Policija (21.07.17)

pjatk, 21. julija 2017 spisane wot:

Eskortěruja kolesowarjow

Slepo. Na zbožo njewołaja policiju jenož potom, hdyž běchu skućićeljo po puću abo hdyž je awto znjezbožiło. Zajutřišim, 23. julija, dopoł­dnja eskortěruja zastojnicy kolesowanske wubědźowanje mjez Slepom, Jabłońcom, Krušwicu, Kodrecami (Kodersdorf), Limasom a Zhorjelcom. 56. króć wotměje so tam nadróžne kolesowanje z něhdźe 80 wobdźělnikami. Popołdnju so jězdźerjo po samsnej čarje nawróća.

Kóždy pjaty přespěšnje jěł

Nowe Błohašecy. Policija je srjedu popoł­dnju w Nowych Błohašecach spěšnosć měriła. Ze 750 jězdźidłow bě kóžde pjate přespěšne. Město dowolenych 50 km/h pokazowaše tacho Mercedesa 99 km/h. Wodźer awta dyrbi nětko měsac nóžkować a dóstanje do Flensburgskeje centralneje kartaje dypkaj zapisanej.

Nachwilnje do jastwa dyrbjał

Wojerecy. Dokelž njemóže 32lětny Wojerowčan njeskutka dla 1 400 eurow płaćić, su jeho policisća Wojerowskeho rewěra wčera w nocy při kontroli na Clausa von Stauffenbergowej zajeli. Dowjezechu jeho nachwilnje do jastwa.

Policija (20.07.17)

štwórtk, 20. julija 2017 spisane wot:

Nimale štyri promile intus měł

Chrjebja. Jako bě wutoru připołdnju w Chrjebi 31lětny na Hamorskej dróze z kolesa padnył, bjez toho zo by jeho něchtó storčił, zawołachu pasanća policiju. Zastojnicy Běłowodźanskeje policajskeje direkcije nochcychu swojim wočam wěrić, widźo na měrjenskim nastroju, zo ma muž 3,78 promilow alkohola w kreji. Wón dyrbi nětko z chłostanjom pjanosće we wobchadźe dla ličić.

Z 91 km/h po wsy

Lěskej. W Lěskeji pola Hućiny su policisća wutoru rano spěšnosć měrili. Hdźež je 50 km/h dowolenych, smaleše jedyn ze šoferow na B 156 z 91 km/h po wsy. Wodźer Mercedesa budźe nětko měsac bjez jězbneje dowolnosće, ma 200 eurow pokuty płaćić a dóstanje dypkaj do Flensburgskeje centralneje kartaje zapisanej. W běhu dweju hodźin registrowachu na woběmaj stronomaj dróhi wjace hač 1 200 awtow. Kóždy dźesaty šofer bě spěšnišo po puću, hač dowolene.

Policija (19.07.17)

srjeda, 19. julija 2017 spisane wot:

Zahrodkowa lawba so paliła

Běły Chołmc. W Běłym Chołmcu paleše so wčera rano na ležownosći při Wjesnej dróze zahrodkowa lawba. Płomjenja běchu tež na pódlanskej šćěpowc a rostlinarnju přeskočili. Wohnjowi wobornicy z Běłeho Chołmca, Łaza, Bjedrichec, Šćeńcy a Wulkich Ždźar hromadźe z Wojerowskej powołanskej woboru móžachu tomu zadźěwać, zo woheń tež dom­ske 56lětneho wobsedźerja wobškodźi. Wěcna­ škoda wučinja přiwšěm něhdźe 15 000 eurow. Čehodla bě so paliło, dotal jasne njeje.

Do firmy so zadobyli

Kubšicy. W Kubšicach běchu so njeznaći minjene dny do firmy na Starej Lubijskej dróze zadobyli. Z kasy pokradnychu pjenjezy. Mějićel firmy rjekny, zo wučinja wěcna škoda něhdźe 6 000 eurow.

Pjeć zranjenych

Zhorjelc. We wobłuku Zhorjelskeje policajskeje direkcije registrowachu wčera 37 wobchadnych njezbožow. Pjeć wosobow je so zraniło.

Policija (18.07.17)

wutora, 18. julija 2017 spisane wot:

Jědnaćoch wuchować dyrbjeli

Běła Woda. Z dotal njewujasnjeneje přičiny je wčera wječor w bydlenju na Bertolta Brechtowej w Běłej Wodźe na přizemju woheń wudyrił. Ze štyriposchodoweho domskeho dyrbjachu wuchowanske mocy a wohnjowi wobornicy jědnaće wosobow z pomocu wjerćiteho rybla wuchować. Pjećoch z nich dowjezechu podhlada zajědojćenja kura dla do chorownje. 37lětny wotnajer dospołnje wupaleneho bydlenja njebě doma. Kriminalna policija nětko přičiny wohenja přepytuje. Wobsteji podhlad zapalerstwa.

Bjez papjerow z mopedom jěł

Jitk. Jako chcychu zastojnicy Kamjenskeho policajskeho rewěra w nocy na minjenu sobotu w Ralbicach wodźerja mopeda kontrolować, so tón zawróći a ze sobujěducej do Jitka ćekny. Tam jeju lepiwši policisća zwěsćichu, a zo bě Simson w Běłej Wodźe pokradnjeny, zo njeměješe jeho 37lětny šofer ani jězbnu dowolnosć. Moped zastojnicy nablaku sćazachu.

