Šwjelowu bróžeń jako městnosć wjelestronskich zetkawanjow ...
Bywšu Wochožansku farsku bróžeń su jako restawrowanu a přesadźenu městnosć kultury a zetkawanja wožiwili. Wona je po serbskim fararju, redaktoru a rěčnym slědźerju Bogumilu Šwjeli (1873–1948) pomjenowana, kiž bě wot 1908 do 1913 farar we Wochozach.
Próstwy zapodać
Budyšin (SN). Załožba za serbski lud na to skedźbnja, zo skónči so doba za zapodaće próstwow wo spěchowanje 30. septembra hnydom w dwójnym nastupanju. To potrjechi jónu podpěru předewzaćow, kotrež chcedźa zapodawarjo klětu w prěnim połlěće resp. po cyłym lěće 2023 zeskutkownić. Wobkedźbować maja při tym, zo „leži spěchowanski wolumen załožby pola tutych próstwow pod 10 000 eurami“, kaž ze załožboweho zarjada rěka. Projektowi iniciatorojo njech wužiwaja za to požadanski formular pod .
Dalši wobłuk je program „Serbska rěč a kultura w strukturnej změnje“ za projekty w Sakskej. Tu załožba hač do 2038 za kóžde lěto přewostajene srědki we wysokosći 2,5 milinow eurow wobhospodari. Ze zapodaćom próstwow hač do 30. septembra za sćěhowace lěto, tónkróć za 2023, chcedźa zdobom do prawidłowneho rytmusa za wobdźěłanje požadanskich podłožkow zastupić. Tute spěchowanja maja so w lěće 2023 zahajić, financny wobjim projekta dyrbi znajmjeńša 25 000 eurow wysoki być. Wotpowědny formular je přistupny pod .
„Najmłódša hałuza sokołskeho hibanja“
Budyšin (SN/bš). Najwažniše wuwićowe fazy čěskeho sokołskeho hibanja běchu tema wčerawšeho přednoška historikarja dr. Martin Klementa. Wědomostny sobudźěłaćer Masarykoweho instituta a archiwa Čěskeje akademije wědomosćow a zdobom bibliotekar a archiwar Čěskeho sokołskeho zwjazka w Praze promowowaše 2019 wo strategiji w sokołskim hibanju. Z jeho slědźenjow předstaji wčera pozadki čěskeho hibanja a styki k serbskemu Sokołej. Štož bě Miroslav Tyrš 1862 jako ćěłozwučowanske hibanje załožił, wuwi so 1889 dale k wulkej sokołskej jednotce, kotraž měješe w 1930tych lětach hač do 750 000 sobustawow. Jako zakłady sokołskeje mysle mjenowaše přednošowar Klement nacionalizm, panslawizm, militarizm, kaž tež skutkowanje přećiwo socializmej a katolicizmej. Sokołska subkultura běše patriarchiska a maskulinowa, štož so wosebje na drasće a w symbolach pokazowaše. Tež rěč Sokołow běše swojorazna a postrowichu so z wosebitym sokołskim postrowom, tak Klement. Po zakazu Sokoła w połstatych lětach so zwjazk po přewróće znowa wutwori a ma dźensa na 160 000 sobustawow.
Serbske słowa pokazuja puć za wěru a dowěru
Towarstwo „Šwjelowa bróžeń“ je organizowało rěčny kurs hornjoserbćiny pod hesłom „Serbšćina w cyrkwi“. W nim prócuja so iniciatorojo cyrkej a swět zwjazać.
Wochozy (AK/SN). W hornjoserbskej rěči stej sej słowje wěra a dowěra přewšo bliskej. „Dopjelnjena wěra je dowěra“, praji dr. Christiana Piniekowa, čłonka dźěłoweje skupiny Serbska namša w Choćebuzu, „serbska rěč je přewšo přećelna, na čłowjeka poćahowana. Mnohe słowa ze sobu zwisuja kaž duch a dušao.“
Wustawki su w SKT přeměrili
Trjebin (SN/at). Z někotrymi změnami swojeje wustawy su so čłonojo Zwjazka za serbski kulturny turizm (SKT) na swojej hłownej zhromadźiznje předwčerawšim na Šusterec statoku w Trjebin lěpje za přichodne skutkowanje nastajili. Na rjadowanja za digitalne wuradźowanja, kotrež płaćachu w zwisku z prawidłami korony dla, so wjace zepěrać njemóža. Tuž su tule formu posedźenja nětko we wustawkach zakótwili. Hladajo na to, zo čłonojo předsydstwa w cyłej Łužicy bydla, móža so bjez wulkeho jězdźenja krótkodobnišo schadźować.
Přitomni zhonichu wot předsydstwa bliše wo stawje aktualnych projektow. Kameramuž Clemens Jurk natoči tučasnje serbske nałožki w běhu lěta. Kaž předsyda towarstwa Pětr Brězan rjekny, słuša delnjoserbske łapanje kokota runje tak k tomu kaž Slepjanske dźěćetko. Za ptači kwas su Hory we Wojerowskej kónčinje předwidźane. Dale su film wo serbskich poskitkach Łužiskeje jězoriny nahrawali. Za dźěłowy kruh „Serbska kupa“, kotryž w teritoriju mjez Złym Komorowom a Slepjanskej wosadu skutkuje, su internetnu stronu a flajer nadźěłali.
