Financowanje noweje wustajeńcy Choćebuskeho Serbskeho muzeja njewěste

Choćebuz (SN/CoR). Zo je Choćebuski Serbski muzej wot spočatka lěta přetwara dla zawrjeny a zo dotal njejsu twarić započeli, to snano toho abo tamneho tróšku dźiwa, je pak cyle po planje. Twarske naprawy maja so, kaž předwidźane, w oktobrje zahajić. „To swój čas traje, hdyž chceš stajnu wustajeńcu porjadnje wottwarić a składować a njemjetać objekty prosće jenož do kistow “, rozłoži našemu wječornikej nawoda Choće­buskeho Serbskeho muzeja a Choćebuskich měšćanskich zběrkow Steffen Krestin. „Tež twarskoprawniske pruwowanje a słyšenje přirady za zbrašenych dyrbitej wotzamknjenej być, prjedy hač móžeš přetwarjeć.“ Znajmjeńša tele prašenja su mjeztym rozrisane. „Stoprocentnje njebudźemy wobnowjeny dom na Młynskej ludźom cyle bjez barjerow spřistupnić móc, přistup do domu a na prěni poschod pak budźe wužiwarjam chorobneho stoła móžny“, Krestin potwjerdźi. Město­ Choćebuz přetwar financuje.