Při jězoru dale inwestuja
Hamor (AK/SN). Do infrastruktury při Bjerwałdskim jězoru Hamorska gmejna dale inwestuje. Na zašłym posedźenju gmejnskeje rady přepodachu jeje čłonojo nadawk za porjedźenje 1,2 kilometraj dołheho wotrězka kolesowanskeje šćežki wokoło jězora. Tak mjenowana topołowa aleja dyrbi so nuznje wutwarić a ponowić. Po njej móžeš lědma hišće jězdźić, na posedźenju radźićelow rěkaše.
Naprawa płaći něhdźe 320 000 eurow. Twarske dźěła maja so hišće do spočatka sezony zahajić. Financować chcedźa předewzaće ze swójskimi srědkami a ze spěchowanjom. Swójske pjenjezy we wobjimje 194 000 eurow bjeru z aktualneje inwesticiskeje pawšale kaž tež z teje zašłeju lět. Jako spěchowanje wužiwaja srědki, kotrež dóstanje komuna za wudźeržowanje swojich pućow wot Swobodneho stata Sakskeje.
Wo wužiwanju pawšale rozsudźili
Trjebin (CK/SN). Wo wužiwanju srědkow z komunalneje pawšale za skrućenje wjesneje kónčiny měješe Trjebinska gmejnska rada na swojim zašłym posedźenju rozsudźić. Prašenje bě, što ma so z dokładnje 57 769 eurami stać, kotrež njeběchu loni přetrjebali. Do toho bě so hižo techniski wuběrk z próstwu komunalneho twarskeho zawoda zaběrał. Jeho přistajeni chcyli za 1 200 eurow nastroj k wurězowanju štomow kupić, zo njebychu stajnje do jich wjerškow łazyć trjebali. Dokelž technika twarskeho zawoda mjeztym tež hižo najmłódša njeje, trjebaja nowy trawusyčak-traktor za 15 348 eurow. Dale wudadźa 1 748 eurow za porjedźenje bowlingoweje čary. Kaž wjesnjanosta Waldemar Locke (CDU) wopodstatni, su tam defekt zwěsćili, kiž ma so ze srědkami z komunalneje pawšale porjedźeć.
Nimo toho chcedźa kameru, wótřerěčak a dalšu techniku za přewjedźenje widejowych konferencow za dohromady 1 982 eurow kupić. Trjebinska gmejna dotal tajke techniske móžnosće nima, štož je so w času koronapandemije jako wobćežne wopokazało. W tajkich padach dyrbjachu rumnosće Slepjanskeje gmejny wužiwać.
Nowu kapu předstajili
Wudawki za nowu drastu wohnjowych wobornikow wobzamknyli
Ralbicy (JK/SN). Njewšědna přezjednosć wobsteješe mjez radźićelemi gmejny Ralbicy-Róžant na jich zašłym posedźenju při rozsudźe wo nakupje noweje drasty za dobrowólnych wohnjowych wobornikow. Zarjadniski zwjazk Při Klóšterskej wodźe je nadawk k dodawanju wotpowědneje drasty wupisał. Dóšli su tři poskitki z rozdźělnym wuslědkom. Tohodla je so předsyda zarjadniskeho zwjazka Měrko Domaška z próstwu na firmy wobroćił, hač móhli dóstać model noweje drasty, wosebje kabaty. Jeničke předewzaće je na to reagowało a model jara naročneje kapy pósłało, kotruž Domaška na minjenym posedźenju delanskich radźićelow předstaji.
Z dnjowym lisćikom w měsće po puću
Wosebity pilotowy projekt zahajitej 1. apryla Wojerowska wobchadna towaršnosć a Wobchadny zwjazk hornje Łobjo. Tón budźe předewšěm na dobro wobydlerjow z wjesnych dźělow města.
