Inscenacija „Nic so smjeć!“ Budyskeho Němsko-Serbskeho ludoweho dźiwadła bě jara wuspěšna. Dohromady je wona w Delnjej a Hornjej Łužicy něhdźe 900 wopytowarjow přiwabiła.
Budyšin (SN/CoR). Hdyž słowjenski režiser (Jaša Jamnik) kruch chorwatskeho awtora (Miro Gavran) w serbskej rěči na jewišćo přinjese, njeje jenož europski flair garantowany, ale tež lóštne dźiwadłowe dožiwjenje wosebiteho razu. Lubosćinska komedija „Nic so smjeć!“ w přełožku Lubiny Hajduk-Veljkovićowej je po hornjoserbskej premjerje 17. oktobra w Budyšinje 644 přihladowarjow na jědnaće předstajenjach zahoriła. To je porno lońšej małej serbskej inscenaciji sto ludźi wjace.
