Čorny Chołmc (UH/SN). Fanojo Kraba­towych swjedźenskich hrow – abo znajmjeńša ći, kotřiž su za jedne z lětušich zarjadowanjow pod hołym njebjom zastupny lisćik dóstali – smědźa so wjeselić. Horca faza za spektakl při Čornochołmčanskim Krabatowym młynje je so započała. Tam wotmě so minjenu njedźelu casting statistow. Přetož tež za pjatu inscenaciju tohole razu wostanu swojemu hesłu „Wjes hraje dźiwadło“ swěrni. Nimale 80 lajskich dźiwadźelnikow a statistow budźe lětsa wobdźělenych, mjez nimi 15 dźěći.

„Wy sće žro našeje inscenacije a zaruka dalšeho wuspěcha Krabatowych swjedźenskich hrow“, rjekny hrajerjam Peter Siebecke z Drježdźanskeje zarjadowanskeje agentury. Wón wě, zo su wočakowanja publikuma lětsa znowa hoberske, wo čimž swědči razantnje spěšna předań lisćikow. Za dźesać zarjadowanjow běchu loni 1. septembra wšitke kartki w běhu 24 mjeńšin online předali.