Hromadźe dźeržeć a so mjez sobu podpěrać je dopóznaće, kotrež wuwiwaja tři swinka w najnowšej inscenaciji Němsko-Serbskeho ludoweho dźiwadła „Ferkel, hunčo a prosetko“. Wčera dožiwi klankodźiwadłowa produkcija swoju premjeru, a to w třoch rěčach.

Budyšin (SN/MiR). Wulka wosebitosć tuteje hry a zdobom absolutna nowosć je trojorěčnosć. Předstajeja ju němsce, hornjo- a delnjoserbsce. „Zakładna ideja zdobom je, aktualnu politisku temu za dźěći zwobraznić“, rozłožuje zastupjerka intendanta za serbske dźiwadło NSLDź Madleńka Šołćic, „tři rěče a tři kultury w jednym regionje měć je wosebitosć a zdobom wobohaćenje.“ Partner NSLDź je tónkróć Rěčny centrum WITAJ, kotryž wozjewja w swojim zešiwku „Lutki“ pedagogiski material za wužiwanje w pěstowarnjach a zakładnych šulach.