Smolerjowe lěto z přednoškom w Domje Zejlerja a Smolerja zahajene

Łaz (AK/SN). Spěchowanske towarstwo Zetkanišćo Dom Zejlerja a Smolerja je minjeny pjatk na zahajenje Smolerjoweho lěta na česć 200. narodnin serbskeho prócowarja přeprosyło. Něhdźe 50 wopytowarjow přichwata do Łazowskeho Domu Zejlerja a Smolerja, zo bychu słyšeli přednošk wědomostneje sobudźěłaćerki Budyskeho Serbskeho instituta dr. Susanny Hozyneje „Wuslědźenje a zachowanje najdróšeho pokłada. Jan Arnošt Smoler a jeho zběrka ludowych pěsnjow“.