Po romantiskej dróze

pjatk, 09. februara 2024 spisane wot:

Budyšin. Serbske šulske towarstwo přeprošuje planowanja dla hižo nětko na swoju lětušu kulturno-kubłansku jězbu. Ta powjedźe po romantiskej dróze do Augsburga a wokoliny. Wobdźělnicy móža sej wot njedźele, 12. meje, hač do štwórtka, 16. meje, drohoćinki wšelakoreho razu wotkryć. Pućowacy wopytaja pod nawodom sobudźěłaćerki SŠT Moniki Deleńkoweje mjez druhim Augsburg, Füssen a hród Hohenschwangau. Zajimcy njech přizjewja so telefonisce pod telefonowym čisłom 03591 550209.

Přizjewjenje nowačkow

Na karnewal do Njebjelčic

štwórtk, 08. februara 2024 spisane wot:

Njebjelčicy. Serbskopazličanske karnewalowe towarstwo přeprošuje sobotu, 10. februara, na druhi kapičkowy wječor aktualneje sezony do Njebjelčanskeje „Bjesady“. Do toho maja dźěći móžnosć k hejsowanju. Pjatk, 9. februara, swjeća w towarstwje žónske póstnicy. Tam budu najrjeńše kostimy mytować. Hižo minjenu sobotu su seniorojo gmejny karnewal woswjećili. Hinak hač na kapičkowych wječorach je tam dźěćaca škričkowa garda wustupiła.

Caren Lay přeprošuje na jězbu

Budyšin. Zapósłanča zwjazkoweho sejma Caren Lay (Lěwica) je dwudnjowsku busowu jězbu do Berlina na 21. a 22. februarje organizowała za kotruž je hišće swobodnych městnow. Jězba z busom, program, přenocowanje ze snědanju w hotelu a dalše zastaranje w hosćencu su dar­motne. Program wopřijima wopyt plenarneho posedźenja zwjazkoweho sejma a rozmołwu z Caren Lay. Přizjewjenje z mjenom, adresu, narodninami a tele­fonowym čisłom njech sćelu zajimcy na . Přenocować budu wobdźělnicy w stwach za dwě wo­sobje. Tuž je přizjewjenje za dweju radźomne.

Lessing by so dźiwał

Přećiwo frustraciji

srjeda, 07. februara 2024 spisane wot:
Budyšin. Němsko-serbska dźiwadłowa produkcija „Frustracija – pozběh je žónski“ přićahuje z rěčnej wobrotniwosću swojich młodych hrajerkow. Spoken Word Academija přeprošuje jutře, 8. februara, w 19 hodź. do Budyskeho Serbskeho domu na hodźinske předstajenje. Wosobinske teksty skupiny LOST ­POETAS tematizuja žónskosć, lubosć, strach, swójsku serbsku identitu, patriarchalne struktury kaž tež nadźiju a přeće za změnu. Přihladowarstwo wočakuje emocionalny dźiwadłowy wječor połneho real-talka a žónskeje mocy. Wšitko zwisuje z prašenjom, što by so z wjesnymi kónčinami stało, bychu-li młode žony Łužicu doskónčnje wo­pušćili. Zběrka indiwidualnych, poetiskich spisow, kotrež z elementami dźiwadłownistwa kaž tež hudźby słowa wožiwja, je pospyt wuswobodźenja a namołwa k wojowanju.

Jónkrótne towarstwo

wutora, 06. februara 2024 spisane wot:

Brětnja/Michałki. Nowe towarstwo za konjacy sport Brětnja/Michałki (PSVBM) je swoje dźěło zahajiło. Wone je nětko do registra towarstwow zapisane. Towarstwo chce předewšěm dźěćom ze socialnje słabšich swójbow zmóžnić, zo wobchad z konjom kaž tež jěchanje nawuknu. Předsydka towarstwa je Romy Belka.

So idejam za fotami bližić

Budyšin. Serbscy muzejownicy přeproša na předposlednje zarjadowanje wosebiteje wustajeńcy „Ducy domoj“ z fotografijemi Jürgena Maćija. Te wotměje so jutře, srjedu 7. februara, wječor w Budyskim Serbskim muzeju. We 18 hodź. powjedźe Jürgen Maćij po wustajeńcy a w 19 hodź. sćěhuje přednošk „,Přistupju a praju sej: Nětko sym tu. Moja legitimacija je foto-aparat‘ – Sektor foto a film w Domje za serbske ludowe wuměłstwo“. Wědomostnicy Serbskeho instituta dr. Theresa Jacobsowa a dr. Ines Kellerowa přednošujetej w němskej rěči.

Při jězoru štomy pušćeja

póndźela, 05. februara 2024 spisane wot:

Wojerecy. Na zapadnym pobrjohu Šibojskeho jězora pušća wot dźensnišeho fachowy zawod w nadawku města Wojerecy štomy. Po zdźělence měšćanskeho zarjadnistwa přihotuje so z tym natwar a přizamknjenje wuhladneje wěže. Mašiny za pušćenje štomow su na wšědne dźěło w času mjez 4 a 20 hodź. nastajene. Pjeńki podrězanych štomow pak wostanu hač do spočatka hłuboko­twarskich dźěłow w zemi, zo njeby so póda přez sylne zliwki wupłokać móhła.

