Serbja so na zjězdźe katolikow w Lipsku lóštnje prezentowali

Lipsk (SN/MkWj). Wjesoła, lóštna a swjedźenska atmosfera knježeše wčera wječor na a před serbskim jewišćom k zahajenju mjeztym 100. zjězda katolikow, kotryž wotměwa so lětsa w Lipsku. Hłownje zamołwići za wosebitu naladu běchu z Łužicy přichwatani: spěwarjo chóra Meja, hudźbna kapała Con-tact, Smjerdźečanska rejwanska skupina a saksofonist Daniel Matka. Mjez wopytowarjemi běchu tež w Lipsku studowacy abo tam bydlacy Serbja, kotřiž spodobnu atmosferu hišće přisporjachu.

Mjenowane kulturne ćělesa so w krótkich blokach wotměnjachu. Zamołwići běchu serbski program na promenadźe pěškow na Grimmaskej zarjadowali, štož je Serbam stajnje wjele přihladowarjow zaručiło. W bjezposrědnim susodstwje informowaše Towarstwo Cyrila a Metoda na swojim stejnišću wo katolskich Serbach. Nimo toho poskićachu tam kulinariske wosebitostki.