Wojerecy (AK/SN). Za zjawny busowy bliskowobchad chce město Wojerecy wjace sobujěducych zdobyć. To je zaměr pilotoweho projekta „dnjowy lisćik za 3,50 eurow“, kotryž přichodny pjatk, 1. apryla, zahaja. Iniciator je Wojerowska wobchadna towaršnosć (VGH). Wuchadźišćo běchu nazhonjenja města Stuttgarta z dnjowym lisćikom. Nětko chce wobchadny zwjazk Hornje Łobjo (VVO) přijomny tiket za bliskowobchad w přichodnymaj lětomaj testować. „Jednotliwa jězba z měšćanskim busom płaći normalnje 2,50 eurow. Nowa jězdźenka za 3,50 eurow so hižo zadani, hdyž samsny dźeń wróćo jědźeš, wosebje pak wot třećeje jězby samsny dźeń“, wuzběhny jednaćel VGH Stefan Löwe. Powabliwy je nowy poskitk předewšěm za wobydlerjow wjesnych dźělow města a za tych, kotřiž tak a tak wjacore razy wob dźeń z busom sobu jězdźa. VGH poskića w měsće pjeć busowych čarow a zasadźa tam 18 busow, kotrež wob lěto dohromady něhdźe 500 000 kilometrow jědu.
Něhdźe sto ludźi je wčera přeprošenje Wotrowskeje iniciatiwy na ...
Ćěkancy z ćaha do busow přelězli
Šansa za překwapjenje
Frank Peschel je kandidat AfD
Hodźij (SN). Strona Alternatiwa za Němsku (AfD) je swojeho kandidata za wólby krajneho rady Budyskeho wokrjesa dnja 12. junija nominowała. Na wokrjesnym stronskim zjězdźe sobotu w Hodźiju su sobustawojo tudyšeho wokrjesneho zwjazka AfD Franka Peschela wuzwolili. Za njeho hłosowaše 52 přitomnych, přećiwo njemu šěsć. Peschel je nakładnik a zapósłanc Sakskeho krajneho sejma. Kaž sam praji, je Budyski wokrjes wot lěta 2017 „módry wólbny wokrjes. To ma so nětko tež na runinje krajneho rady stać. Chcu našim wobydlerjam, njewotwisnje wot kóždeježkuli stronskeje přisłušnosće, byrgarsko-konserwatiwnu wólbnu alternatiwu skićić“, kaž strona kónc tydźenja informowaše. Požadar chce jako krajny rada „hospodarske ramikowe wuměnjenja w Budyskim wokrjesu polěpšić, zarjadniski aparat redukować a, hdyž móžno, statne wudawki masiwnje pomjeńšić.“ Kandidat dale wo tym rěči, „wobydlerjam pomhać, kotřiž sylnje stupacych płaćiznow za milinu, płun a ćěriwo swoje zežiwjenje lědma hišće zapłaćić móža“.
Krótkopowěsće (28.03.22)
Incidenca dale přiběra
Budyšin/Zhorjelc. Z hódnotu 1926,4 je incidenca w Budyskim wokrjesu přez kónc tydźenja dale přiběrała. Dohromady zwěsći RKI tu 183 nowych natyknjenjow z koronawirusom. Tež w Zhorjelskim wokrjesu je tendenca dale stupaca. Tu zapoda RKI dźensa incidencu 1 590,8. 121 ludźi je so z wirusom inficěrowało. Ani w Budyskim ani w Zhorjelskim wokrjesu po RKI nowe smjertne pady w zwisku z pandemiju registrowali njejsu.
Blokaj pozdźišo wotpinyć
Podstupim/Janšojce. Braniborske krajne knježerstwo chce doskónčne wotpinjenje dweju blokow Janšojskeje milinarnje přestorčić, zo by energijowu wotwisnosć wot Ruskeje pomjeńšiło. Hospodarski minister Jörg Steinbach (SPD) je zwjazkowemu hospodarskemu ministrej Robertej Habeckej (Zeleni) w lisće namjetował, tak mjenowanu wěstotnu zwólniwosć dweju blokow milinarnje podlěšić.
Čěscy wojacy do Słowakskeje
