Policija (24.01.22)
Z kolesom ćeknyć chcył
Rakecy. Dokelž jeho koleso porjadnje wobswětlene njebě, chcychu policisća předwčerawšim krótko po 21 hodź. blisko Rakečanskeho kěrchowa 37lětneho muža kontrolować. Tón scyła na to njemysleše so po přikazach zastojnikow měć, a ćekny. Policisća pak jeho bórze dosahnychu. Při přepytowanju namakachu pola njeho tyzu konopje a škleńčanu rołku z crystalom.
Z wopačnym čisłom jězdźił
Běła Woda. Wodźerja mopeda je policija sobotu wječor w Běłej Wodźe kontrolowała. Při přepruwowanju jeho dokumentow zastojnikam napadny, zo 53lětny scyła žanu jězbnu dowolnosć nima, dokelž běchu ju jemu hižo před časom sćazali. Nimo toho bě na jězdźidle typa Simson zawěsćenske čisło z lěta 2012 přičinjene. Pozdźišo so wukopa, zo płaćiwe zawěsćenske čisło pola šofera doma ležeše. Dale jěć wón wězo njesmědźeše, ale dyrbješe moped domoj ćišćeć.
Policija (21.01.22)
Po kontroli do jastwa
Wojerecy. Jězbu pod wliwom drogow su policisća Wojerowskeho rewěra předwčerawšim we Wojerecach skónčili a při tym z přikazom zajeća pytaneho 35lětneho zajeli. We wobłuku wobchadneje kontrole zastojnicy wodźerja Forda zadźeržachu. Drogowy test reagowaše pozitiwnje na amfetaminy. Dalšu jězbu njetrjebachu jemu wulce zakazać, ale dowjezechu jeho hnydom do jastwa.
Policija (20.01.22)
Kružny wobchad přewidźał
Słona Boršć. Hižo zaso bě nowy kružny wobchad pola Słoneje Boršće městno wobchadneho njezboža. Stało je so wone předwčerawšim krótko do 23 hodź. 39lětny wodźer Mercedesa bě po statnej dróze S 106 ze směra awtodróhi z něhdźe 100 km/h přismalił. Pola Słoneje Boršće wón kružny wobchad po wšěm zdaću přewidźa a z wotmachom přez njón zajědźe. Awto něhdźe 20 metrow přez powětr lećeše a hakle při wobhrodźenju ležownosće stejo wosta. Po informacijach policije nasta na Mercedesu něhdźe 30 000 eurow škody. Wuchowanske mocy dowjezechu šofera do chorownje. Tam při kontroli zwěsćichu, zo bě wón tójšto alkohola pił. Pólski wodźer awta měješe 2,2 promilej w kreji. Jězbnu dowolnosć wón tohorunja žanu njeměješe.
Policija (19.01.22)
Do kontejnera so zadobyli
Wulke Ždźary. Twarnišćo kołowokoło Hórnikečanskeho jězora nastajnosći paduchow wabi. Dalši tajki pad sta so minjene tydźenje při stanowanišću we Wulkich Ždźarach. Kaž policija wčera zdźěli, zadobychu so njeznaći do kontejnera. A tam su nuzowy milinowy agregat, nurjensku klumpu a dalši grat w cyłkownej hódnoće 5 000 eurow pokradnyli.
Policija (18.01.22)
Z drogami a bjez dowolnosće
Wojerecy. Předwčerawšim na zažnym popołdnju su policisća před Wojerowskim dwórnišćom wodźerja BMWja kontrolowali. 29lětny Albančan njeměješe płaćiwu jězbnu dowolnosć. Tajku ze swojeje domizny njebě wón přepisać dał. Nimo toho zastojnicy zwěsćichu, zo steješe muž pod wliwom drogow. Wotpowědny test reagowaše pozitiwnje na amfetaminy a kokain. Za wobaj deliktaj změje so Albančan nětko zamołwić.
Policija (17.01.22)
Hodowny štomik „wotpyšili“
Kamjenc. Tři tydźenje po hodźoch njetrjebaja hodowne štomiki hižo pyšene być, měnjachu drje štyri dźěći w starobje jědnaće do 13 lět sobotu wječor w Kamjencu. Na Pfortenowej hasy běchu wone wot štomika na zahrodźe najprjedy kule wottorhali. Na to tež lampki wotpowěsnychu a je hnydom sobu wzachu. Swědk bě to wobkedźbował a policiju zawołał. Zastojnicy dźěći w bliskosći dosahnychu a wzachu wšitke štyri sobu na rewěr. Tam sej je starši pozdźišo wotewzachu. Hač su dźěći doma tež tak „pomocliwe“, bohužel znate njeje.
Policija (14.01.22)
Ćežko znjezbožiłoj
Dobrošecy. Ćežke wobchadne njezbožo je so wčera popołdnju na statnej dróze S 109 mjez Dobrošecami a zwjazkowej dróhu B 156 pola Budyšina stało. Wodźer awta Ford Focus bě z Malešec do směra na Budyšin po puću, jako za prawej křiwicu na prawy bok jězdnje zajědźe. Wón „třěli“ ze swojim awtom wjace hač 50 metrow po hrjebi a při tym do wjacorych hałzow, stołpow a dalšich zadźěwkow. Skónčnje wosta Ford ćežko wobškodźeny stejo. Wohnjowi wobornicy z Budyšina, Wulkeje Dubrawy a Malešec dyrbjachu šofera z ćežkej techniku z jězdźidła wuswobodźić. Wuchowanski helikopter dowjeze muža do chorownje. Sobujěduca drje so njezatłusny, dyrbjachu pak ju tohorunja do chorownje dowjezć. Za čas wobdźěłanja njezboža a rumowanja bě S 109 dospołnje zawrjena. Ford Focus dyrbjachu wotwlec.
Policija (13.01.22)
Paduši w Serbskim domje byli
Budyšin. W nocy na wutoru su so njeznaći na Budyskim Póstowym naměsće do zarjadniskeho twarjenja zadobyli, zdźěli wčera Zhorjelska policajska direkcija. Z rozprawy njewuchadźa, zo jednaše so wo Serbski dom. To wobkrući zarjadnistwo Załožby za serbski lud. Z rumnosće domownikow pokradnychu skućićeljo dwucyfrowu sumu pjenjez a elektriski grat markow Makita a Bosch. Hódnota rubizny wučinja něhdźe 320 eurow. Nimo toho nasta při zadobywanju něhdźe 200 eurow wěcneje škody.
Policija (12.01.22)
Paduši w bydlenju byli
Budyšin. Do bydlenja na Budyskej Karla Marxowej běchu so njeznaći předwčerawšim w běhu dnja zadobyli. Skućićeljo přepytachu wšitke rumnosće a wočinichu kamory a pisanske blida. Pokradnyli su laptopaj a kameru. Hódnotu rubizny trochuje wobsedźer na 4 000 eurow. Wěcna škoda na bydlenskich durjach wučinja něhdźe 400 eurow.
Policija (11.01.22)
Awće do so zrazyłoj
Horni Wujězd. Ćežke wobchadne njezbožo sta so wčera krótko po 17 hodź. na statnej dróze S 101 mjez Hornim Wujězdom a wotbóčku do Jědlicy. Wodźerka wosoboweho awta typa Seat je tam w křiwicy kontrolu nad swojim jězdźidłom zhubiła a frontalnje do napřećo přijěduceho Hondy zrazyła. Zražka bě tak mócna, zo so motor jednoho awta roztorha. Wobě wodźerce so při tym ćežko zraništej, tak zo dyrbjachu jej do chorownje dowjezć.
