Brězanec swójba dom spisowaćela Jurja Brězana mnohim spřistupniła

Horni Hajnk (SN/mwe). Wjele ludźi je sej wčera popołdnju do Hornjeho Hajnka dojěło, zo bychu sej dom spisowaćela Jurja Brězana wobhladali. Mjez wopytowarjemi běchu mnohe swójby ze serbskich wsow, kotrež so z kolesom na wulět poda­chu. Přiležnosć, sej dźěłarnju sławneho Serba, kiž by minjeny štwórtk swoje stote narodniny swjećił, wobhladać, wužichu tohorunja lubowarjo jeho němskich spisow z Drježdźan, Wojerec abo ze Steiny pola Kamjenca.

Kaž hižo w minjenych dźesać lětach, jako poby w Brězanowym domje tójšto šulskich rjadownjow, Domowinskich skupin a dalšich towarstwow kaž tež wobdźělnikow wšelakich projektow, móžachu sej hosćo cyłu chěžu a wonkownu ležownosć ze zahrodu wobhladać. Tak nadeńdźechu w rumnosćach přewšo zajimawe historiske dokumenty – knihi, rysowanki a fotografije wo žiwjenju a skutkowanju Jurja Brězana. W lubosći k detailej běchu so spisowaćelowi wnučkojo Beno, Franciska a Florian, na čole pak jich mać dr. Beata Brězanowa swědomiće na tón dźeń přihotowali.