čimž stanje so z 29. nawodnikom swětosławneho ćělesa. Wotnětka chce so 48lětny we wobłuku „přihotowanskeho dojednanja intensiwnje na swoje nadawki přihotować“.
Pomhaja bjezdomnym
Krótkopowěsće (06.01.22)
Wjace smjertnych padow
Budyšin. Ličba w zwisku z koronu zemrětych pacientow znowa přiběra. Budyski wokrjes informowaše wčera wo 17 padach, Zhorjelski wo 14 z časa wot 9. do 28. decembra. Zdobom mjenowachu 312 resp. 221 natyknjenjow z koronawirusom. Incidenca po Roberta Kochowym instituće je dźensa w Budyskim wokrjesu 310,7 a w Zhorjelskim 247,0.
Nowy serbski film
Choćebuz. Roman Pernak je nowy film z delnjoserbskim wobsahom předpołožił. Berlinjan předstaja w połhodźinskim pasku wuwiće towarstwa „Serbske koparje“, kaž předsyda towarstwa Horst Adam informuje. Filmowc tematizuje hłownje prócu wo zhromadnu serbsku koparsku wubranku a prócu, nałožować delnjoserbšćinu. Hdy a na kotre wašnje film předstaja, kotryž je Załožba za serbski lud spěchowała, dotal jasne njeje.
Nadźijeja so wotewrjenja
Krótkopowěsće (05.01.22)
Incidenca pomału přiběra
Budyšin. Po kóncu lěta z mjenje testami incidenca po Roberta Kochowym instituće nětko tež w Hornjej Łužicy zaso přiběra. Za Budyski wokrjes mjenuje RKI hódnotu 269,1, za Zhorjelski 222,7. Wo 269 natyknjenjach z koronawirusom a dalšich wosom smjertnych padach rozprawjachu wčera we wokrjesu Budyšin. Wokrjes Zhorjelc informowaše wo 225 infekcijach a 15 wosobach, kotrež běchu w decembrje w zwisku z koronu zemrěli.
Wosebite posedźenje sejma
Drježdźany. Sakski krajny sejm je so dźensa ze zhromadźenjemi za čas koronapandemije zaběrał. Wosebite posedźenje bu próstwy frakcije AfD dla zwołane a měri so na aktualne postajenje nuzoweho stawa w swobodnym staće. Demonstracije su wulkeho stracha natyknjenja dla na dźesać ludźi na krutym městnje wobmjezowane. Wuwzaća přizwolić je móžno. Kritikarjo korona-naprawow pak zawjazki prawidłownje ignoruja.
Słownik zaso na předań