Na zetkanju w Praze Serbow witałoj
Nowowólby přihotować
Hochoza (SN/at). Čłonojo Serbskeho sejma zaběrachu so na swojim 35. posedźenju minjenu sobotu w delnjołužiskej Hochozy z peticiju trajne dalewjedźenje zwjazkoweho programa za rěčne pěstowarnje nastupajo, kotruž sejmarjo po informaciji dr. Měrćina Krawca solidarisce podpěruja.
Gremij přihłosowaše zapodaću namjeta, z kotrymž ma so składowanje atomowych smjećow we Łužicy wotpokazować. Wšako dźe w tymle zwisku wo škit tradicionelneho žiwjenskeho zakłada w regionje. W Serbskim sejmje su měnjenja, zo słušeja brěmjenja za energijowu wěstotu po wšej zwjazkowej republice rozdźělene, nimo toho žadachu sej tute wot serbskeho ludu hižo wulke wopory za wěste zastaranje kraja z energiju.
Z widom na dotal časowje konkretnje njepomjenowanu dobu prěnjeje wólbneje periody Serbskeho sejma běchu sej, kaž z nowinskeje zdźělenki dale wuchadźa, přitomni w Hochozy přezjedni, zo maja so nowowólby parlamenta přihotować. Z tym hodźeli so politiske zajimy serbskeho ludu hišće bóle mnohostronsce a z nowej mocu zastupować.
Šulerjam so bóle prezentować
Budyšin (SN). Prašenje „Kak dorost za serbske institucije zdobyć a poskitki serbskich dźěłowych městnow lěpje šěrić?“ stej wuběrkaj Zwjazkoweho předsydstwa Domowiny za nutřkownu demokratiju a serbsku ciwilnu towaršnosć resp. za zjawnostne a wukrajne dźěło na swojim wčerawšim wuradźowanju rozjimałoj, kaž Domowina informuje.
Damian Dyrlich jako předsyda wuběrka za nutřkownu demokratiju wopodstatni nastork za zetkanje, zo je dale a ćešo, dźěłowe městna w serbskich institucijach wobsadźić. Předsyda Domowiny Dawid Statnik skedźbni tež na potrjebu, wědomje w swójbach zbudźić, zo serbske institucije powabliwe powołanske perspektiwy skićeja. Konsens knježeše, zo měli so serbske institucije direktnišo šulerjam prezentować, kaž na powołanskich wikach Ralbičanskeje wyšeje šule abo na studijnym dnju Serbskeho gymnazija. Krystof Grofa, předsyda tamneho wuběrka, widźi jako hłownu zaměrowu skupinu něhdźe 25lětnych, kotřiž steja na proze powołanskeho žiwjenja. Image serbskich institucijow njeje tuchwilu přerěznje jara dobry, „naratiw“ ma so polěpšić.
Planuja Serbski filmowy dźeń
Budyšin (SN/at). Předsydstwo Domowinskeje župy „Jan Arnošt Smoler“ Budyšin přihotuje za nowember serbski filmowy dźeń w Budyskim kinje na Sukelnskej. Dopołdnjo měło w znamjenju serbskich trikowych filmow za dźěći a šulerjow stać. Serbske paski za cyłu swójbu su za popołdnjo wotmyslene a tajke za dorosćenych wječor. Budu to filmy z doby DEFY w NDR runje tak kaž tajke z filmoweho studija Sorabije pod nawodom dr. Tonija Bruka. Zajimcy móža so hižo nětko na wosebite filmowe chłóšćenki wjeselić.
Najprjedy pak hotuje so župa na swoju kóždolětnu kubłansku jězbu. Lětuša powjedźe 24. septembra po slědach Korle Awgusta Kocora do Zahorja, Ketlic a Stróže. Loni běchu po slědach Handrija Zejlerja po puću. Wobdźělnikow wočakuje w Ketlicach wodźenje po cyrkwi. Tam zaklinča pišćele a dr. Christian Kessner, awtor knihi „Swjate su mi twoje hona“, Domowinjanam přednošuje. Kaž přisłušna regionalna rěčnica Katja Liznarjec po posedźenju župneho předsydstwa minjeny štwórtk w Budyšinje zdźěli, móža so zajimcy hač do 16. septembra w Budyskim regionalnym běrowje přizjewić.
Přeja sej we wokrjesu serbski wuběrk
Wojerecy (SN/at). Financowanje šćežki po serbskich slědach Wojerec „Via Sorabica Hoywoj“ chcedźa zastupjerjo župy „Handrij Zejler“ ze zamołwitymi města bórze rozjimać. To je župne předsydstwo na swojim wčerawšim posedźenju rozsudźiło. Do toho je Werner Sroka dalše wuslědki swojich rešeršow wo serbskim nakładniku a tehdomnišim předsydźe Wojerowskeho burskeho towarstwa Awgusće Lapštichu předstajił.
Nimo toho móža dalšeho sobustawa witać – předsydstwo je towarstwo „Šulska a domizniska stwa Ptačecy“ do župy přiwzało. Čłonojo towarstwa běchu próstwu wo přistup jednohłósnje zapodali, kaž kožupan Marcel Brauman zdźěli. Regionalna rěčnica Sonja Hrjehorjowa je hotowarniče regiona do zhromadneho dźěła za přiručku wo serbskej drasće zwołała.