Z nowym předsydstwom

Kamjenc. Na swojim prěnim posedźenju wčera w Kamjencu je so nowowuzwolene předsydstwo měšćanskeho zwjazka CDU Kamjenc konstituowało. Gremijej, kotryž bu na sobustawskej zhromadźiznje w nowembru 2023 po wustawkach wuzwoleny, přisłušeja Sebastian Wels (předsyda), Stefan Höhne (městopředsyda), Manuela Wagner (pokładnica), Justina Suchy (zamołwita za čłonow) a přisydnicy Thomas Kirschner, Jonas Klawitter, Torsten Pfuhl, Benjamin Schiller. Na zarjadowanju witachu tež Elaine Jenčec, direktnu kandidatku CDU za wólby do Sakskeho krajneho sejma w septembrje tohole lěta.

3 500 kilometrow po Europje

pjatk, 02. februara 2024 spisane wot:

Chrósćicy. Tole staj Choćebuskaj dźiwadźelnikaj Matthias Greupner a Sylvia Burza w dźesać lětnych etapach zmištrowałoj. Startowałoj staj w Zhorjelcu, cil ­rěkaše Santiago de Compostela w sewjernej Španiskej. Při tym sćěhowaštaj slědam swjateho japoštoła Jakuba. Rady chcetaj přisłucharjow sobu wzać w swojim něm­skorěčnym přednošku na tutón napjaty puć přez Němsku, Šwicarsku, Francosku a Španisku. W słowach a wobrazach wopisujetaj swoje dyrdomdeje a dataj tež putniskim zajimcam a nowačkam wažne pokiwy za jich prěnje putnikowanje. Přednošk dožiwja zajimcy sobotu, 3. februara, w 19.45 hodź w Chróšćanskej putniskej hospodźe. W 16 hodź su dźěći na serbske dźěćace kino přeprošene.

Debja jutrowne jejka

Pjeć nowačkow witali

štwórtk, 01. februara 2024 spisane wot:
Lejno. Nowy slěd škotowych turněrow serbskich seniorow w lěće 2024 su wutoru w Lejnjanskim Kubicec hosćencu zahajili. Wobdźěliło je so škotowarka a 30 škotowarjow. Mjez nimi witachu pjeć nowačkow, kaž hłowny organizator Měrćin Nowak zdźěli. Prěni turněr lěta doby Herbert Krječmar z přemóžacymi 3 127 dypkami před Erhardom Kroschkom (2 656) a Měrkom Šmitom (2 475). Přichodny škotowy turněr wotměje so 27. februara w 14 hodź. w Karstenowej Piwowej stwičce w Pančicach-Kukowje.

Stipendije za kurs čěšćiny

srjeda, 31. januara 2024 spisane wot:

Budyšin. Štóž ma zajim za rěčny kurs ­čěšćiny wot 18. julija hač do 15. awgusta 2024 w Praze abo wot 11. awgusta hač do 2. septembra 2024 w Čěskich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda (Póstowe naměsto 2, 02625 Budyšin, e-mail ). Wotpowědny formular a dalše informacije su na internetnej stronje přistupne.

Awtorka čita swoje basnje

Budyšin. „innen bröckelt die unerhörte schicht“ rěka nowa zběrka basnjow, kotruž je Měrana Cušcyna zestajiła. Z pomocu Kulturneje załožby Swobodneho stata Sakskeje staj ju Jayne-Ann Igel a Jan Kuhlbrodt w Lipšćanskim Poetenladen wudałoj. Zběrku předstaji awtorka štwórtk, 1. februara, w 19 hodź. w Budyskej Smolerjec kniharni.

Awtorka čita swoje basnje

wutora, 30. januara 2024 spisane wot:

Budyšin. „innen bröckelt die unerhörte schicht“ rěka nowa zběrka basnjow, kotruž je Měrana Cušcyna zestajiła. Z pomocu Kulturneje załožby Swobodneho stata Sakskeje staj ju Jayne-Ann Igel a Jan Kuhlbrodt w Lipšćanskim Poetenladen wudałoj. Zběrku předstaji awtorka štwórtk, 1. februara, w 19 hodź. w Budyskej Smolerjec kniharni.

Wobchod zaso wočinjeny

Pančicy-Kukow. Po wobnowjenju klóšterskeho wobchoda w klóštrje Marijinej hwězdźe w Pančicach-Kukowje je wobchod nětko zaso wočinjeny a kupcow wot póndźele do pjatka stajnje wot 10 do 16.30 hodź. přeprošuje. W februaru je wobchod sobotu zawrjeny. Štwórtk, 1. februara, w 15 hodź. změja tam domy­swjećenje. K tomu su wšitcy zajimcy wutrobnje přeprošeni. Po tym poskićuja ­kofej a tykanc.

Seniorojo škotuja

póndźela, 29. januara 2024 spisane wot:
Lejno. Přichodny škotowy turněr serbskich seniorow wotměje so jutře, wutoru, w Lejnjanskim Kubicec hosćencu. Započatk budźe w 14 hodź. Nowačkojo su kaž stajnje rady witani. Kaž organizator Měrćin Nowak zdźěli, je so loni škotowarka a 34 škotowarjow na měsačnych zetkanjach wobdźěliło. Přichodny škotowy turněr wotměje so 27. februara w Karstenowej piwowej stwičce w Pančicach-Kukowje.

Serbska debata

nowostki LND