Měrćin Wjenk je wuwzaće, 29lětny spisowaćel je zdokonjał, štož ma někotryžkuli młody čłowjek na swojej, tak mjenowanej „to-do“-lisćinje stejo: jónu w žiwjenju knihu napisać. Njeje drje to hnydom roman, ale w rjedźe kapsnych knihow Ludowe nakładnistwa wuńdźe kónc lěta 2015 jeho prěnička „Stary dom“, wopřijaca 124 stron.

A puć ke knize je Měrćin Wjenk wutrajnje kročił. Tuž měł sej na nim přikład wzać, štóž chcył tež raz swójsku knižnu premjeru dožiwić. Do zjawnosće stupił je młody awtor prěni króć lěta 2010 z powědančkom w zešiwku Paternoster. Lěće po tym wobdźěli so na dźěłarničkomaj LND za serbski literarny dorost. Tak je próca wo nowu generaciju pisacych prěnje płody njesła. Wot toho časa mjenujcy dźěłaše Wjenk zaměrnje zhromadnje z lektorom LND Pětrom Thiemannom na swojej prěničce. Wona wobsahuje štyri, po wašnju powědanja cyle wšelakore stawizny.