Policija (17.07.17)

póndźela, 17. julija 2017 spisane wot:

Awto z mosta zjěło

Prěčecy. Jako bě wčera připołdnju pólski wodźer Forda na awtodróze A 4 ze Zhorjelca do směra na Drježdźany po puću, wón na mosće pola Prěčec naraz kontrolu nad wozdźidłom zhubi a zleća z awtom pjeć metrow hłuboko na puć pod mostom. Šofer a sobu jěduca wosoba měještaj wulke zbožo a so jenož lochko zraništaj. Ford so dospołnje skóncowa. S 100 dyrbjachu wjacore hodźiny zawrěć.

Statokaj z grafitijemi pomórali

Kulow. W nocy na 15. julij su njeznaći na Młynskej hasy w Kulowje statokaj z grafitijemi pomórali. Za wobsedźerjow nasta wěcna škoda po něhdźe sto eurach.

Policija (14.07.17)

pjatk, 14. julija 2017 spisane wot:

Sutarjo změja pokutu płaćić

Słona Boršć. Hdźež bě so zawčerawšim ­rano na awtodróze A 4 mjez Słonoboršćanskej wotbóčku a wotpočnišćom ­Hornja Łužica wobchadne njezbožo stało, zadźerža policija třoch sutarjow. Woni su jako wodźerjo ­pomału nimo jěducych awtow ze swojim mobilnym telefonom wobrazy abo wideja zhotowili. Zastojnicy kazachu jim ­zastać a sej tele pady zapisachu. Třo mužojo změja nětko po 60 eurach ­pokuty płaćić a dóstanu nimo toho dypk w Flensburgu.

Policija (13.07.17)

štwórtk, 13. julija 2017 spisane wot:

Paduši pola frizera

Budyšin. Po wšěm zdaću měrja so pa­duši w Budyšinje přiběrajcy na frizerske wobchody. W juniju a juliju dóńdźe dotal k šěsć tajkim zadobywanjam, při kotrychž je zdźěla tójšto wěcneje škody nastało. Najbóle drastiski pad sta so minjeny kónc tydźenja při tachantskej cyrkwi. Z tamnišeho frizerskeho wobchoda pokradnychu njeznaći wjacore nožicy, tabletowy kompjuter marki Asus kaž tež pjenjezy z kasy. Mějićelka wobliči škodu na 2 500 eurow. Nimo toho nasta wěcna škoda na durjach a woknach.

Policija (12.07.17)

srjeda, 12. julija 2017 spisane wot:

Trik tola njefungował

Kamjenc. Na prěni pohlad wušikny trik bě sej zawčerawšim paduch w Kamjencu wumyslił. We wulkej kupnicy na přemysłowej přestrjeni Při wětrniku měrješe so 31lětny zhromadnje ze swojim synom na polcy z narunankami za kolesa a tykny sej wobswětlenski set do nachribjetnika. Zo njebychu jeho při kasy lepili, přepoda wón nachribjetnik z rubiznu přistajenej při informaciskim stejnišću blisko zachoda kupnicy. Na swojim dalšim puću ke kasy wza sej muž jenož hišće­ blešu wody, kotruž tež zapłaći. Po tym­ zo běštaj wobaj kasu wopušćiłoj, pósła nan swojeho syna k informaciji, zo by tam nachribjetnik wotewzał. Kedź­bliwy swědk pak bě wšitko wobkedźbował a přistajenu kupnicy na padustwo skedźbnił. Na to zawołachu policiju, kotraž sej personalije muža zapisa a njeskutk přizjewi.

Policija (11.07.17)

wutora, 11. julija 2017 spisane wot:

Smjertny wopor njezboža

Ćisow. Tragiski wukónc měješe ćežke wobchadne njezbožo wčera rano na zwjazkowej dróze B 97 mjez Njedźichowom a wotbóčku do Ćisowa. Tam bě wodźer­ transportera z dotal njeznateje přičiny na napřećiwnu jězdnju zajěł a frontalnje do nakładneho awta prasnył. Zražka bě tak mócna, zo 62lětny wodźer transportera z awta zleća – najskerje njebě připasany. Muž hišće na městnje nje­zboža zemrě.

Policija (10.07.17)

póndźela, 10. julija 2017 spisane wot:

Hižo popołdnju wopity

Běła Woda. Chětro hłuboko do škleńcy hladał je sobotu muž w Běłej Wodźe. To pak jeho njewotdźerža z awtom jěć. Na parkowanišću před kupnicu Kaufland swědcy wobkedźbowachu, kak wón swoje wosobowe awto typa Mercedes chětro napadnje wodźi a zaparkuje. Jako šofer na to po parkowanišću chabłaše, zawo­łachu swědcy policiju. Wobsadka poli­cajskeho awta muža hišće w bliskosći dosahny. Přewjedźeny test pola 40lětneho wunjese, zo měješe 2,24 promilow alkohola w kreji, a to krótko po 15 hodź. Na to­ přewodźachu jeho k wotebraću kreje. Jeho jězbnu dowolnosć kaž tež klučik­ awta sej zastojnicy hnydom wobchowachu.

nawěšk

SERBSKE NOWINY podpěruja:

fueorg misain karten sorbisch

  • XXII. mjezynarodny folklorny festiwal “Łužica 2017” je nimo. Dopomnjenki a rjane wokomiki pak wostanu. Najlěpje zapopadnješ je w fotografiji. Tole su mjez druhim Bianka Šeferowa, Feliks Haza, Maćij Bulank a Janek Wowčer  za redakciju SERBSKICH NOWIN

nowostki LND